Mitiyegec 122 - Deduamiti

Ge ruaegoc kecbesena

Hombannu kekenggac yegec. Dawidngo yegec yofi heiec.

¹ “Nenang Kebuac amau enni.” Yeneng ifi edenugec ubangerec negenai.

² O Yerusalaim, neni hanininango geac naguusing ekemma odaga manau tinandimbe.

³ Yerusalaim imoc taongtoa isoc megec nande. Imoc meserima mocgutoa megec ama nga ama wegenacfu ifi tackendae.

⁴ Nga ngicngac neni arenninasoc modacma imohai engandimbe. Imoc Isracel areng neneac dema yoac deserigec fede. Kebuac ngicngacareng neneng ihai emma Kebuac kpac kuneng heiwayong meminide.

⁵ Ihainoc fora dedeac ngictau tatac faigec homac tacdae, imoc Dawidac esangabo yeneac ngictau tatac sasawa.

⁶ Ngeni ruae Yerusalaimnu feudeac numubisia. “Geac songo negengandae, yeni naric kecma wiac monggac mi obohobisia.

⁷ Geac odaga manau ruae febeso. Nga amaherec amaga onggonggekecdae, imocac manau mangang kpangang mong mi febeso.”

⁸ Sactosofocna nga ogofocna yeneng naric kecgecdeac amma yofi debade, “Geac ama manau ruaengo kecbeso.”

⁹ Kebu Anutuninaac ama, imocac gombunggac amma ngeneng naric kecgecdeac nunumu uatoa mekecbade.