Makekeng 35 - Deduamiti

Tacnegeng tatacac dederecgeyoac

¹ Mose ye Isracelkpebung hafoangoc kpedzucyunudacma yofi edeyunuec, “Kebungo ngeni yoac yomoc modacgecdeac dederecge angemmeec.

² Wenac uameme siks ihai ua mebisia nga wenac kpete sewen imoc tacnegennasongina kpetiac, imohai Kebu eweheihei ammima hafoangoc tacnegembisia. Mocgu mocgu sasawa yeni wenac imohai ua megecdeu yeni homecfu faiyunubesonga.

³ Nga ngeni dahai dahai kecdaemoc tacnegennasou amanginau gerec mong mi figec dzebeso.”

Kebuac seseac dederecgeyoac

⁴ Anu Mose ye Isracelkpebung hafoangoc yofi edeyunuec, “Kebungo faka yomoc modacgecdeac dederecge angngemmede.

⁵ Ngeni tembuc tembuc sasawango wiac fengemmede imohacnac goa songogoc mema Kebuac sese faibisia. Nga ngeni sasawango ubangerecgoc Kebuac sese imoc gol nga silwa amma aieng sacsac,

⁶ witic dorong, giweng, sacsac nga linenwitic pososoc nga noning dzoeya,

⁷ amma ramangiwaac sebera sacsac nga dolfin kondungyanggac sebera nga ic kpara akasia,

⁸ amma kifanananggaac kerecdoku, semeng uaunac wiac homuna gombunga imoc nadzic nadzicac kerecdoku nga hosuc homungkerenggac kerec homuna gombunga negemma mehama,

⁹ oniks hoc nga hoc goa seria buma kuneng kpetiac uaac masecngakpiu amma mokucac kasou faigecdeac negemma mehabisia.

Marikibimemengic

¹⁰ Amma ngeneac botucnginau marikibimemengic ua hania hania negendae yeni hama Kebungo wiac dederecge anemmeec, imoc medacbisia.

¹¹ Imoc womong kporucamayagoc nga kperaha nga honac nga fombong nga memeseriac ic odaha nga hongngoc nga icsira herea hafoangoc amma haningina

¹² amma katapa tofoyagoc nga tapea nga mana kpetiac nga kpataning yombonggac kpoructoa hedzickema nanudemoc

¹³ amma tatac tofoyagoc nga imocac wiara sasawa nga Kebungo nenigoc kecdeac icsogong;

¹⁴ amma kifanananga kperagi miude imocac wiara nga kifaya nga kifaac kerecdoku;

¹⁵ amma hosuc homungkerenggac oho oho arata tofoyagoc amma nadzicmigecdeac kerecdoku nga hosuc homungkerenggac kerec homuna gombunga nga kporucwomong naguac kporuc

¹⁶ amma sesegerec hafoangoc oho ohoac arata nga imocac waiac aieng sacsacngo memea nga tofoya amma imocac wiara sasawa nga dokutera kunengtoa haniagoc,

¹⁷ amma oda manau nga ngadeau yerecgedarudeac kporuc nga imocac icsira herea hafoangoc nga haningina amma odanaguac kporuc,

¹⁸ amma kporucwomonggac kping nga totong manau kporucamaac kping seria witicnginagoc;

¹⁹ amma kpetiac amau womonggareng ua megecdeac wamba nga Aharon nga medacfora yeni womonggareng uangina megecde yeneac kpetiac kekecac wambangina.”

Wiac mehagec

²⁰ Yoac ifi edeyunuu Isracelkpebung hafoangoc yeni Mosearunac meickema kenggec.

²¹ Kemma yenearunac tembuc tembuc sasawa wosoefac fingecyemmeecsoc, ngicngac imoc yeni ongaasunginango ayemmeu yeni ubangerecgoc dzigenema Kebugoc ewacemeemeac kporucama nga imocac uaac wiac sasawa nga kpetiac wamba imocac wiac Kebuac sese dema mehadacgec.

²² Anu ngic nga ngac yeni mocgu mocgu sasasawango ubanginau songo fingerecsoc puri nga samacac nga kedzacac wiac kambac kambac nga gbonggac wiac kambac kambac ongeagoc nga sibuc, imoc kicnginau songo meficgeudeac wiac golngo memea tembuc tembuc sasawa yeni Kebuac sese dema mehadacgec.

²³ Amma ngicngac mocgu mocgu sasawango witic dorong, giweng, sacsac feyemmeec yeni imoc momoc mehadacgec. Amma linenwitic gombunga sacsac amma noning dzoeya nga ramangiwaac sebera pereckea nga dolfin kondungyanggac sebera feyemmeec yeni imoc sasawa mehadacgec.

²⁴ Nga silwa nga aieng sacsac feyemmeec yeni imoc ifingoc Kebuac sese dema mehadacgec. Amma uaac negemma akasia ic feyemmeec yeni tembuc tembuc sasawango imoc ifingoc mehagec.

²⁵ Anu ngac witic yumuyumu ua negenggec yeni witic dorong nga giweng nga sacsac amma linenwitic pososoc maringinango yumuma imoc mehadacgec.

²⁶ Nga ngac goa noning dzoeyango uamemeac negen negengnginagoc yeni ifingoc ubanginau uaac songo fingecyemmeu imoc yumuma mehadacgec.

²⁷ Anu ngicenara yeni oniks hoc buma kuneng nga hoc tosea buma kuneng kpetiac uaac masecngakpi nga mokucac kaso, imohai arenggegecdeac negemma mehama faidacgec.

²⁸ Nga wiac homuna gombunga nga kifaac kerecdoku nga nadzic nadzicac kerecdoku amma hosuc homungkereng megecdeac wiac sopea homuna gombunga imoc momoc faidacgec.

²⁹ Ifi anu Isracelngicngac sasawa yeni Kebungo ua megecdeac Mose dederecge ammiec, imocac wiac imoc ubangina meefaiyunuecsoc ubaefacgoc Kebuac sese mehadacgec.

Betsalecel nga Oholicaw uau faiyurugec

³⁰ Anu Mose ye Isracelngicngac yofi edeyunuec, “Hendae, Kebungo Yehudaac kisicfunac Uriac medac Hurac esea kpara Betsalecel ye meisinggeec.

³¹ Meisinggema Anutuac Asungo mewakeu negen negenga ireckeu negen negentegecgoc anu ye ua hania hania meudeac negen negengagoc anudeac ifi ammiec.

³² Ammiu yeng gol silwa nga aieng sacsacngo marikibi ua gombunga arenggema imoc sasawa naric meude.

³³ Yeng hoc seria naric mesorongaiyunuu pirac pirac anggecde amma icfu onga nganoc naric mendzirude nga marikibi uaarenga arenga maringo naricngoc meude.

³⁴ Nga Danggac kisicfunac Ahisamakac medac kpara Oholicaw, yeng yegoc ngic goa ua imoc kpouyemmeecdeac negen negengyecmeec.

³⁵ Amma ye marikibiac negen negeng nga negen negentegecngo mewakeyuruu yeri icfu mendzic mendzic ua hania hania naric meecde. Yeri ifingoc witic dorong nga giweng nga sacsacngo amma linenwitic pososocngo kporuc onganginagoc memusunggeec kibi kibi anu kporuc siricngina gombunga gombunga naric meecde. Yeri marikibi ua gboria naric arenggema ua sasawa ifia meecde.