Mitiyegec 95 - Deduamiti

Yeac enac tofohobesonga

¹ Hagec, Kebuac yegec heima oeha memini. Ye hoc peperandzi serinina nga memengerecnina. Nenang sogaima yeac yegec dendzerenggema heima

² yeac hoannu kemma ye ubangerec memibisina. Neni yeac afe afeheyegec sogaima dendzerenggema heibisina.

³ Kebu ye Anutu engena yombong, ye anutu sasawa yeneac ngictau engenatoa.

⁴ Yeng bangectoa bangec manau keme kemea fede, imoc mariau mema garenggeude. Bangec kperec kperemenga nga tiki sasawa imoc yeac.

⁵ Yennoc kondung meec, imocac amma kondung imoc yeacngoc. Amma yeng bangec kerenga meu imocngo yeac marikibi ande.

⁶ Hagec ngonducnema numumini. Kebungo meficnunuec, nenang yeac kicfu fafoc heimini.

⁷ Ye Anutunina nga nenang yeac ngicngacfora. Ye yengena odayau fainunuma nenenggareng angkefu ramafora anni yeng mariango menunuu kecdimbe. O, ngeni yaguc kedzac kpema yeac enacudumeng negembau, imocac yombong anende.

⁸ Mang esafocngina yeni Meriwa dokuu ubaseri amma Massa bangecfu kecgec, naso imohai bangeckisiu tobannukecgec, ngeni ifi isoc mi ambisia.

⁹ Ni faka kuhagoc meba yeni imoc hengkecgec, imoc fora. Nga yeni sifu ihai tobannuma faitobannu fainugec.

¹⁰ Ni kifa 40 ngicngacareng imoc yeneac modzona tiu yofi deai, “Yeni ubaherenginango sing segekecma neac sing fekende, imoc negembibiema kecgec.”

¹¹ Imocac ni ngaba amma yofi deserima deai, “Yeni neac kecnegeng kekecfu naric mi embesandae.”