Makekeng 36 - Deduamiti

¹ Kebungo Betsalecel nga Oholicaw amma marikibimemengic mariefacgoc ua ifia megecdeac negen negengngina meireckema negen negentegec yemmeu yeneng kpetiac amaac wiac sasawa naric medacma ua mesigecde. Amma yeng Mose yoac dederecge ammiec yeni imoc sasawa modacma ifi medacbisia.”

Ngicngac yeni sese homac mehagec

² Betsalecel nga Oholicaw nga ngic tosea marikibi siriha gombunga megecdeac negen negenggoc kecgec Kebungo ubangina meefaima negengireckegecdeac ayemmeu yeni ubanginango ua imoc hama megecdeac meefaiyunuec. Mose ye ngic imoc amma ngic sasawa marikibi siriha gombungaac negen negengnginagoc kecgec yeni hama ua megecdeac heitaiyunuec.

³ Anu Isracel yeneng womong megecdeac uaac ubangerecac wiac kpedzucnegec Mosengo imoc marikibingic yemmeu megec. Anu ngicngac yeni ine uamemeac asoacsoc ubangerecac wiac homac torokpema yearu mekengkecgec.

⁴ Kecma ngic marikibi ua megecdeac negen negenggoc kecgec yeni sasawa kpetiac amau ua mocgu mocgungo uangina arennu mema kecgec imoc wama

⁵ Mosearu kemma yofi edegec, “Ngicngac yeni wiac mehadae, imoc Kebungo ua menideac dederecge anemmeec, imoc ferahama ebiriangoc bic mehadau.”

⁶ Ifi degec Mosengo yofi dederecge ayemmeec, “Yoac yomoc dekperagigec kporucamabangec sokodacbeso, ‘Ngicngac ngeni kpekpedzucamaac uaac wiac yemmegecdeac ua monggoc mi mebisia nga ubangerecac wiac monggoc mi mehabisia.’ ” Ifi dema ngicngac wiac torokpema mehabauac kpetariyemmegec.

⁷ Nocac wiac bic mehagec imocngo ua megecde imocacsoc anec amma imoc ferahaecngoc.

Kporucwomong megec

⁸ Anu ngic maringina efea sasawa ubanginau uaac negen negeng feyemmeec yeni kporucwomonggac kporuc herea ten linenwitic yumuyumuya pososoc nga witic dorong, giweng nga sacsacngo megec. Marikibiac negen negen ngicngo onga arenggeu yeni kporuc memusunggema imohai keruw ongaac marikibi megec.

⁹ Nga kporuc noboha mocgu mocgu hereayaac kubitkpete twenti eit nga odahaac kubitkpete neackpac anec. Kporuc sasawa imoc yeneac kubitkpetengina mocgungoc memea.

¹⁰ Amma yeni kporuc herea marimong ifi torokpeyunugec mocgu anggec nga herea marimong tacgec imoc ifingoc torokpeyunugec mocgungoc andacgec.

¹¹ Amma yeni kporuc kpedzucnegec imocac tegiau yombong kambac kambac witic dorongngo memea faigec kporuc kpedzuc kpedzucnea monggac tegiau yombong ifingoc faigec tarec.

¹² Nga kporuc monggac kambac kambac witicngo memea fifti nga ogea monggac tegiau ifingoc kambac kambac fifti faigec. Ifi anu kambac kambac witic imoc kporuc noboc nga noboc socfungoc nangkenec.

¹³ Amma yeni honac fifti golngo mema imocngo kporuc noboha yohockang kpeturangyurugec kporucwomong mocgu anec.

Kporucwomonggac kporucama megec

¹⁴ Anu kporucwomonggac kporucama fingerudeac kporuc noboha ileven imoc noning dzoeyango megec.

¹⁵ Kporuc noboha tembuc tembuc hereanginaac kubitkpete teti nga wegenanginaac kubitkpete neackpac anec. Kporuc noboha ileven imoc yeni kpetengina mocgungoc.

¹⁶ Nga yeni kporuc marimong torokpeyunugec mocgutoa anu kporuc noboha siks ifingoc torokpeyunugec kpoructoa mocgu anggec.

¹⁷ Torokpeyunuma kambac kambac witicngo memea fifti imoc kpoructoa mocguac wisic wisickeaac tegiau faikenec nga kambac kambac witicngo memea fiftingoc kpoructoa monggac tegiau ifingoc faikenec.

¹⁸ Amma kporuc torokpegec mocgu anudeac aieng sacsacngo honac fifti megec.

¹⁹ Amma kporucama semegecdeac ramangiwaac sebera sacsacngo mema dolfin kondungyanggac sebera mema imoc kporucac witiau faigec semeec.

Fombong megec

²⁰ Anu kporucwomonggac fombong hongoc nanggecdemoc imoc akasia icngo megec.

²¹ Fombong mocgu mocgu imoc hereayaac kubitkpete ten amma odahaac kubitkpete mocgu nga noboha, kubitkpete nobocnac noboc imocac siriha mocgungoc anec.

²² Anu yeni fombonnu kping yohockang yohockang faigec feu sasawa nericyunugec mocgu andacgec. Kporucwomonggac fombong sasawa ifi megec.

²³ Anu kporucwomonggac fombong twenti imoc sautbigenggac negemma megec.

²⁴ Nga fombong twenti yeneac bagenginau kpingngina hania yohockang yohockanggacsoc foti imocngo meserigec nanudeac silwango megec.

²⁵ Amma kporucwomonggac tegia notbigenggac fombong twenti faigec.

²⁶ Nga imocac bageau hania yohockang yohockang foti silwango megec.

²⁷ Nga kporucwomonggac ngadeau wenac keme kemeaubigenggac fombong siks megec.

²⁸ Nga kporucwomonggac tuturunga ngadeau imocac fombong yohockang megec.

²⁹ Anu fombong imoc emuhanac emma wi kpeturanggema nanec kambac kambac mocgungo torokpeyuruec. Tuturunga yohockannu fombong yohockang ifi sasawa medacgec.

³⁰ Imoc fombong eit nga yeneac haningina sikstin silwango memea, mocguac bageau yohockang yohockang, ifi fingerec.

Memeseriac icsira megec

³¹ Anu akasia icngo kporucwomonggac tegiau noboc meserigecdeac icsira marimong faigec

³² amma kporucwomonggac nonggea noboc imocac ifingoc marimong nga manau wenac keme kemeaubigenggac ifingoc marimong faigec.

³³ Anu memeseri botuhau nonggea nobocnac noboc kenudeac megec.

³⁴ Mema icsira sasawa golngo gborocyunuma kambac kambac golngo mema memeseria golngo gborocyunudacgec.

³⁵ Anu marikibingic yeneng witic kibia dorong, giweng nga sacsac nga linenkporuc pososoc yumuyumuya mema mana kpetiac nga kpataning yombonggac kpoructoa megec imohai keruwac onga memusunggema megec.

³⁶ Amma icsira herea hafoangoc neackpac akasia icngo mema golngo gborocyunuma honacngina golngo mema silwa gerea hetinggegec patatakeu hania neackpac megec.

³⁷ Anu kporucamaac naguac kporuc imoc witic kibia dorong, giweng nga sacsac amma linenkporuc pososoc yumuyumuyango memusunggema megec kibi kibi anec.

³⁸ Mema icsira herea hafoangoc marimong amma imoc yeneac honacngina nga ic witinginau kunengngina nga witicngina mema golngo gborocyunudacma haningina marimong aieng sacsacngo megec.