Makekeng 17 - Deduamiti

Mosengo hoc kpeu doku eremaec

¹ Kebungo Isracel dederecge ayemmeu Isracelkpebung hafoangoc yeni Sin bangec kisi wama feyac kengkecma Refidim imohai sikema imohai kporucamangina taigec enu guru megec. Amma imohai doku mong mi feecac ngicngac yeni doku nebeso hofocgec.

² Hofocma Mose ubakpekpeyoac demima yofi edegec, “Doku mong meficgema nemmena nenide.” Ifi degec Mosengo yofi merengyemmeec, “Ngeni nocac ni ubakpekpeyoac denendae? Ngeni Kebu faitobannu faidae imoc mi ngereede.”

³ Nga ngicngac yeni imohai dokuac homac ayemmeecac Mose ubakpekpeyoac demima edegec, “Ge Aigitabangecfunac meicnunuma neni nga naroangmedacfocnina nga ramaburumakafocnina momoc sasawa wangecnunu hana yei dokuac homebeso andimbe, imoc mi ngereede.”

⁴ Ifi degec Mosengo Kebu kpacsambic ammima yofi deec, “Kebu ni ngicngac yomoc dafi ayemmebade? Yeni hocngo nerehomebeso andae, i.”

⁵ Ifi deu Kebungo turunga yofi meremmiec, “Isracelac ngicenara goa meyununa ngicngac waraiyemmegec kembisia nga yasuga Nilidoku kpenec, imoc momoc mebesena.

⁶ Negennec, ni edi Horew tiki haniau hoc witiau ihai hoanggau nambade. Nambareng ge hoc kpena doku eremau ngicngac yeni nebisia.” Ifi deu Mose ye isracel enarafocngina yeneac kicfu ifinoc anec.

⁷ Amma bangec imocac kpara Massa nga Meriwa deec. Imoc yofiac, Isracelngicngac yeni modzotitiyoac dema Kebu faitobannu faima yofi degec, “Kebu ye botucninau mi kecde, i.”

Dzikac amelekngic yenigoc

⁸ Isracelngicngac yeni Refidimbangecfu kecmagec amelekngic yeneng hama isracelngic yenigoc ngaba amma dzikac kpegec.

⁹ Anu Mosengo Yehosuac yofi edeec, “Ge nenanggac wasaingic meisingyunuma waraiyemmena kemma amelekngic yenigoc ewebisia. Nga ni wereckenu tiki bumau emma Anutuac yasu menambade.”

¹⁰ Ifi deu Yehosuac ye Mosengo edeec, imoc modacma wasaingicfora kpedzucyunuu yeni amalekngic yenigoc ewema kecgec. Ifi angkecgec Mose nga Aharon amma Hur, yeni ine tiki bumau emma nanggec.

¹¹ Namma Mose ye maria miackefec naso imohai isracelngic yeni dzikacfu serikecgec nga maria mausoc amalekngic yeneng serigec.

¹² Anu Mose ye maria ebiriu yeri hoc mong mema nanecfu yombong heimiec matarec. Taru Aharon nga Hur yereng marihora nanggema nanoc, mongngo noboc nga mongngo noboc, ifi nanggeec marihora serima nangkecmanu wenac kiwa kemeec.

¹³ Ifi anggec Yehosuac ye Amalek ngictau nga wasaifora dzikacac beangngo tinacbiric yunudacma firang anec.

¹⁴ Anu Kebungo Mose yofi edeec, “Ngeni dzikac imocac negensima kecgecdeac ge yoac yomoc kibiu ohona febeso. Amma Yehosuac yofi edena yeng imoc negenu fekecbeso, ‘Ni kurumenga kurumenga bageau amelekngic yeneac kpacsiduc hafoangoc meickeba kpac andarude.’ ”

¹⁵ Ifi deu Mose ye arata mong mema kpara yofi kparec, kpetengina gununggema bageau kengandae, ifi isoc Kebu hoanggema kecbade.

¹⁶ Ifi dema yofi deec, “Amalekngic yeni maringina Kebuac ngictautatacfubigeng sinegecac yeng fingecsahengina fingecembesandae yeni yegoc ewema kegecde ngakecbesande.”