Mitiyegec 81 - Deduamiti

Isracel ge sogaibesena

Yegecgareng yearu. Gatngic yeneac musiwiac kpema heibesonga. Asafngo yegec yofi heiec.

¹ Anutu ye kucnina. Ngeni dendzerenggema yegec heimima Yacakowac Anutu sogac sogaigoc arohoma oheha memibisia.

² Ngeni tambaring nga gita amma kurere kpema udumeng gombunga meficgema yegec heibisia.

³ Afo gboria mau nga nasotoanina afo dzongiau trampet fifigec arohobeso.

⁴ Anutungo Isracelac singyoac ngemmeec. Yacakowac Anutungo yoac ifi deseringemmeec.

⁵ Anutu yengenaoc Aigita bangecfu kemma dzikac kpema firang anec, imohai dederecgeyoac imoc Yosefac areng yemmeec. Ni ubaudumeng nga yoac warac mi negengkefai, imoc naso imohai negenai.

⁶ Negemba yofi deec, “Ni fuanginaunac ebic mesima maringinaunac uaac sakac ebira meickeba

⁷ ngeni ebicnginagoc kecma kpacnugec ebicfunac mesingunuai. Ni hoennu gbururunggac manau sufuma yoacnginaac turunga merengngemmema Meriwa doku imohai faitobannu faingunuyai.” Selac

⁸ “O ngicngacfocna, ngeni kedzac faigec goroyoac edengunuba. O Isracel habu, ngeni neac yoac negembisia.

⁹ Ngeni anutu furia mong mi mekecbisia nga bangecareng goa yeneac anutu fafoc mi heimibisia.

¹⁰ Ni ngeneac Kebu nga Anutungina. Nennoc Aigita bangecfunac mengunuma hayai. Ngeni enacngina anggegec mewakengunubade.”

¹¹ “Ngicngacfocna ngeneng ine ubaudumennaac kedzac mong mi kpegec, kpac yombong. Isracel areng ngeni wanuma neac yoac mi tofohogec.

¹² Imocac wangunuba ngeni ubaseringinagoc kecma ngenang negen negeng modacgec.

¹³ O ngicngacfocna, ngeni neac yoac modacma kedzac kpebau, imocac yombong anende. Nga Isracel ngeneng neac sing modacbau, imocac homac anende.

¹⁴ Ngeni ifi ambau dede neng ngabafocngina bic memayunuma marinango singngina hedzickebai.”

¹⁵ “Ifi amba ngicngac Kebu ubango ukudae, yeneng yeac kicfu hama fafoc heimibau. Yeni kopocsicnginaac turunga ebicgoc kecdae, imoc nasoya nasoya feengkecbac.

¹⁶ Ifi kefu Isracel areng, ni wit yaka gombunga ngemmeba nebau nga ni hoc peperandziac kukundzau meficgema ngemmeba nebau.”