Haggai 2 - Deduamiti

Womong gboria imoc kibikperagiatoayagoc

¹ Anu afo sewenggac uameme twentiwan, imohai Kebuac yoac profete Haggai yearu yofi hau negenec,

² Ge Yehuda yeneac gawana Secalticelac medac Dzerubawel nga womonggarengtoa imoc Yehotsadakac medac womonggarengtoa Yehosuac amma yehudangicngac toseanec komoc kpegec, yeneac yoac yofi edeyununa,

³ “Ngeneac botucfunac goa warac womong yomoc kibikperagiagoc taru henggec nga ngeneng yaguc womong yomoc hemma negenggec imoc wiac omea ande.”

⁴ Ni Kebungina nennoc deduae: Ni ngenigoc kecduae imocac Secalticelac medac Dzerubawel ge yaguc serima nambesena nga Yehotsadakac medac womonggarengtoa Yehosuac ge serima nambesena amma bangec yomocac ngicngac sasawa ngeni ifingoc serima namma ua mebisia. Kurumenggac wasaiareng habuya habuya yeneac Kebu nennoc deduae.

⁵ Ngeni Aigitabangec wama hagec, naso imohai yofi edengunuai: Ni ngenigoc kecduae. Yoac imocngonoc ngenigoc dzadzahac anai. Anu neac Asu imoc ngenigoc kecde. Imocac ngeni kengec mi ambisia.

⁶ Kurumenggac wasaiareng habuya habuya yeneac Kebu ni yofi deduae: Naso mi hereemanu ni kurumenga kurumenga nga bangeha bangeha amma kondung nga bangec kpemindzaheyunuba turic turic anggecde.

⁷ Amma ngicngac habuya habuya yeni ifingoc kpemindzaheyunudacba turic turic andacgec dzofinacngina yei hadaru ama mana yomoc kibikperagingo mewakebade.

⁸ Anu silwa nga gol sasawa fede, imocac mingina ni.

⁹ Amma womong yomocac kibikperagi warac feec imoc mamea nga ngade fingerude imocngo engena yombong anude. Ammanu bangec yomohai danggunucna kpakengemmebesandua. Kurumenggac wasaiareng habuya habuya yeneac Kebu nennoc deduae.

Negengising gombunga amma kenec megecde

¹⁰ Dareyawesngo ngictau kefu kifaya yohockang nga afo nainggac uameme twentifo kemmanu Kebuac yoac profete Haggai yearu yofi hau negenec: Kurumenggac wasaiareng habuya habuya yeneac Kebu yennoc yofi dede,

¹¹ “Dedeseriyoacngo dafi dede, imoc womonggareng kpesiyemmena,

¹² Ngic mong ye yangfusia kpetiac dedea imoc ngakpiyango sangohoma imocngo yaka me icsogong me yaka dzedzea me waing me kerec me iwai goa ngakpiyango kpesereudeu imoc kpetiac anude me?” Anu Haggaingo womonggareng kpesiyemmeu yeneng degec, “Imoc kpac.” Ifi degec

¹³ yeng deec, “Anu ngic mongngo fareng mong kpeserema, yeng imohacnac wiac mong kpesecmesere anudeu wiac imoc wonongagoc anude me?” Deu womonggareng yeneng degec, “Oc, imoc wonongagoc anude.”

¹⁴ Degec Haggaingo yofi deec, “Kebungo yofi dede, ‘Neac kicfu ngicngac Yehuda bangecfu kecdae yeneac fakangina imoc ngic ye isocngoc andae. Angammemengina nga sesengina sasawa imoc hemba wonongagoc angkecde.

¹⁵ Ngeni yaguc hanahema nang enggecdeu noc faka fingecngemmeude, imoc hengising ambisia. Amma warac hoc mongngo monggac witiau mi himagecngoc, naso imohai faka dafi fingecngemmeec, imoc negensibisia.

¹⁶ Ngeni naso imohai fora seberagoc hennegeng amma toru twentiacsoc naric ambac ifi negensigec nga imohacnac sebera meickedacgec toru tengacsocsac angkefec. Nga waing tidzoc tidzohou kemma waing kirung fifti naric fingecbac ifi hennegeng anggec. Ammanu kirung twentisac fingeckefec.

¹⁷ Anu neng deba maringinango nenesemeng uanginau homecgec nomanggbomea sueba imocngo memanganeec nga semenggac hafeia sueba maria dzeu hafoekefec. Anu ngeni sifu nearu mi dzigenegec.

¹⁸ Anu ngeni afo nainggac uameme twentifo, naso imohaingoc Kebuac womonggac hoc hanahema arenggema heigec, ngeni naso imoc gombunga negensibisia. Naso imohacnac nang enggecde imohai faka dafi fingecngemmeude imoc hengising ambisia.

¹⁹ Bugereng nga tohongnginau wit nga balingina imoc kpac andarec. Waing nga fig ic amma pommegranat nga oliwa ic, imoc yeni fora kpac nangkenggec. Yaguc hanahema nang enggecde imohai ni kenecngunuba semengngina siriha mong anude.’ ”

Kebungo Dzerubawel meisinggeec

²⁰ Kebuac yoac afo imocac uameme twentifo imohai profete Haggaiaru monggoc hau negenu atac yohockang anec,

²¹ “Ge yehudangicngac yeneac gawana Dzerubawel Secalticelac medac yofi edena, ‘Ni kurumenga kurumenga nga bangeha bangeha kpemindzaheyunudacba turic turic andacgecde.

²² Amma bangec noboc noboc yeneac ngictaufocngina yeneac tatac hetutuckema bangec noboc noboc gawamangnginaac kuc meickeba kuha kpac andarude. Amma keretac nga keretac kisang kisangngic yeni hetutucyunubade. Amma becosic kisang kisangngic yeni becocsicnginau tacma dzikacac beangngo yenaocngoc ewema kpebucemema becosicnginagoc todinggema mayunuude.’

²³ Kurumenggac wasaiareng habuya habuya yeneac Kebu ye yofi dede, ‘Naso imohai ni uamedacna Dzerubawel Secalticelac medac ge meisingguba ngictauac ring ongeagoc isoc annade.’ ”