Mitiyegec 108 - Deduamiti

Anutuac dangge

Dawidngo mitiyegec yofi heiec.

¹ O Anutu, herenango efaiu udumeng gombunga amma yegec heibade. Ubaongana, ge gaunac yacna.

² O, ni ama werec wereckenggac yombong midibade nga gitakurere ngeri negenggboribesera.

³ O Kebu, ni ngiha ngiha botucnginau ge ohec megemma bangec monnunac ngicngac yeneac botucfu yegec heima ge dengeregubade.

⁴ Geng yoac dedzege amma imoc modackecnec, imocngo wiac engena amma engkecma kurumenga kurumenga feracyunuma enude. Nga ge yoac modac modac angkecnec, faka imocngo sawau emma hoeng kpesereyunuude.

⁵ O Anutu, ge oyang boyang megengandae, imocngo kurumenga kurumenga ferahema erebeso. Ge kucga nga kibikperagiga bangecfu faina mama bangectoa bangec sokodacbeso.

⁶ Geng ngicngacfocga neneac songo negennec, neni ebicfunac mesinununadeac marifoigango meficnunuma nunumuninaac turunga merennemmena.

⁷ Anutungo womonga kpetiacfu tacma yoac yofi deserima deec, “Ni firang amma sogac sogaigoc Sikeng ama nga Sukocac bangec tumia medereyemmebade.

⁸ Gilecad nga Menasse imoc neac, Efrayim imoc wasaiopocna nga Yehuda ye ngictauyasuna.

⁹ Mocaw ye dokunadzic terana nga Edomgaru hanitabena ukuma Peleset bangecfu firang amma arohobade.”

¹⁰ Dawidngo monggoc yofi deec, “Taong odaya seria fede, mongngo imohai hesicnuu kendedeac negenduae. Mongngo naric hesicnuu Edom bangecfu kendedeac negenduae.”

¹¹ O Anutu, ge wanunuma ukununudacma neneac wasaingichabugoc monggoc mi kengannec.

¹² Ngicngo meficnunuande, imoc memefihagoc kpac. Imocac geng meficnununa ngabafocnina yunubisina.

¹³ Neni Anutugoc namma kuctoaninagoc amma firang annide. Gennoc ngabafocnina tidzicyununa bangecfu fegecde.