Makekeng 26 - Deduamiti

Kporucwomonggac dederecgeyoac

¹ Kporucwomong imoc kporuc herea 10ngo mebesena. Kporuc imoc linen pososoc yumuyumuyango mema witic kibia dorong nga giweng amma sacsac yombong mema imoc mebesena. Nga marikibimemeac negen negengngic meyununa yeneng kporucfu keruw onga memusunggema mebisia.

² Nga kporuc mocgu mocguac hereanginaac kpete imoc kubit 28 nga odacnginaac kpete imoc kubit neackpac ambeso nga kporuc sasawa imoc kpetengina siriha mocgungoc ambisia.

³ Kporuc marimong torokpema marimong ifingoc torokpebisia.

⁴ Torokpegec ge witic dorongngo kambac kambac mema imoc kporuc tegiau torokpema kporuc ogeau torokpedang imocac tegiau ifingoc faibesena.

⁵ Kambac kambac witicngo memea kporuc monnu imohai fifti faibesena nga kporuc ogeaac torokpegecdemoc imocac tegiau ifi isocngoc kambac kambac witicngo memea fiftingoc faibesena. Ge kporuc noboc nga noboc momoc faibesena.

⁶ Faima honac fifti golngo mema kporuc yohockanggaru torokpeyuruna kporucwomongngo mocgu ambeso.

Kporucamaac dederecgeyoac

⁷ Anu kporucwomonggac kporucama fingerudeac ge kporuc ilewen noning dzoeyango mebesena.

⁸ Nga kporuc mocgu mocgu imoc hereanginaac kpete imoc kubit 30 ambeso nga odacnginaac kpete imoc kubit neackpac. Nga kporuc ilewen yeneac kpetengina sasawa imoc siricngina mocgu ambeso.

⁹ Kporuc marimong torokpeyununa mocgu andacgec siks ifingoc torokpeyununa mocgungoc anggec kporuc kpete siks imoc kporuc hanac hanaheaac witiau faina kporucamaac kiwau nambeso.

¹⁰ Nga toro torokpea monggac tegiau edi imohai kambac kambac witicngo memea fifti faibesena. Faima kporuc toroc torockpea monggac tegiau kambac kambac fiftingoc faibesena.

¹¹ Faima honac aieng sacsacngo mema kambac kambac imohai torokpena kporucama mocgu hafoangoc anude.

¹² Nga kporuc tosea noboha kporucama ferahema nande, imoc kporucwomonggac ngadea kperahama febeso.

¹³ Anu kpete mocgu imohacnac kporuc tosea kubitkpete mocgu amaac kpete ferahema nanude, imoc kporucama tegia nobocnac ferecgema nobocfu gbedickegec nanu kporucwomong kperahadacbeso.

¹⁴ Nga kporucama kperahenadeac ge ramangiwaac sebera sacsac nga imocac witiau dolfin kondungyanggac seberango wihacnac emu kperahedacbesena.

Fombonggac dederecgeyoac

¹⁵ Anu kporucwomonggac fombong sasawa hongngoc nanggecde imoc akasia icngo mebesena.

¹⁶ Imoc hereanginaac kubitkpete 10 amma odacnginaac kubitkpete mocgu nga noboha ambeso.

¹⁷ Nga fombong sasawa nericyununade, imoc kping yohockangngo meseriyunubesena. Fombong sasawa imoc ifi medacbesena.

¹⁸ Hanahema kporucwomonggac tegia soutbigenggac fombong twenti faibesena.

¹⁹ Nga haningina silwango foti mema fombong twenti bagengina imohai monggac haniau kping yohockang yohockanggacsoc ifi hania yohockang yohockang faidacbesena.

²⁰ Amma imocac ngadeau kporucwomonggac tegia mong nortbigeng imohai fombong twenti ifingoc faibesena.

²¹ Nga haningina foti silwango memea imoc fombonggac bageau monggac yohockang monggac yohockang ifi faidacbesena.

²² Amma kporucwomonggac ngadeau wenac keme kemeaubigenggac fombong siks mebesena.

²³ Nga kporucwomonggac ngadeau tuturungaac fombong yohockang mebesena.

²⁴ Amma tuturunga yohockang ngadeau emuhacnac wi kpeturangyuruma faiyuruna nanec kambac kambac kpete mocgungo kpeturangyurubesonga.

²⁵ Imoc yofi fingecbeso, fombong eit haninginagoc silwango memea yeni sikstin ambisia. Fombong mocguac bageau hania yohockang yohockang nambeso.

Fombonggac memeseriac dederecgeyoac

²⁶ Anu akasia icngo fombonggac memeseriac icsira marimong imoc kporucwomonggac tegia mocguacsoc mebesena.

²⁷ Nga memeseriac ic marimong kporucwomong tegia nobocac fombonggac negemma mebesena amma marimong ngadeau wenac keme kemeaubigenggac mebesena.

²⁸ Nga memeseriac icsira fombong botuhau nonggea nobocnac ferecgema noboc kemma febeso.

²⁹ Ge fombong golngo gborocyunudacbesena nga kambac kambac memeseriac ic manau faiyununade imoc golngo mema memeseriac ic ifingoc golngo gborocyunudacbesena.

³⁰ Ifi amma kporucwomong dafi nambeso imocac ongea tikiu edzacguaimoc imocac arenga piti yombong modacdacma kpedzibesena.

Mana kpetiac yombonggac kporucac dederecgeyoac

³¹ Anu mana kpetiac nga kpataning yombonggac naguac kpoructoa imoc witic kibia dorong nga giweng amma sacsac nga linenkporuc pososoc yumuyumuyango mebesena. Imoc marikibingicngo keruw ongaac siriha arenggeu kporucfu memusunggema mebisia.

³² Anu ge akasia icngo icsira herea hafoangoc neackpac mema kporuc imocac witinginau nanggebesena. Ic imoc golngo gborocyunuma honacngina golngo mema haningina neackpac silwango mema witinginau nanggeyunubesena.

³³ Nanggeyunuma mana kpetiac yombonggac naguac kpoructoa imocac honacfu gbedickena nanu Kebungo wiac heigboringemmekecduaeac katapa mema imoc mana kpetiac nga kpataning yombonggac naguac kpoructoaac manau, imohai mekemma faibesena. Imoc yofiac, kporuc imocngo womonggac mana kpetiac nga mana kpetiac nga kpataning yombong mendzicyuruude.

³⁴ Ge Kebungo wiac heigboringemmekecduaeac katapaac witiau tapea faima mana kpetiac nga kpataning yombong imohai faina tacbeso.

Tatac nga naguac kporucac dederecgeyoac

³⁵ Anu tatac imoc mana kpetiac nga kpataning yombonggac naguac kpoructoaac ngadeau kporucwomonnu notbigeng faibesena nga kifanananga tatacac hoangau sautbigeng ihai faibesena.

³⁶ Anu kporucama naguyaac negemma witic kibia dorong nga giweng amma sacsac nga linenkporuc pososoc yumuyumuya mema kporucama naguyaac kporuc mong memusunggema megec kibi kibi ambeso.

³⁷ Nga kporuc imocac amma akasia icngo icsira herea hafoangoc marimong mema nanggeyunuma golngo gborocyunudacbesena. Amma honacngina golngo mebesena amma aieng sacsac gerea hetinggena patatakeu hania marimong imocngo mebesena.