Mitiyegec 61 - Deduamiti

Kpegangga bageu

Yegecgareng yearu. Gitakurere nga noc kpema yegec yomoc heibesonga. Dawidngo mitiyegec yofi heiec.

¹ O Anutu, ge kpakpacna negemma nunumunaac kedzac kpema negenna.

² Ni bangectoa bangec tegiau namba woubocna kucmama anu kpacguduae. Ge hesicnuna hoc peperandzi herea mong feracnude, imohai kemma nambisira.

³ Ge neac sufu sufuama. Ngabafocna yeneng nubeso anggec geng amana herea nga seria annec.

⁴ Ge kporucamagau fainuna ni nasoya nasoya ihai kecbade nga kecbesandua. Ni geac kpegangga bageu sufuma kecbadeac anende. Selac

⁵ O Anutu, ni yoac deserima deai, imohai ge imoc negemma ngicngac eweheiheigoc hoangguandae, ge bangec desiyemmenec, imoc ni ifingoc desinennec.

⁶ Ge ngictauac kekeha mehereena kifa homac kecbeso amma apangabofora yenembeso.

⁷ Anutu, ye geac kicfu nasoya nasoya ngictau tatahau takecbeso. Ge yoac modac modac Kebu amma yoac dedzege amma yoacga imoc modackecnecac amma fakaga imocngo ge negemmana ngictau henggareng ammibeso.

⁸ Geng ifi anna ni dedeserina imoc wenacsoc modackecma geac kpac kuneng wenaha wenaha heiwayong memibade.