Makekeng 33 - Deduamiti

Kebungo Isracelngicngac Sinai tiki wagecdeac edeyunuec

¹ Kebungo Mose yofi edeec, “Ge nga ngicngacareng Aigitabangecfunac meyunuma hesicyunu hadang, ngeni kporucamabangec yomoc wama kengkecma Awraham, Itsak nga Yacakow bangec yemmebadeac deseriai, imohai kembisia. Nga ni bangec yomoc ngeneac bangecfocngina yemmebade.

² Ni angerona mong sueba yeng waraigemma kenacanngic Amoringic, hittingic, peridzingic, hiwingic nga yewusingic meicyunuude.

³ Meicyunuma ngeni bangec namu nga hanifosoc doku isoc hakecde, imohai hesicngunuu kenggecde. Nga ngeni ngicngacareng ubaseri andaeac sinnu kemma memanganengunubaiac ni ngenigoc mi kembade.”

⁴ Ifi deu ngicngac yeni yoac ebiria imoc negemma ubahodunggoc kecma ringgedangngina mi heigec.

⁵ Anu Kebungo Mose yofi edeec, “Ge Isracel medacfora yofi edeyununa, ‘Ngeni ngicngac ubaseri yombong, ni naso wegenanec me naso mocgu ngeneac botucfu kecma memanganengunuba kpacambauac. Imocac amma ringnganoc heiandae imoc meickedacbisia. Meickegec dafi angemmebade, imocac negengising ambesare.’ ”

⁶ Ifi deu Isracel medacfora yeni Horew tikiungoc ringgedangngina heikecgec imoc meickedacgec.

Kpekpedzucac kporucama

⁷ Anu nasosoc Isracel yeni yacma monnu kemma takecgec, naso imohai Mose ye kporucama kpara kpekpedzucac kporucama kparecmoc imoc ngicngac yeneac kporucamabangecac ngadeau hereau isoc kpedzikefec. Nga yeni tembuc tembuc sasawango kpesi kpesi faigec Kebungo yoac deu negenggecdeac kporucamabangecnginaac ngadeau kpekpedzucac kporucamau kengkefec.

⁸ Anu Mose ye kporucama imohai enudeac kengkefec naso imohai ngicngac tembuc tembuc sasawa yeni kporucamangina naguyasoc namma kic fima hemmodacgec kemma kporucama imohai engkefec.

⁹ Emmanu hoeng hereango mama kporucamaac naguyau hedzickema nammanu Kebungo Mosegoc denegeng angkefec.

¹⁰ Nga ngicngac tembuc tembuc sasawa yeni hoeng herea kporucamaac naguyau nanu hemma kporucamangina naguyausoc namma Anutu dengerekecgec.

¹¹ Anu Kebungo Mosegoc ngic mongngo ogeagoc engemma namma yoacyoac angandape, ifi isoc yoacyoac angkefoc. Amma Mose ye monggoc dzigenema hau memefiha sebigborimedac Nun medaha Yehosuac, ye kporucama mana mi wama imohai kefec.

Kebungo yenigocngoc kefudeac deseriec

¹² Anu Mose ye Kebu yofi edeec, “Ge ngicngacareng yomoc meyunuma hesicyunu kembadeac edenunec nga merac suena nigoc kendede, imoc ine mi edenuannec. Amma yofi denec, ‘Ni kpacga negenduae nga geac negemba ngereede.’

¹³ Imocac ge neac negenna naric andeu negenggubadeac singga naric edzacnuma torokpema neac negenna ngereebeso. Nga bangecareng yomoc yeni geac ngicngacareng, ifi negensiyunubesena.”

¹⁴ Ifi deu Kebungo yofi meremmiec, “Neac kicmesunango gegoc kenude nga neng kecnegeng gembade.”

¹⁵ Ifi deu Mosengo yofi meremmiec, “Ge geangga nenigoc mi kennadeac negennecfu kpetarinemmena yomohanac mi kembisina.

¹⁶ Nga ge neac negenna ngereede imoc negembadeac edzacnunubesena. Ge bangectoa bangecac kicfu ni nga ngicngacfocga nenigoc kenna. Ifi anna ngicngacareng sasawa yofi negenggecde, neni siricnina mong andimbe.”

¹⁷ Ifi deu Kebungo Mose yofi edeec, “Ni geac negemba ngereede nga kpacga negenduae, imocac amma ge yoac dedang, imoc andacbade.”

¹⁸ Ifi deu Mosengo deec, “Ge yaguc kuc kperagiga edzacnuna hemba.”

¹⁹ Ifi deu Kebungo yofi deec, “Neac gombungana gearu hama hoanggau feracgubade amma kpacna Kebu imoc kpacba negennade. Ni mong danggunucna mibadeac negemma, ye mibade nga monggac ubamangang ammibeso negenduae, ye ubamangang ammibade.

²⁰ Amma wiac mocgu imoc yofi, ngic mongngo neac kicmesuna hemma naric mi kefudeac ge kicmesuna naric mi hennade.”

²¹ Kebungo ifi dema torokpema yofi deec, “Negennec, neac wegenacnau hoc mong nande, ge imocac witiau emma nambesena.

²² Nammana ni hoc kedzebeac singau faiguma marinango semeguma kuckperaginagoc hama feracguma kembade.

²³ Kemma marina meickeba ngadena hennade nga kicmesuna ine naric mi hennade.”