Makekeng 31 - Deduamiti

Betsalecel nga Oholicaw

¹ Kebungo Mose yofi edeec,

² “Negennec, ni Yehuda kisicfunac Hurac medaha Uri esea kpara Betsalecel, meisinggeai.

³ Meisinggema Anutuac Asungo mewakeba yeng ua hania hania meu gombunga fingerude nga ye negen negentegecgoc amma negen negenggoc amma maringo ua hania hania dafi mebesonga negengireckema

⁴ gol, silwa nga aieng sacsacngo ua imoc naric meude.

⁵ Nga ye ua arenggema hoc mengerema fau onga gombunga fingerude amma icfu onga mema marikibi ua sasawa naric meude.

⁶ Nga negennec, ni Danggac kisicfunac Ahisamacac medaha Oholicaw meisinggeai, yeng yeac marimefic amma ua mebeso. Anu ni ifingoc marikibimeme sasawa marikibi megecdeac negen negeng ubanginau bic faiduaac wiac menadeac bic dederecge anggenai imoc yeni naric medacgecde.

⁷ Yeni Kebugoc ewacemeemeac kporucama nga Kebungo wiac heigboringemmekecduaeac katapa nga tapea imocac witiau nga kporucamaac wiac sasawa mebisia.

⁸ Mema tatac nga wiara sasawa amma kifananang goltegengngo memea nga wiara sasawa amma hosuc homungkerenggac arata mema

⁹ sesegerec hafoangoc dzeudeac arata nga wiara sasawa amma tera kunengtoa haniagoc mebisia.

¹⁰ Amma womonggareng Aharonggac wamba kpetiac nga medacfora yeneac womonggarenggac wamba imoc kporucngo memea mebisia.

¹¹ Mema hosogecdeac kerecdokuya amma womonggac hosuc homungkerenggac kereha mebisia. Wiac imoc sasawa menadeac dederecge anggenai yeneng ua imoc ifi yombong medacbisia.”

Tacnegennasoac dederecgeyoac

¹² Anu Kebungo Mose yofi edeec,

¹³ “Ge Isracel medacfora yofi edeyunubesena, ‘Ngeni neac tacnegennaso tacbisia. Nocac kpete imocngo ni nga ngeni amma fingecsahengina feengkefudesoc nenang botucfu ifi feengkecbeso. Ifi anggec yofi negemma kecgecde, ni Kebu, neng kpetiac anggecdeac desingunuma kecduae.

¹⁴ Tacnegennaso imoc ngeneac kpetiacnaso andeac nasotoa imoc tacbisia. Mocgu mocgu sasawango tacnegennaso imoc kpetiac mi anudeac negemma ua mong meudeu ye homecfu faibesonga. Imoc yofiac, mong ye wenac imohai ua meudeu ye ngicngacfora yeneac botucfunac meickema homecfu faibesonga.

¹⁵ Ngeni uameme siksfu ua mebisia nga wenac kpete sewen imoc Kebuac tacnegeng fingerudeac tacbisia. Tacnegennaso imoc Kebuac naso kpetiac desi desia. Mocgu mocgu sasawango tacnegennasou ua mong meudeu ye imocac turunga homecfu faibesonga.

¹⁶ Imocac Isracelngicngac yeni tacnegennasou nasotoa tacbisia nga arengfocngina fingecsahengina feengkefudesoc tacnegennasou takecbisia. Dzadzahac imoc nasoya nasoya feengkecbesande.

¹⁷ Amma ni nga Isracelngicngac botucninau kpete imoc faiba feengkecbeso. Nocac Kebungo wenac uameme mocgu kemma siks imohai kurumenga kurumenga nga bangec meyunuec amma wenac kpete sewen imohai ine tacnegenec.’ ”

¹⁸ Anu Kebungo Mosegoc sinai tikiu yoac ifi denegeng anec wisickeu yeng Kebungo wiac heigboringemmekecduaeac tafe yohockang hocngo memea miec. Anutu gbongango yoara tafe imohai mendzirec. Kebungo Mosegoc sinai tikiu yoac ifi denegeng anec wisickeu yeng Kebungo wiac heigboringemmekecduaeac tafe yohockang hocngo memea miec. Anutu gbongango yoara tafe imohai mendzirec.