Mitiyegec 60 - Deduamiti

Anutu, ge wanununec me?

Yegecgareng yearu. Yegec kpara: Dzadzahaac lili dzaring, imocac uba modacma miktangyegec yomoc heima ubau faibesonga. Dawidngo yegec yofi heiec.

¹ O Anutu, ge ngadenunuma kpetotienunuma neneac ngaba annec. O Kebu, ge monggoc mengerenununa.

² Ge bangec kpemindzahena usoc meu titing kuneng fingeru goroc goroc andeac geng titinga monggoc mengerena.

³ Ge ngicngacfocga kpendzengtoau fainunuma waing seria gumecnununa neinggac hanititinina goroc goroc anu sicsaucfu kengha aning.

⁴ Ngicngac ge eweheiheigoc hoanggugec yeni ine tebemedahaac sinnunac hesicyununadeac firac mong miacna yeni imoc hemma ihai kpedzucnema nanggecde. Selac

⁵ Ge ngicngacfocga neneac songo negennec, nga ebicfunac mesiyununadeac neni marifoigango dzikacfu meficnununa firang ambisina. Ge nunumuninaac turunga merennemmena.

⁶ Anutu ye womongau tacma yoac deserima yofi deec, “Ni firang amma sogaima Sehem ama mederema Sukkotac bangec tume imoc medereba noboha noboha anu ngicngacfocna yemmebade.

⁷ Gilecad nga Menasse yeri neac. Efrayim imoc wasai opocna nga Yehuda ye ngictau yasuna.

⁸ Mocaw imoc dzuac dzuac sokocna nga ni Edomggaru hanitabena ukuba yunuude amma ni firang amma Peleset bangec arohomiba negenggecde.”

⁹ Mongngo nigoc kemma taong odaya seria imohai menuma Edom bangecfu hesicnuma kembeso.

¹⁰ O Anutu, gennoc wanunuma ukununudacnec. Ge wasaingicnina yenigoc dzikacfu monggoc mi kengannec.

¹¹ Ngicngo meficnunuude, imoc memefihagoc kpac. Imocac gennoc meficnunuma ngabafocnina yunubesena.

¹² Neni Anutugoc namma kuctoaninagoc amma firang annide. Yennoc ngabafocnina mematiti ayemmeude.