Mitiyegec 114 - Deduamiti

Anutuac kicfu dzonoma fedebeso

¹ Isracelngo Aigita bangec wama erema kenec. O, Yacakowac areng yeni ngicngac kuricyoac dekecgec, yeni wayunuma kenggec.

² Yehuda ye Anutuac womong kpetiac anec nga Isracel imoc yeac eucererenga anec.

³ Kondung ye imoc hemma kpidohoma kenu Yarden doku dzigeneec.

⁴ Tiki yeneng rama ngiwango futuckeandae, ifi isoc futuckegec nga fagang yeneng ramamedaha yuma engemmama angandae, ifi isoc sogac sogaigoc yuma engemmama anggec.

⁵ Kondung ge kpidohoma woranec nga Yarden ge kpidohoma dzigenenec.

⁶ O tiki, ngeni kpidohoma rama ngiwa isoc futuckedae nga fagang ngeni kpidohoma ramamedaha isoc yuma engemmama andae.

⁷ O bangec, ge Kebuac kicfu dendeng kpekecbesena. Ge Yacakowac Anutu yeac kicfu gbigbihebesena.

⁸ Yennoc hoc peperandzi seria heimerenu doku dzohong angkecde nga harongang heimerenu doku kiwa anude.