Fingec fingec 6 - Deduamiti

Faka mangana homac meficgegec

¹ Anu ngicngac yeni sahema bangec sokodacmagec naroangfocngina fingecgec.

² Fingecgec Anutuac medacfora yeneng naroang siricngina gombunga yenembokoma hengisingyunuma imoc meyunugec enengfocngina anggec.

³ Ifi anggec Kebungo yofi deec, “Ngicngac yeni sebifusingina bangectehecngo memea imocac amma neac asu yenearu fefeseri mi febeso. Yeni bangecfu kekecnginaac kifanaso 120sac ambeso.”

⁴ Anu yofi fingerec Anutuac medacfora yeni bangecngic yeneac naroangfocngina yenigoc fegec yenearunac nambaracfocngina fingecgec. Anu nefilingic yeni bangecfu naso imohai nga ngadeau ifingoc kecgec. Ngic imoc yeni warac kecgec nga yeni kucnginagoc nga kpac kunengnginagoc kecgec.

⁵ Kebungo bangecfu ngicngac yenenu yeni faka mangana homac meficgegec. Amma ubaherenginau negen negeng manganasac feu imocacsoc faka mangana nasosoc amma kecgec.

⁶ Anu ye imoc hemma ngicngac meficyunuma bangecfu faiyunuec uaya imoc ubeango wama ubaebictoa meec.

⁷ Mema yofi deec, “Bangecngicngac meficyunuai yeni bangec witiaunac meicyunubesare. Ni meficyunuai imoc ubanango wayunuduaeac ngicngac nga yang amma wiac kekecnginagoc bangecgoc wegenac kengha amma kecandae nga sawaac neng sasawa meicyunudacbade.”

⁸ Nga Kebungo ine Noaac negenu ngereec.

Noaac siduc tosea 6:9–9:29

⁹ Yomoc Noaac siduc. Ye dindingac nga kopocsiha kpac ngicngac botucnginau kefec amma ye Anutugoc wegenac kefoc.

¹⁰ Anu yeac medacfora harebec fingecgec yeneac kpacngina Sem nga Ham amma Yafet.

¹¹ Anu bangectoa bangec imoc Anutuac kicfu manganeyombonggeu imoc mengec mengereacsoc mi anec. Nga ewekpekpengo bangec sokodarec.

¹² Anu wiac sasawa sebifusinginagoc yeni bangecfu fakangina mangana angkecgec mengec mengereac sing mong mi fingerec. Ifi anu Anutungo bangec hemma negenec imoc mengec mengereasoc kpac.

Wage meudeac edeec

¹³ Anu Anutungo Noa yofi dema edeec, “Wiac sasawa sebifusinginagoc yeni faka mangana angkecdaeac ewekpekpengo bangectoa bangec sokoma fede. Imocac yeni kpac andacgecdeac desiyunubesandua. Imocac ni bangectoa bangec nga yeni momoc kpetotieyunubade.

¹⁴ Ge ine gofer icngo wagetoa mong buya dabac dabac mema manabisic bisic homac hendzicma mana nga ngadea bangecac sopeango hosodacbesena.

¹⁵ Ge wage yofi mebesena. Hereaya imocac mitaya 135, nobocnac noboc kende imocac mitaya 22 nga herea made imocac mitaya 13 ambeso.

¹⁶ Nga bubuyau imoc 50 sentimita emuhacnac erema warocfu embeso nga naguya ine nonggeaubigeng faibesena. Wage imocac manau peunga andenga andenga emu amma botuhau nga wi faibesena.

¹⁷ Negennec, ni wiac sasawa sawa bageau sebifusinginagoc nga kekec asunginagoc kecdae imoc yeni kpetotieyunubadeac bangecfu doku tunggbaungtoa deba ihai fingeru bangecfu wiac sasawa homedacbesandae.

¹⁸ Anu gegoc ine dzadzahacna meseribade. Ge wageu emma kecbesena, ge nga enengmedacerangifocga yeni gegoc momoc wageu emma kecbisia.

¹⁹ Amma wiac sasawa sebifusinginagoc imoc yeni sasawa kpac andacbauac yenearunac yohockang yohockang siricngina arenga arenga ngiwa nga ngagera ifi meyununa gegoc momoc wageu emma kecbisia.

²⁰ Amma neng siricngina arenga arenga nga yang siricngina arenga arenga amma wiac sasawa kekecnginagoc bangecgoc wegenac kengha amma kecandae siricngina arenga arenga yeni sasawa kecgecdeac yohockang yohockang gearu habesandae.

²¹ Anu wiac nenea sasawa fede imoc kpedzucnedacma wageu faina enu imocngo geangga nga yeneac yakangina ambeso.”

²² Anu Noa ye Anutungo edeec yoac imoc sasawa modacdarec.