Mitiyegec 34 - Deduamiti

Ebicfunac mesiec

Dawidngo Abimerecac kicfu fingecma ikoc amma uba sufu sufungic isoc anu Abimerecngo ye kporaru mama worama yegec yofi heiec.

¹ Ni nasosoc Kebu keneheba, yeac dedengerecngo neac enacbibicfu nasosoc fekefude.

² Ubaonganango Kebuac negenu wiac engena anu ye dengereba. Ngicngac makpekpea yeneng imoc negemma sogaibisia.

³ O, ngeni nigoc Kebu kpac kuneng mima nenahafoc yeac kpac kuneng heiwayong memini.

⁴ Ni Kebungo meficnuudeac ye hofocba yeng kengecna meickema ebicfunac mesinuec.

⁵ Ngicngac neni kicnina yearu fini sogac sogaiac kperagingo kicmesunina mekperagiu kperagigoc annide nga kicmesunina gameagoc amma sacsac naric mi kpeude.

⁶ Ni ngic makpekpeango kiacba Kebungo neac kpakpac negemma ebicfunac mesinudarec.

⁷ Ngicngac neneng Anutuac eweheiheigoc kecni Kebuac angerongo ebicfunac mesinunuudeac nenigoc kecma oronnunuude.

⁸ Kebu gombunga, ngeni imocnoc tobanggema kicnginango hembisia. Ngic mong ye yeac hoannu kemma sufuma kecande, ye sogac sogaigoc kefude.

⁹ Kebu eweheihei ammiandae, yeni wiac monggac naric mi obohogecde. Imocac ngicngacfora kpetiac kecdae, ngeni ye eweheimima kecbisia.

¹⁰ Laionyang gboria yeni yaka hofocma herenginaac homegecde, fora. Anu ngicngac Kebu hofocandae, yeni wiac gombunga monggac naric mi obohogecde.

¹¹ O nambarac, ngeni yei hama yoacna negembisia. Ni Kebuac eweheiheigoc kekec kpoungemmebade.

¹² Ge kekecac songo negembesena nga naso gombunga hembesonga anggengkecde

¹³ ge nedzaranggango yoac mangana mi debesena amma ge enacbibicgango ikocyoac mong mi debesena.

¹⁴ Ge faka mangana ngadehema angammeme gombunga angkecbesena amma ruaeac sing meficgenadeac uatoa mebesena.

¹⁵ Kebungo kiwa ngicngac dindingac yenearu fima kedzac kpema kiacngina negenude.

¹⁶ Ye yarengic yenemma meicyunuma bangecfu ngicngac ninigec meficgeyemmeu yeneng monggoc mi negensiyunugecde.

¹⁷ Ngicngac dindingac yeni Kebungo meficyunuudeac kiacgec yeng kiacngina negemma ebicfunac mesiyunudarude.

¹⁸ Ngicngac ubamanganggac wosongina toho tohoya kecgec Kebungo yeneac wegenac kefude nga ngicngac asuu kpungge kpunggea kecdae, yeni ebicfunac mesiyunuude.

¹⁹ Ngic dindingacngo kpendzeng kpekecde, imoc wiac homac yombong, nga Kebungo sifu ye ebicfunac mesidarude.

²⁰ Ye sira gombunga garenggeu sira mong mi kpetackegecde nga kpetackebesandae.

²¹ Ngic Anutu ngadehema mangana meudeac ammiande, ye yarefakaac wiac manganango kpebucgeude. Nga ngicngac ngic dindingac ngaba ayemmeande, yeni yoacfu kopocsicnginagoc deyemmegec makpegecde.

²² Kebungo kingang ngicfora kekecngina bummema ebicfunac mesiyunuude nga mong ye yeac hoannu hama sufuude, ye yoacfu naric mi makpeude.