Makekeng 30 - Deduamiti

Hosuc homung oho ohoac arataac dederecgeyoac

¹ Akasia icngo hosuc homungkereng ohogecdeac arata mong mebesena.

² Imoc hereayaac kubitkpete mocgu nga odahaac kubitkpete mocgungoc nga tegia sasawa socfungoc andacbisia. Honga emuhacnac wi kubitkpete yohockang mema baiha aratagoc mefosoebesena.

³ Nga goltegengngo tapea wi gborockedacma tegia sasawa wihanac emu made imoc yerecgedacma semedacma baiha momoc semeyunubesena. Amma tegia mong golngo mena yerecgebeso.

⁴ Amma kambac kambac yohockang golngo mema tegiaac bageau noboc nga noboc faiyurubesena. Imoc yofi, tegia yohockannu noboc nga noboc faiyuruna arata tofohogecdeac tofoya manau faigec imohai arata tofohobisia.

⁵ Tofoya imoc akasia icngo mema imoc golngo gborocyurubesena.

⁶ Amma mana kpetiac nga kpataning yombonggac kpoructoa Kebungo wiac heigboringemmekecduaeac katapa hedzickede imocac fanihau arata faina nanu. Imocngo katapa witiau tapea tarude imocac hoangau faina nambeso. Anu ni imohai gegoc ewacemekecdede.

⁷ Anu Aharon ye asoacsoc kifa memengere amma arata imocac witiau hosuc homungkereng ohokecbeso.

⁸ Amma ama toforebeso ammanu ye kifa tatacnginau faiyunuma kpedzereckeu dzeu hosuc homungkereng ohokecbeso. Imoc ifi wenacsoc angkefu hosuc homungkerenggac sese imocngo Kebuac kicfu fingecsahengina feengkefudesoc fekecbeso.

⁹ Ngeni Arata imohai sese dema hosuc homuna gombunga siriha mong kpaeyagoc mi faibisia. Nga sesegerec hafoangoc oho oho me seseac yaka imohai mi faibisia nga seseac doku imohai mi hetinggebisia.

¹⁰ Anu Aharon ye ruae fingerudeac dema ngaba meic meicke ua kifaacsoc naso mocgu baihau mekecbeso. Ye kopocsic nga ngaba meic meickeac seseac sac mema ruae fingerudeac ngaba meic meicke ua kifasoc naso mocgu mebeso. Faka imoc fingecsahengina feengkefudesoc fekecbeso. Wiac imocngo Kebuac kicfu wiac kpetiac nga kpataning yombong ande.

Kekecac seseac dederecgeyoac

¹¹ Anu Kebungo Mose yofi edeec,

¹² “Ge Isracel medacfora wasaiarennu torokpeyunugecdeac negemma uangicfocga edeyununa yeneng kpetengina mebisia. Nga yeni kpetengina megecde, imohai hafeitoango kpetememenasou yunubaac imocac ngic tembuc tembuc sasawango kekehaac turung kpoukpouac dzo Kebu mibeso.

¹³ Nga kpetengina megecdeac dedea yeni tembuc tembuc sasawango sese dema shekelkpete ½ Kebu mibisia. Imocngo kpetiac amaac shekelkpeteac ebihaac isoc ambeso. (Shekelkpete mocgu imoc gerakpete twenti.)

¹⁴ Amma ngic medac kifangina 20 namma ende, yeneac kpetengina mebesonga anu yeni tembuc tembuc sasawango Kebuac sese dema imoc faidacbisia.

¹⁵ Nga sese kekecnginaac turunga dema migecde imohai ngic dzofinacnginagoc shekelkpete ½ ferahema mi mibeso amma dzofinaha kpac yeng imocac bageau mi mibeso.

¹⁶ Nga ge dzo imoc Isracel medacfora yenearunac mema Kebugoc ewacemeemeac kporucamaac uangic yemmebesena. Imoc yofiac, ua imoc megec Kebuac kicfu fingeru yeng Isracel medacfora ngeneac negensima turung kpoukpouac dzo imoc bic faifaia, ifi negenude.”

Hanimari dzuacgecdeac dederecgeyoac

¹⁷ Anu Kebungo Mose yofi edeec,

¹⁸ “Ge aieng sacsacngo doku nadzicgecdeac tera kunengtoa mong haniagoc mebesena. Ge imoc Kebugoc ewacemeemeac kporucama nga arata botucngirau heina taru doku kpakena kemebeso.

¹⁹ Anu Aharon nga medacfora yeni doku imohacnac fima hanimaringina dzuacbisia.

²⁰ Yeni Kebugoc ewacemeemeac kporucamau enggecde me arata mewegenema Kebuac sesegerec hafoangoc ohogecdeac enactofoc tofoho ua mema homebauac imoc sasawa doku nadzicma ua mebisia.

²¹ Yeni homebauac hanimaringina dzuacbisia. Singseria imocngo fingecsahengina feengkefudesoc yenearu feengkecbeso.”

Kerecdoku kpetiacac dederecgeyoac

²² Anu Kebungo Mose yofi edeec,

²³ “Ge wiac songeagoc homuna gombunga yombong yakau faiandae nga sebinginau hosoandae imoc mebesena, imoc yofi, Mira dokuya shekelkpete 500 nga mosoki homuna gombunga shekelkpete imocac noboha, imoc shekelkpete 250 amma kalmus homuna gombunga shekelkpete 250 mebesena.

²⁴ Mema kassia shekelkpete 500 kpetiac amaac sirihau nga oliwa kerecdoku hinkpete mocgu mebesena.

²⁵ Imoc sasawa mema kerecdoku kpetiac imocgoc mebesena. Uamemengic yeneng kerecdoku mema wiac homuna gombunga yombong imohai yerecgeandae, ge imoc ifi yombong mena kerecdoku kpetiac fingecbeso.

²⁶ Anu imocngo Kebugoc ewacemeemeac kporucama nga Kebungo wiac heigboringemmekecduaeac katapa nadzicyecmebesena.

²⁷ Amma tatac nga wiara sasawa amma kifanananga nga wiara sasawa nga hosuc homungkerenggac arata

²⁸ amma sesegerec hafoangoc oho ohoac arata nga imocac wiara sasawa amma wisic wisickeau tera kunengtoa haniagoc, wiac imoc sasawa nadzicyemmedacbesena.

²⁹ Wiac imoc kpetiac nga kpataning yombong anggecdeac ge ifi desima nadzicyemmebesena. Anu ngicngac tembuc tembuc sasawango wiac imoc kpesereyunugecde yeni kpetiac anggecde.

³⁰ Ifi amma Aharon nga medacfora kerecdoku nadzicyemmema desiyununa yeni kpetiac amma neac womonggareng ua mekecbisia.

³¹ Nga Isracel medacfora yofi edeyunubesena, ‘Fingecsahengina fingecenggecdesoc hosogecdeac kerecdoku kpetiac imocngo neac anude.

³² Anu imoc ngic monggac sebiu mi hosobisia nga ngenang kerec ifia isoc mong mi mebisia. Imoc kpetiacac amma ngeni negenggec kpetiac ambeso.

³³ Nga ngic mong ye kerecdoku mong ifia isoc yerecgema ngic mong yeac mi dedeau hosoudeu, ye arengfora yenearunac meickebeso.’ ”

Hosuc homungkerengagocac dederecgeyoac

³⁴ Anu Kebungo Mose yofi edeec, “Ge wiac homuna gombunga yomoc mena, stakt, h oniha, i galbanum amma frankinsens k gombunga. Mema wiac imohacnac kpetea socfungoc mema

³⁵ yofi ambesena, hosuc homuna gombungaac uamemengicngo hosuc homuna gombunga meandae, ge wiac imoc mema imocngo hosuc homungkereng ifi mena imoc kondungagoc amma kpetiac nga kongaha ambeso.

³⁶ Anu ge imohacnac goa kpedzamena wit uha isoc anu imocac toseabisic Kebugocewacemeemeac kporucamau Kebungo wiac heigboringemmekecduaeac wiac tacde, imocac fanihau faina tacbeso. Taru ni gegoc imohaiewacdede. Wiac imoc negenggec kpetiac nga kpataning yombong ambeso.

³⁷ Nga hosuc homungkereng ifi yerec yerecgea imoc ngeni ngenanggac negemma mi mebisia. Ge yofi negenkecbesena, imoc geac nga Kebuac kicfu kpetiac yombong angkecbeso.

³⁸ Nga mong ye yengenaoc wiac homunagoc eng negenudeac ifia isoc meudeu ye arengfora yenearunac meickebesonga.”