Fingec fingec 9 - Deduamiti

Anutungo Noa keneheec

¹ Anutungo Noa nga medacfora yofi dema kenecyunuec, “Ngeni fingecsahe amma seregurutoa amma bangec sokodacbisia.

² Anu bangecfu yang nga sawaac neng nga wiac sasawa kekecnginagoc bangecgoc wegenac kengha amma kecandae amma kondunggac yang imoc momoc sasawa ngeneac mariu faidacduae nga yeni ngeneac kengec kuneng amma kecgecde.

³ Amma mondzang nganoc negecdeac ngemmeai ifi isoc wiac sasawa kekecnginagoc kengha amma kecandae ngemmeba imoc ngeneac yakangina ambeso.

⁴ Mocgusac ine yofi, wiac hania hania sebifusinginagoc nga kekecnginagoc yeneac sac mi meic meickea ngeni imoc mi nebisia.

⁵ Foracngoc, ngicngac ngeni kekecngina nga sacnginaac turung imoc neng kpoubade. Imocac turung imoc yang yenearu nga ngicngac yenearu kpoudacbade. Amma ngicngac sasawa sactosofocngina kpebucyunugecdeu ni yenearu kekecac turung kpoubade.

⁶ Anutungo ngicngac yengena siric isoc meyunuec. Imocac mong ye bangecngic monggac sac kpakeudeu bangecngic yeneng yeac sac kpakegecde.

⁷ Ngeni ine fingecsahe amma seregurutoa yombong amma bangecfu monggoc monggoc sahema kecbisia.”

Anutungo Noagoc dzadzahac anec

⁸ Anu Anutungo Noa medacforagoc yeni yofi dema edeyunuec,

⁹ “Negendae, ni ngeni nga bangecfocngina ngadeguc fingecgecde ngenigoc dzadzahac ambeso anduae.

¹⁰ Ni imoc ngenigoc nga wiac kekecnginagoc sasawa kecdae yenigoc momoc anduae. Ngeni nga neng nga ramaburumaka amma bangecfu yang sasawa ngenigoc wageu momoc kecgec

¹¹ ngenigoc dzadzahac yofi anduae, doku tunggbaungtoango hama bangecfu wiac sebifusinginagoc sasawa monggoc mi kpetotieyunuude nga bangectoa bangec ifingoc monggoc mi memanganeude nga memanganebesande.”

¹² Amma Anutungo torokpema yofi deec, “Ni yaguc ngeni nga wiac kekecnginagoc sasawa ngenigoc kecgecdemoc ngenigoc dzadzahac anduae imoc nasoya nasoya feude nga imocac kpete yofi ande.

¹³ Ni asommadocna hoenggoc faiduae imocngo ni nga bangectoa bangec botucnirau dzadzahacac kpete ambeso.

¹⁴ Amma ni deba hoeng sawau wi fingeru asommadoc fingectegerudesoc

¹⁵ imohai dzadzahac ni nga ngeni amma wiac kekecnginagoc hania hania sebifusinginagoc sasawa nenang botucfu kecdae yeni negensibade. Nga doku imoc tunggbaungtoa monggoc mi yadiude. Imocngo wiac sasawa sebifusinginagoc monggoc mi kpetotiengunuude.

¹⁶ Ni asommadoc hoenggoc fingeru hembadesoc nga wiac hania hania sebifusinginagoc nga kekecnginagoc sasawa bangecfu kecdae ngenigoc dzadzahac amba fede nga nasoya nasoya feude amma febesande imoc negensikecbade.”

¹⁷ Ifi dema Noa yofi dema edeec, “Bangecfu wiac sasawa sebifusinginagoc kecdae ngenigoc dzadzahac anduae imocac kpete asommadoc ande.”

Noa nga medacfora

¹⁸ Anu Noa medacfora wageunac magec yeneac kpacngina Sem nga Ham amma Yafet. Ham ye ine Kenacanggac mama.

¹⁹ Ngic harebec imoc yeni Noaac medacfora nga yenearunac bangectoa bangecfu ngicngac sasawa fingecma kemma bangeha bangeha medacma kecgec.

²⁰ Noa ye heikpenecngic amma ye waing ua homec homecac hanac hanaheangic.

²¹ Anu ye ine waingdoku nema ubea sufuec. Ubea sufuu kporucamaya botuhau senggang feec.

²² Feu Ham, Kenacanggac mama ye mama senggang feu hemma ngadeu kemema dachora siduc ayecmeec.

²³ Ayecmeu Sem nga Yafet yeri ngakpi mong mema fuangirau faima ngade ngade kporucamau emma mangngira senggang femanu kperahaoc. Yeri kicmesungira edibigeng fima kemma mangngiraac sengganga mong mi hemma ensac kperahaoc.

²⁴ Anu Noa ye waingngo kpeu gautoa feecfunac kpidohoma yacma negen negena ireckeu Ham, medaha kapiango faka ammiec imocac siduc negemma yofi deec,

²⁵ “Sowecngo Kenacan nga bangecfora yeneac witiu embeso! Ye dachora yereac wanacngicfocngiraac wanacngic yombong kecbeso.”

²⁶ Ifi dema torokpema yofi deec, “Kebu, Semgac Anutu ye kenehagoc. Kenacan ye ine Semgac wanacngiha amma kecbeso.

²⁷ Anutungo Yafet meficgeu ye tatac kuneng mema Semgac kporucamau tacyac ambeso. Nga Kenacan ye ine wanacngingira ambeso.”

²⁸ Anu doku tunggbaung kpac anecfunac hanahema Noa ye kifaya 350 torokpema kefec.

²⁹ Kecma kifaya kpeturanggeu 950 ammanu homeec.