Hebiraio 3 - Deduamiti

Medacngo Mose ferahede

¹ Kpetiac tosofocna, kurumenggac kpakpacngo ngenearu ifingoc haec. Imocac ngeni negen negengngina Yesuaru faibisia. Yenoc aposoro nga womonggarengtoanina nga nenang yeac kpara deficgekecdimbe.

² Mose ye Anutuac uayoac modackecma Anutuac amau yoara tofohoma kefec. Nga Anutungo Yesu uayoac miu yeng Moseac siricfu uayoac imoc modackefec.

³ Ama memengicngo kpac kuneng meande, fora. Amma imocngo ama yengenaac kpac kuneng ferahade. Siriha ifia amma Yesungo Mose feraheu nenang yeac kpara afehedimbe.

⁴ Amatehec sasawa imoc ngicngo memea nga Anutungo ine wiac sasawa meficgedarec.

⁵ Mose ye wiac ngadeau fingerudeac sosoha anec. Ye ifi kecma Anutuac amau kingangkpekpe kefec.

⁶ Mose ye kingangkpepe kecma Anutuac uayoac modackefec nga Kristongo Anutuac Medac kecma uayoac modacma yeac amagareng kecde. Amma nenang kengeha kpac kurumenggac wiac menide, imoc wiac engena negemma serima mekecnideu Anutuac amanoc angkecnide.

Negen negensing mi ukubesonga

⁷ Imocac amma Tiri Asungo yofi dede, “Ngeni yaguc yeac ubaudumeng negendaeu, imohai

⁸ herengina mi dzegegec. Bangecfocngina warac bangeckisiu kecma yoacna kpema tobannugec, ifi isoc mi ambisia.

⁹ Bangecfocngina yeneng imohai neng ua mekefai, imoc hengkecma sifu tobannugec.

¹⁰ Imoc kifa 40ac manau mekecgecac amma ngicngac naso imohai kecgec, yeneac herebu negemma yofi deai, ‘Yeni ubaherenginango nasosoc sing segekecma neac sing fekende, imoc negembibiema kecgec.’

¹¹ Imocac ni herebu amma deserima yofi deai, ‘Yeni neac kecnegeng kekecfu naric mi embesandae.’ ” (Myeg 95:7-11)

¹² Tosofocna, ngenearunac mongngo ubahereau negen negeng mangana ereu negen negensing wama Anutu kekec mingina ngadehebauac ngeni henghomema kecbisia.

¹³ Mitikibingo “yaguc” ifi demanu ngeni uamemesoc ubaherengina midiemebisia. Kopocsicngo ngenearunac goa ikoc ayemmeu herengina dzegebauac ngeni ifi ambisia.

¹⁴ Nenang urecfu Kristo seria negensinggema kefing, negen negensinnina siriha imocngo mekecnideu naso wisic wisickeau serima nanni yeng deude, “Ngeni neac ogofocna.”

¹⁵ Anu monggoc dedea yofi fede, “Ngeni yaguc yeac ubaudumeng negendaeu, imohai herengina mi dzegegec. Bangecfocngina warac bangeckisiu kecma yoacna kpema tobannugec, ifi isoc mi ambisia.” (Myeg 95:7-8)

¹⁶ Negenggec, Mosengo Aigita bangecfunac ngicngac hesicyunuma kenu yeni sasawango Anutuac yoac negemmaguc ine faka hania hania angkecma yoara kpegec.

¹⁷ Amma yeni yoara kpema kopocsic meficgegecac yeng kifa 40 ngaba ayemmeu bangeckisiu homedacgec fedaengoc.

¹⁸ Nga yeng ngicngac yeac yoac kpegec, yenengsac kecnegenggac kekecfu mi enggecdeac deseriec.

¹⁹ Amma yofi hentegecdimbe, yeni mi negensinggegec, imocac amma yeneng bangec deec, imohai enggecdeac osigec.