Mitiyegec 67 - Deduamiti

Yaiyo kpegembisia

Yegecgareng yearu. Yegec nga mitiyegec, gitakurere nga noc kpema heibesonga.

¹ Anutungo wosoefac anemmema kenecnunuma kicmesuyango nerarannunubeso. Selac

² Ifi anna ngicngac bangecfu kecdae, yeni geac haniaga negembisia nga ge ebicfunac mesiyununadeac kuc fegende, bangec monnunac ngicngac botucnginau kecdae, yeni imoc negembisia.

³ O Anutu, ngiha ngiha yeneng afegubisia, yeni sasawango ge yaiyo kpegembisia.

⁴ Ge monde mondega kpac kecma ngiha ngiha siric mocguu isingyununade nga bangec monnunac ngicngac sing edzacyununa imoc modacgecdeac yeni ubangerec negemma sogac sogai yegec heigembisia. Selac

⁵ O Anutu, ngiha ngiha yeneng afegubisia, yeni sasawango ohecga megembisia.

⁶ Anutu ye nenang Anutu. Yeng kenecnunuu bangecngo semeng gombunga meficgenemmeude.

⁷ Anutungo kenecnunubeso nga ngicngac bangec tegia fekendaesoc, yeni sasawango ye eweheimima hoanggebisia.