Mitiyegec 6 - Deduamiti

Kebu, ge mengerenuna

Yegecgareng yearu. Gitakurere nga noc kpema sheminic uba modacma heibesonga. Dawidngo mitiyegec yofi heiec.

¹ Kebu ge ngaba amma ngabasiricfu yoac mi anenna amma herega buu numeme mi anenna.

² O Kebu, ni kucna kpac anu homebeso anduae nga kengec amma dzononna fededeac neac ubaga manganeu sebina mengerena.

³ O Kebu, ni ongana kengectoa meficgema ebirima kecdeac ubaebicna bic meickenadeac tomai kecduae.

⁴ O Kebu, ge dzigene hama kekecna ebicfunac mesina. Ge yoac dedzege amma imoc modackecnecac ebicfunac mesinuna.

⁵ Homecfu kemegec, yeni ge mi negensigugecde nga mong ye homecamau kemema fede, yeng ge naric mi dengereguude.

⁶ Ni asoringa anengkefu kucna kpac ande. Ni tofocnacsoc kiacba kickumana dokutoa isoc mama heifefena heiude. Amma ni homac kiacba kickumanango fefena meu boroc boroc yombong angande.

⁷ Ni ubahodunnagoc kecduaeac kiacba kicna ngopic kpede nga kiacba ngabafocna sasawa yeneng ebic meficgenenggec kicna kuha kpac ande.

⁸ Kebungo kedzac kpema neac kiac ubamangang bic negendacac manganameme ngic ngeni sasawango wanuma meickegec.

⁹ Ni ubamangang amma Kebu dekpesi ammiba imoc bic negendac. Kebu ye nunumuna negenu ngereede.

¹⁰ Ngabafocna yeni gameyunudaru homac yombong kengecyunuu fakanginaac amma gameyunuu wanuma bic yombong woragecde.