Mitiyegec 83 - Deduamiti

Isracel yunubeso andae

Asafngo mitiyegec yofi heiec.

¹ O Anutu, ge mi waickena amma kedzacga mi kpefonggena, o Anutu, ge eng mi tacna.

² Henna, ngabafocga yeni kpeborongtoa kpedae nga ngic ubango ukugudae, yeni orucngina miacma nandae.

³ Yeni geac ngicngacfocga tobangyunugecdeac negemma areng faima yoac dedzege andae. Geng ngicngacfocga nenenggareng amma onggonnunuannec, yeni neninoc memanganenunubeso amma

⁴ dedae, “Hagec, nenang Isracel bangec areng meicyununi kpac andacbisia nga ngicngac yeneng Isracel kpacngina monggoc mi negenggec febeso.”

⁵ Yeni uba mocgu amma yoac dedzege amma Isracel memanganegecdeac dzadzahac mekecdae.

⁶ Ngic imoc Edomgac areng kporucamanginau kecandae. Yeni Ismacelac areng nga Mocaw areng amma Hager, yeac areng.

⁷ Yeni Gewal nga Ammon amma Amalekngic. Yeni Pelisti bangecac ngicngacareng nga Tsor taonnunac hagec

⁸ Assur habu ifingoc yenigoc torokpeyunudau. Yeni kucnginagoc amma Lotac gboricfora yeni nonggo tacyemmedae. Selac

⁹ Geng warac Midyanbangec kpemeting amminec, ifi isoc yeni ayemmema Kison doku tegiau ngictau Sisera nga Yawin faka ayecmenec, ge ifi isoc kpemeting ayemmebesena.

¹⁰ Geng warac Endor amau ngic kpetotieyununa farengnginango bangecfu kerac isoc hoaema kpac anggec.

¹¹ Ge ngickunengngina meyununa Orew nga Dzecew yeri manganeec, ifi isoc ayemmema ngictau yeneac medacfocngina kucnginagoc sasawa meyununa yeni Dzewa nga Tsalmunna ayecmenec, yeni ifi isoc ayemmebesena.

¹² Nocac yeni degec, “Neni Anutuac manengbangec meni imocngo nenang ambeso.”

¹³ O Anutuna, geng ngic ifia meyununa sendungngo firannu yerecgeande, ifi isoc yerecgebisia. Ngic yeneng padi seuha firangngo mefiranggeande, ifi isoc mefirangyununa.

¹⁴ Nga gerecngo ickate dzeande nga gerecborangngo tikiu fekengkecma bangec faiu dzeande, ge ifi isoc amma

¹⁵ kiafiranggango kisangyunuma firangngo kuneng kpeu kengectoa meficgeyemmebesena.

¹⁶ O Kebu, geng kicmesungina game kpekpeu faiyunudacna yeneng geac kpac kuneng hofocbisia.

¹⁷ Yeni geng negemmana gameyunuu nasoya nasoya negeng manganggoc kecgec imocngo nasosoc mebucyunuu ngicngac yeneng wayunugec kpac ambisia.

¹⁸ Geac kpac kuneng imoc Kebu. Ge mocgungo bangectoa bangec fekendacde, imocac Engenatoa kecnec, yeni imoc negembisia.