Mareko 1 - Deduamiti

Yohane dokunadzic

¹ Yomoc Yesu Kristo Anutuac Medac, yeac siduc gombung hanahema fingerec,

² imocac siduc. Profete Yesaiango yofi ohoec, “Negenggec, ni enacdedena sueba yeng waraigemma singga memengere anudeac habesande. (Mkai 3:1)

³ Nga bangeckisiu kpakpac mong yofi fingerude, ‘Ngeni Kebuac sing wisima singa heitumeigec.’ ” (Yes 40:3)

⁴ Yoac imocac sirihau Yohanengo haec. Hama bangeckisiu kecma ngicngac kopocsicngina waudeac ubangina dzigeneu mitidoku nadzicgecdeac edekpou ayemmeec.

⁵ Nga ngicngac yeni Yudaia provins nga Yerusaleng taonnunac amanene yearu kenggec. Kemma kopocsicngina deficgemagec yeng Yodang dokuu namma doku nadzicyemmeec.

⁶ Yohane ye ngakpia kamele dzoeango memea, imoc heima fadenga mong yangseberango memea, imocngo kebangau dzegeec. Amma ye ipua nga kateac kukundzau nekefec.

⁷ Ye ngicngac yoac yofi edekpou ayemmeec, “Ngic neac ngadeu haude, yeac kucngo neac kuc ferahade. Ni ifiango ngonducnema yeac hanitabea witiha yungecba naric mi ngereeude.

⁸ Ni doku nadzicngemmeduae nga yeng hama Tiri Asungo nadzicngemmeude.”

Yesungo mitidoku nadzirec

⁹ Naso imohai Yesungo Nadzarete taong Gariraia bangec wama Yodang dokuu hasikeec. Hasikeu Yohanengo doku nadzicmiec.

¹⁰ Nadzicmiu Yesungo dokuunac eremanu imohaingoc kurumeng anggeu Asungo kebesacac siric amma yearu mau henec.

¹¹ Hemmanu kurumennunac enacudumeng mong yofi fingeru negenec, “Ge neac songomedacna, ni gengsongo anggenduae.”

¹² Nga imohaingoc Asungo Yesu sueu bangeckisiu kenec.

¹³ Kemma uameme 40 kecmanu Satangngo ye tobanggeec. Tobanggeu imohai kateyang yenigoc kecmanu angero yeneng henggareng ammigec.

Yesungo uaya hanaheec

¹⁴ Ngic yeneng Yohane witicamau faigec tacmanu Yesungo Gariraia bangecfu kemma Anutuac siduc gombung edekpou ayemmema

¹⁵ yofi deec, “Naso bic hau Anutuac eucererengngo mewegenengunudeac ngeni ubangina dzigeneu siduc gombung negensinggegec.”

¹⁶ Anu Yesungo Gariraia dzohong tegiau kengkecma Simong nga munea Anderea yerenu yeri uficngira ukuma nanoc. Nocac yeri kondungyang meme ngic.

¹⁷ Yeremma Yesungo yofi edeyuruec, “Ngeri hama modacnuec ngic yeneng kondungyang meandae, ngeri ifi isoc ngicmeme ua meecdeac kpoungemecbade.”

¹⁸ Ifi deu yeri imohaingoc uficngira wama Yesu modaroc.

¹⁹ Nga yeni kapianec kemma Yesungo Dzebedaioac medachora Yakobo nga munea Yohane yerenec. Yeri gombau uficngira memengere amma taroc.

²⁰ Tarec yeng yeremma kpacyuruu yeri negenoc. Negemma imohaingoc mangngira Dzebedaio nga uangicfora gombau tacmagec wayunuma Yesu modaroc.

Asu seuhagoc kisanec

²¹ Anu yeni Kafanaung taonnu kensikegec. Kensikemagec sabata naso anu Yesungo kpekpeturang amau emma Anutuac yoac kpouyemmeec.

²² Kpouyemmeu ngicngac yeneng kpoukpouyoara negemma imoc negenggec engena anec. Ye kpouyemmeec, imoc ngic uakibi mekecdae, yeneac siricfu kuhagoc amma mitiac negen negengngic yeneac dede isoc mi deec.

²³ Anu naso imohaingoc kpekpeturang amau ngic mong asu seuhagocngo tacma arohoec.

²⁴ “Yesu Nadzarete mingina, neneac wiac imoc geac mi ande. Ge memanganenununadeac hanec me? Ni gensiduaenoc, ge Anutuac kpetiac ngic.”

²⁵ Ifi deu Yesungo asu seuhagoc ngaba ammima yofi edeec, “Ge waickema ngicfunac erema kenna!”

²⁶ Ifi deu asu seuhagocngo ngic mekpefac ammima kucgoc arohoma erema kenec.

²⁷ Kenu ngicngac sasawango kerectegec amma yenaocngoc kpesiemegec, “Imoc noc wiac? Imoc kpoukpou gboria nga yeng ua minginaac kuhagoc kpounemmeu asu seuhagoc ifingoc yoac edeyunuu yeni yoara negemma tofohogec.”

²⁸ Nga siduhango Gariraia provinsiu bic kemma sokodarec.

Petoro sefena

²⁹ Anu yeni kpekpeturang amaunac mama Yakobo nga Yohane yerigoc Simong nga Anderea yereac amau kenggec.

³⁰ Kemma enggec, imohai Simong sefena sebigerec ammiu feec, imoc Yesu edegec.

³¹ Edegec Yesungo yearu kemma mariau mema miaru imohaingoc hafeia kpac anu yenenggareng ayemmeec.

Ngicngac homac mengereyunuec

³² Ifi anu wenac kiwa kemeu ama tofore hamanu ngicngac yeneng hafeigoc nga hadehade amma yafinggoc sasawa Yesuaru meyunu kenggec.

³³ Nga taonggac ngicngac sasawa yeni ama naguyau kpedzucnegec.

³⁴ Kpedzucnemagec Yesungo ngicngac hafeingina hania haniagoc mengereyunuma hadehade nga yafingngina homac kporarec. Nga hadehade nga yafing kporacyunuec, yeni haniaya negenggecac yoac degecdeac dederac ayemmeec.

Anutuac yoac deec

³⁵ Anu ama mi wereckemmanu Yesungo kundunnungoc yacma ama wama bangec botuc mong ngiha kpacfu kemma numuec.

^36-37 Numuu Simong nga tosofora yeni ye hofockemma meficgema edegec, “Ngicngac sasawango ge hofocgudae.”

³⁸ Ifi degec yofi edeyunuec, “Nenang taong goa wegenac tackende, imohai ifingoc kemma yoac edekpou ayemmebade. Nocac ua imocnoc mebadeac hadua.”

³⁹ Ifi deu yeni Gariraia bangec yerecge kenggec. Kemma kpekpeturang amasoc yeng yoac edekpou ayemmema hadehade nga yafing kporacyunuec.

Ngic kubecserigoc

⁴⁰ Anu ngic kubecserigoc mongngo yearu hama fafoc heima desambic ammima deec, “Geng negenna naric anu naric medzuacnubang.”

⁴¹ Ifi deu Yesungo ubea manganeu maria sinema ngic kpeserema yofi deec, “Ngereenadeac songona fede.”

⁴² Demanu imohaingoc kubeha mosiu sebia ngereec.

⁴³ Ngereeu Yesungo ngic derahema suema yofi deec,

⁴⁴ “Negenna, sebigau faka fingecdac, imocac ngic mong mi edebesena. Ge womonggareng yearu kemma sebiga edzahema Mosengo seseac deec, imocac sirihau modacma faibesena! Ge ifi faina yeneng sesega hemma negentegecgecde.”

⁴⁵ Ifi deu yeng ine kemma siduc imoc sifu deyadiec. Imocac amma Yesungo taonnu fingec fingec monggoc mi enec. Ye ine ngadeau bangeckisiu kecmanu ngicngac noboc nobocnacngo yearu hakecgec.