Makekeng 27 - Deduamiti

Arataac dederecgeyoac

¹ Ge arata akasia icngo menade, imoc hereayaac kubit marimong nga odahaac kubit marimongngoc amma tegia sasawa socfungoc ambisia. Amma emuhacnac wi enude imoc kubitkpete harebec ambeso.

² Nga tuturunga neackpac imohai baiha mebesena. Imoc yofi, baic imoc arataac icgoc mefosoeyununa mocgu anggec aieng sacsacngo gborockebesena.

³ Amma hama meickenadeac teraya, sapaha, sokoha nga saraha amma gerecac teraya, uaac wiac sasawa imoc aieng sacsacngo mebesena.

⁴ Ifi mema arataac waiac aieng sacsacngo mema waiaac tuturunga neackpac imohai kambac kambac neackpacngoc faibesena.

⁵ Nga imoc arata manau memeseriac bageau faina waiac imoc arata botuhau febeso.

⁶ Amma arataac tofo imoc akasia icngo mema aieng sacsacngo gborocyurudacma

⁷ tofo kambac kambac manau faigec tegiau tarec imohai arata tofohogecde.

⁸ Ge arata parangngo mena sawaya manau fingecbeso. Tikiu onga edzacguai ifi isoc yombong mebesena.

Kporucwomonggac sobenggac dederecgeyoac

⁹ Ge kporucwomonggac sobeng mong yofi mebesena. Kporucwomonggac tegia sautbigeng totong kpenadeac kporuc linen pososocngo yumuyumuyango memea imocac tegia mocguac kporuc yeni hereangina kubitkpete 100 ambeso.

¹⁰ Nga totonggac icsira herea hafoangoc imoc yeni twenti ambisia nga haningina aieng sacsacngo memea imoc ifingoc twentingoc ambisia. Anu icsira herea imocac honac nga witic imoc ine silwango mebesonga.

¹¹ Anu tegia herea nortbigeng ifi isocngoc kporuc hereanginaac kubitkpete 100 mebeso. Nga icsira herea hafoangoc twenti nga haningina twenti aieng sacsacngo mema icsira hereaac honac nga witic imoc silwango mebesonga.

¹² Anu wenac keme kemeaubigeng sobeng totong manau tegia imocac kporuc hereanginaac kubit fifti ambeso nga imocac ic herea ten amma haningina ten ifingoc mebisia.

¹³ Nga wenac ere ereaubigeng, kporucwomonggac kiwau sobeng totong manau tegia nobocnac noboc imocac kubitkpete fiftingoc ambeso.

¹⁴ Nga kporuc noboc noboc faigecde imoc yeri yofi ambesera, hereanginaac kubitkpete 15 ambisia. Amma icsira herea hafoangoc harebec nga haningina harebecngoc ambisia.

¹⁵ Nga tegia yohockang imocac kporuc hereaya ifingoc kubit 15 amma imocac icsira herea hafoangoc harebec ambisia nga haningina harebecngoc andacbisia.

Totong naguac kporuc

¹⁶ Anu totong naguac kporuc megecde imocac hereayaac kubit twenti ambeso. Kporuc imoc witic dorong, giweng nga sacsac amma linenwitic pososoc yumuyumuyango memusunggema megec kibi kibi ambeso. Nga imocac icsira herea hafoangoc neackpac haningina neackpacngoc mebeso.

¹⁷ Icsira herea hafoangoc sasawa sobeng totong manau yeni witic nga honacngina silwango mema haningina aieng sacsacngo faibesonga.

¹⁸ Nga kporuc sobeng totong manau imoc hereayaac kubitkpete handred amma odahaac fifti ambeso. Amma wihacnac madeac kubitkpete imoc marimong. Imoc linen pososoc yumuyumuyango mema ic haningina aieng sacsacngo mebesonga.

¹⁹ Anu kporucwomonggac ua imocac wiac sasawa nga witihaac kping seria amma sobenggac totong imocac kping imoc aieng sacsacngo medacbisia.

Kifaac dederecgeyoac

²⁰ Anu ge Isracelngicngac dederecge ayemmena yeni kifa haniaac negemma oliwa medzamema kerecdokuya mema hagec imocngo kifa kperagi tatahoc dzeudeac miackebisia.

²¹ Anu Kebugoc ewacemeemeac kporucamau Kebungo wiac heigboringemmekecduaeac wiac mana kpetiac nga kpataning yombonggac kpoructoaac ngadeau, imohai Aharon nga medacfora yeni tofocnacfunac kecma asoac Kebu neac kicfu kifa imoc garenggekecbisia. Singseringina imocngo Isracelac fingecsahe feengkefudesoc ngenearu feengkecbeso.