Mitiyegec 124 - Deduamiti

Kebungo onggonnuude

Hombannu kekenggac yegec. Dawidngo yegec yofi heiec.

¹ Isracel ngeni yofi debisia, “Kebungo nenanggoc mi kecbacfu neni dafi ambesonga obohobing.”

² Ngic yeneng yacma nunubeso anggec, imohai Kebungo nenanggoc mi kecbacfu

³ yeneng nenanggac herebu kuneng negemma gboringoc gbokonunubau.

⁴ Tunggbaungngo meicnunubac me doku dundungngo nebucnunubau.

⁵ Amma dokutoa kucnginagoc yeneng semenunudacbau.

⁶ Kebu keneheni. Ye onggonnunuu yeneac enacfu mi ening.

⁷ Uficngic yeneng ufic faigec nga nengngo uficfunac woraande, ifi isoc woraing. Ufic imoc barackeu uficfunac woraing.

⁸ Kebungo kurumeng nga bangec meficgeec. Nga memeficnina imoc yeac kpacfu fede.