Mitiyegec 138 - Deduamiti

Wi yombong kecde

Dawidngo mitiyegec yofi heiec.

¹ O Kebu, ni heregoc ubangerec megemma anutu hania hania kecdae, yeneac kicfu geac dedengerecyegec heigembade.

² Ni womongga kpetiacfubigeng ngonducnebade. Geng yoac dedzege amma imoc modacnade amma ge yoac modac modac Kebu, imocac kpac kunenggaac ubangerec dekecbade. Ge kpac kunenggagoc nga geng yoacga deserima denec, ge wiac imoc miacna enu imocngo wiac sasawa feraheude.

³ Ni kpacguai naso imohai geng turunga merennemma kengeha kpac amma serima kecbadeac anennec.

⁴ O Kebu, bangecac ngictau sasawa yeneng geac enacgaunac yoac negenggecac dengeregubisia.

⁵ Kebuac kuc nga kibikperagitoa, imoc wiac engena. Yeni imocac Kebuac sing fekende, imocac yegec heigecde.

⁶ Kebungo wi yombong kecde, fora, amma ye sifu ngictehec nenang nenenggareng anemmekefude. Ngicngac goa yenanggac nengenggec engena angande, yeng herenginau kecma fakangina negenude.

⁷ Ni ebic witiau kecduae, fora. Nga geng sifu kekecna onggonggekecnec. Ngabafocna yeneng herebu anenggec geng mariga sinema marifoigango ebicfunac mesinunade.

⁸ Kebungo efaima neac kekecareng uayagoc faima imoc sasawa nearu mesidarude. O Kebu, geng yoac dedzege amma imoc modackecnade, fakaga imocngo nasoya nasoya feengkecbesande. Ge marikibiga mi ngadehema wana.