Mika 4 - Deduamiti

Kebungo Ngictau Tatahau tarude

¹ Naso wisic wisickeau Kebuac womonggac tikingo engena amma tiki sasawa yeneac botucfu feracyunuma nanu, ngiha ngiha yeneng yearu kembesandae.

² Nga bangeha bangeha yeneng hama degecde. “Hagec, nenang Kebuac tikiu Yacakowac Anutu yeac womonnu kenni. Yeng fakaya kpounemmeu nenang yeac hanisinga modacnide.” Anu dedeseriyoarango Tsionnunac mabesande nga Kebuac yoacngo Yerusalaimnunac kenude.

³ Kebungo ngiha ngiha homac yeneac botucfu yoacngina desibesande amma bangeha bangeha kucnginagoc agac nga hereau kecdae yenearu tohohendzic botucnginau fede, imoc menomanebesande. Nga ngicngac yeni wasaibeangngina kpegec imocngo meremma bangec medzacmedzameac aieng anude amma sangarangina kpegec imocngo meremma honacbeang anude. Anu bangecareng mongngo wasaibeang miacma bangecareng mong yegoc ngaba mi angemeecde, ifi ammanu dzikacac kpoukpou monggoc mi fingecbesande.

⁴ Ngicngac yeni yenang waing nga fig icnginausoc kemma imocac bageau tacgecde. Tacmagec mongngo kengec mi meficgeyemmeude, Kebu Kuctoa Minginango ifi deseriec.

⁵ Bangeha bangeha yeneng anutufocngina yeneac kpacfu kecgecde. Nga nenang ine Kebu Anutunina yeac kpacfusac nasoya nasoya kecbesandimbe.

Kebuac negengareng

⁶ Kebungo yofi dekperagide, “Naso imohai ngicngac haningina mangana meyunubade. Nga ngic witicuau kengkena yeni kpedzucyunuma ngicngac ebicac kpendzennu faiyunuyunuya, yeni hafoangoc wangecyunu habesanduae.

⁷ Anu neng ngicngacfocna hani mangang tosea damoc meicyunukenggec, yeni meseriyunuba bangecareng kucnginagoc anggecde. Nga Ni Kebu neannaoc Tsion tikiu ngictaungina amma nasoyakpac bubungyunuma kecengkecbesanduae.

⁸ Yerusalaimgac ngicngac ngeneac taongngina imoc ramagareng yeneac kicfifiamaherec isoc nga imoc Tsionnu kecdae yeneac amaseria. Nga taongngina Yerusalaimngo bangecnginau taongtoa amma warac feec isoc feude nga ngictau mongngo ihai tatac mema garengngunuude.”

⁹ Ge ngictau mi annecac amma arohoma kiacnec, me? Nga enaraga bubungguu kecannec ye homedac imocac ngacngo medac meudeac gadze kiande, ifi isoc kpendzeng kpenec me?

¹⁰ O Yerusalaimgac ngicngac, ngeni ngacngo medac meudeac gadze kiu merengkpereng angande ifi isoc andae, imocac yaguc ngeni taontoa wama didiu tebac tirecgema ihai kecbisia. Ammanu Babilon taonnu kenggec, ihai Kebungo agengngina tima onggongngunuude amma ngabafocngina yeneac mariunac mesingunuude.

¹¹ Anu yaguc bangeha bangeha homacngo ge sisicgugecdeac kpedzucnema yofi dedae, “Tsion wagec manganeuu, anu nenang kemma hemma sogaini.”

¹² Yeni Kebuac negen negenga imoc mi negendae amma ye noc wiac meudeac negenec, imoc mi negentegecdae. Kebuac negen negengnga yofi, ye wit isoc dedecyunuma tidzactidzame sobennu kpedzucyunuec.

¹³ “O Yerusalaimgac ngicngac, ngeni yacma tidzameyunugec. Ammanu neng baic serigbanggbanggea nga sepatoga aieng sacsac ngemmeba imocngo bangeha bangeha nendzicyunugec kapickapic anggecde.” Amma ngeni ngabafocngina yeneng dzikacfunac wiac damoc medacgec, imoc mema Kebu midacbisia. Nga ngabafocngina yenearunac dzofinac megec imoc ifingoc Kebu midacbisia.