Mitiyegec 115 - Deduamiti

Ge Kebu negensinggena

¹ O Kebu, ge neneac kpac mi miacbesena, kpac. Geng yoac dedzege amma imoc modackecnec nga ge yoac modac modac Kebu, imocac geac kpac kuneng imoc eweheiheigoc kpacbesonga.

² Bangec monnunac ngicngac Anutu mi negemmidae, yeneng deandae, “Yeni Anutungina mong mi hendimbe, kpac.” Yeni nocac ifi deandae?

³ Anutuninango kurumenga kurumenga, imohai kecma songoya modacma uaya mekecde.

⁴ Ngicngac Anutuac yoac ifi deandae, yeneac nemuongangina silwa nga golngo memea, yeni bangecngic yeneac marikibisac.

⁵ Yeni enacbibicnginagoc nga yoac ine naric mi degecde. Yeni kicngina noboc nobocgoc amma wiac naric mi henggecde.

⁶ Yeni kedzacngina noboc noboc amma wiac mong naric mi negenggecde. Yeni samacnginagoc amma wiac monggac homuna naric mi homunggegecde.

⁷ Yeni maringinagoc nga maringinango wiac mong naric mi menegenggecde. Yeni haninginagoc nga haninginango sing naric mi kenggecde amma ubanginango udumeng mong naric mi meficgegecde.

⁸ Ngicngac nemuonga meyunuandae, yeni nemuonga isoc anggec. Nga nemuonga negenserima kecandae, yeni sasawango nemuongangina isocngoc anggecde.

⁹ O Isracel ngicngac, ngeni Kebu negenserima kecbisia, yennoc memeficngina nga kasongina.

¹⁰ O Aharonggac ama areng, ngeni Kebu negenserima kecbisia, yennoc ngeneac memefic nga kasongina.

¹¹ Ngicngac Kebu eweheiheigoc hoanggeandae, ngeni Kebu negenserima kecbisia, yennoc ngeneac memefic nga kasongina.

¹² Kebungo neneac negenside. Yeng kenecnunuude, ye Isracelac ama areng kenecyunuma Aharonggac ama areng kenecyunuma

¹³ ngicngac Kebu eweheiheigoc hoanggeandae amma ngicngac kuneng nga kapia kenecyunuude.

¹⁴ Kebungo ngeni nga nambaracfocngina mesahengunubeso.

¹⁵ Kebu kurumeng nga bangec meficyuruec, yeng kenecngunubeso.

¹⁶ Kurumenga kurumenga yeni Kebu yengena ama nga bangec imoc ngicac medacfocngina kecdimbeac nemmeu ihai kecdimbe.

¹⁷ Homemea yeni Kebu eriendzong naric mi memigecde, kpac. Ngicngac ningkpe fedae, yeneng ye naric mi dengeregecde, fora.

¹⁸ Nga Kebu dengerenide. Neni ye yofinenggac kenehema kecma nasoya nasoya kenehenide nga kenehebesandimbe. Kebu eriendzong memibesonga, hallelu Yac.