Mika 1 - Deduamiti

¹ Yotang nga Ahasi amma Hedzekia yeneng Yehuda yeneac ngictau kecgec, naso imohai Kebuac yoacngo Mika Moreset taonnunac yearu haec, imoc Samaria nga Yerusalaim yenearu wiac fingerudeac onga edzahaec.

² Ngiha ngiha ngeni sasawango yoac yomoc negenggec, nga bangec amma damocngo bangecfu kecdae, ngeni kedzac kpegec. Kebu Kpembibiagocngo kpetiac womongngau tacma manganangina heficgema haniangina mekperagima yoacfu faingunubesande.

Samaria nga Yerusalaim yereac kpemeting naso

³ Henggec! Kebu ye tataha hombonangaunac wama habesande; Ye mama bangec bumabuma witiau tima kembesande.

⁴ Anu tiki yeneng yeac hania bageu patatahegecde nga bangec tumea yeneng tohoma kendo kereha dzema sisingaiande isoc, sisingaima doku isoc fagannunac nedzima mabesandae.

⁵ Wiac sasawa imoc Yacakowac singyoac kpekpe faka nga Isracel ngicngac yeneac kopocsic fakaac amma ifi fingerude. Yacakowac singyoac kpekpe faka imoc Samariango mi ande, me? Nga Yehudaac kebu ikoha eweheiheiac sobeng imoc Yerusalaimngo mi ande, me?

⁶ KEBUNGO yofi dede, “Ifiac amma Ni Samaria memanganema seuc isoc heiemba waing heihomecac sobeng anude. Ni yengena hoc imocngoc kpakeba tumeau kememanu titiseria sasawa imoc didiu fingectegecma tarude.

⁷ Amma nemuongea sasawa imoc kpetackedacba dzamedarude nga kebu ikohaac womonnu sintoangac tacandae yeneac bung faindae, imoc gerecngo dzedarude. Anu kebungina ikoha imocac onga sasawa memanganedacbade. Samaria yeneng singtoa fakau wiac sasawa mekpedzuc anggec, imoc ngabafocngina yeneng hama wiacngina sasawa medacma yenang bangecfu kemma monggoc singtoangac yeneac bung dema faigecde.”

Mikaac kiac ubahodung

⁸ Faka imocac amma ni kiac hodunghodung kiacbade, amma senggang nga hanitehec kembade. Ni katekasi isoc taua kpebade nga mumbabac isoc kiacngotocngotoc kiacbade.

⁹ Imoc yofiac, Samariango hafoangoc manganedarude amma Yehudango ifingoc manganeude. Nga mi hereemanu ngicngacfocna yeneac taong Yerusalaimngo ifingoc manganeude.

¹⁰ Ngabafocnina Gattaonnu kecdae yeni mi edeyunubisia amma ngeni ihai dekiac mi ambisia. Anu Bet Leofra taonnu kecdae ngeni kiacma sendunnu fadung kpebisia.

¹¹ Nga Safir taonnu kecdae ngeni senggang gamekpekpeu membirangemema bangec monnu witicuau kenggecde. Amma damocngo Dzaanang taonnu kecdae yeni ngadeau mi magecde. Nga Bet Edzel taongngo kiac ubahodunnu kecde, ye ngeneac kaso monggoc mi anude.

¹² Kebuarunac ebictoango Yerusalaimgac oda naguyau ifingoc hangemmeude, imocac amma damocngo Marot taonnu kekec dzourau kecdae yeneng wiac gombunga fingerudeac tomai andae.

¹³ Ngicngac damocngo Lakisi taonnu kecdae, ngeni becosic ioha nedziandae yeni keretacfugeng dzegeyunugec mengunu worabisia. Nga Tsiongac ngicngac ngeneng kopocsic hanahegec, ngeni imocac manau kecdae, imoc yofiac, Isracelac singyoac kpekpeac faka imoc ngeneac manau hengfingecgec.

¹⁴ Imocac amma ngeni Moreset Gat taonggac ubangerecac wiac goa yemmema faiyunugec kembisia. Anu Akadzi taongngo Isracelac ngictaufora ikoc ayemmeude.

¹⁵ KEBUNGO yofi dede, “Ni ngic dzikacfu firang anggec, yeni meyunu haba yeneng Maresa taonnu kecdae ngeni memangunuma firang anggecde. Ammanu Isracel yeneac garengenarafocngina yeni kengec worama Adulam taonggac kedzebeu sufugecde.

¹⁶ Ngeni songo nambaracfocngina yeneac amma ubahodunggac orucdzongina wedzecgecde. Ngaba yeneng hama ngenearunac meyunuma bangec monnu witicuau kenggecdeac amma ngeneng kpendzo neng isoc mepotocemebisia.