Makekeng 2 - Deduamiti

Mose sabac

¹ Anu Lewiac fingecsaheunac ngic mong Lewiac kisicfunac ye Lewiac kisicfunacngoc ngac mong meu

² ngac ye kecma medac kpenanggema meec. Mema medaha henu siriha gombunga anu afo harebec sufuma mekefec.

³ Mekecma torokpema amau sufuudeac negenu osiu sakac mong papyrusngo memea mema titinga bangecac sopea nga kpadongngo medzickedacma medac ihai faiu kemeu doku tegiau dzamac dzamac manau fau tarec.

⁴ Taru nainango ine noc wiac imohac me imohac mong fingecmiu hembesare dema kemma hereau nanec.

Parecoac naroanga

⁵ Nammanu Parecoac naroanga ye doku nadzirudeac kensikeu enactofoc tofoho naroangfora yeneng doku tegiau kengha amma kecmagec naroang ye dzamac dzamac manau sakac tarec, imoc hemma wanacngaha mong sueu kemma mehaec.

⁶ Mehau tapea mesima henu sabac mong kiacma feu ifi hemma yeac ubia manganeu yofi deec, “Yomoc Hebiraio yeneac sabac mong.”

⁷ Ifi deu nainango hama Pareco naroanga kpesimiec, “Ni naric kemma hebiraiongac mong namuyagoc edeba hama sabac yomoc namu gumegembac me?”

⁸ Ifi deu meremmiec, “O, kenna!” Deu naroang ye kemma sabacac nonggea yombong kparu haec.

⁹ Hau Pareco naroangango edeec, “Ge sabac yomoc mekemma namu gumenengkecna neng imocac bung gembade.” Ifi deu ngac ye sabac mekemma namu gumema kefec.

¹⁰ Kecma medac ye yadiu mema kemma Pareco naroanga miu yeac medaha yombong amma kefec. Anu ye yofi deec, “Ni dokuunac taiba ereec,” Ifi dema kpara Mose kparec.

Mose ye Midyan bangecfu kenec

¹¹ Anu Mose ye kecma yaditegecma naso monnu Isracelngicngac tosofora yenearu kemma henu wanacngicua ebiria yombong megecdeac ngombongyunugec yenenec. Yenemmanu aigitangic mongngo hebiraiongic tosofora yenearunac mong kpeu henec.

¹² Ifi hemma noboc nga noboc ngic yeneac kic fiu kpac anu aigitangic kpebucgema sangi usuma semeec.

¹³ Nga ye wereckengau monggoc kemma henu hebiraiongic yohockang yeraocngoc ewema nanec yeremma ngic ogea kopocsic meficgeecmoc ye yofi edeec, “Ge tosoga kpenec imoc mi ngereede.”

¹⁴ Ifi deu yeng yoac yofi meremmiec, “Mongngo ge neneac desidesingic me ngickuneng mi faiguec, kpac. Ge aigitangic kpehomedang, ifi isoc mi kpebucnuna.” Ifi deu Mosengo kengectoa kpeu yofi negenec, “Fora, faka andua imoc bic negendacdau.”

¹⁵ Anu Parecongo siduc imoc ifingoc negemma Mose kpehomeudeac negenec. Ifi anu ye ine Parecoarunac worama Midyanbangecfu kemma ihai kefec. Anu kecma uameme monnu dokuteng monggac tegiau hama matarec.

Regucel naroanga Tsipora

¹⁶ Anu Midyan yeneac sesememengic mong yeac naroangfora sewen kecgec. Imoc yeni naso imohai hama mangnginaac rama nga noning doku gumecyunugecdeac doku fima otou kpakegec

¹⁷ kememanu ramagareng goa yeni hama kporacyunubeso anggec. Ifi anggec Mosengo yacma serima namma naroang meficyunuma rama nga noningfocngina doku gumecyunuec.

¹⁸ Anu yeni mangngina Regucel yearu dzigenegec yeng yenemma yofi kpesiyemmeec, “Ngeni yaguc dafi amma bic hadae?”

¹⁹ Ifi deu degec, “Ramagareng yeneng kporacnunubeso anggec aigitangic mongngo meficnunudac. Amma yeng doku fima rama nga noningfocnina gumecyunudac.”

²⁰ Ifi degec naroangfora kpesiyemmema deec, “Ngic ye dahai? Ngeni nocac wagec tacdac? Heitaigec hama nenanggoc yaka nebaacsoc.”

²¹ Anu Mose ye Regucelgoc kefudeac negenu naric anu kefec. Anu ngic ye naroanga Tsipora Moseac enema anudeac miec.

²² Miu ye medac kpenanggema meu Mosengo yofi deec, “Ni bangec furiau kuric kecduae.” Ifi dema kpara Geresom kparec.

²³ Anu ye kifa homac ihai kecmanu Aigita ngictau homeec. Anu Isracelngicngac yeni ine wanacngic kecma uangina kpendzenggoc mema kecma kiacubamangang amma Anutungo meficyunuma kpendzengnginaunac yungecyunuudeac kpacsambic ammima kecmagec kpakpacnginango yearu enec.

²⁴ Enu Anutungo kiacubamangangina negemma Awraham, nga Itsak amma Yacakow yenigoc dzadzahac meec, imoc negensima

²⁵ Isracelngicngac yenenggareng ayemmeu yengena areng anggecde, ifi negenec.