Fingec fingec 47 - Deduamiti

Parecongo Yosef dacfora yenenec

¹ Yosef ye ifi deu wisickeu kemma Pareco yofi dema edeec, “Mangdacfocna yeni ramaburumakahabufocngina sasawa amma wiacngina sasawa mema Kenacan bangecfunac hama yaguc Gosen bangecfu tacdae.”

² Amma dacfora yenearunac ngic 5 hesicyunuma kemma Parecoac kicfu faiyunuu nanggec.

³ Nanggec Parecongo Yosef dacfora yofi dema kpesiyemmeec, “Ngeni noc ua mema kecandae?” Ifi deu yeni yofi dema meremmigec, “Enac tofoc tofohofocga mangesafocnina yeni ramagareng ua mekecgec neni ifingoc ua imoc meandimbe.”

⁴ Ifi dema torokpema Pareco yofi dema edegec, “Kenacan bangecfu boditoa fedeac ramahabunina yeni yaka hofocgec neni bangec yomohai naso wegenac kuric kecnideac hading. Imocac ge negenna naric anudeu neni Gosen bangec desinemmena ihai kecbisina.”

⁵ Ifi degec Parecongo Yosef yofi dema edeec, “Mangdacfocga yeni gearu bic hadauac

⁶ ge Aigita bangec sasawa henna. Hemma bangec damocngo gombunga yombong ande imohai faiyunubesena. Naric, Gosen bangec imoc desiyemmena imohai kecbisia. Amma ge yeneac botucnginaunac ngic goa ua negengyombonggedae yeni negengyununecfu yeni neac ramaburumaka garengyombong kecgecdeac faiyunubesena.”

Parecongo Yacakow henec

⁷ Anu Yosefngo mama Pareco edzahaudeac yearu wangecma enec. Enu Yacakow ye Pareco keneheec.

⁸ Keneheu Parecongo Yacakow yofi dema kpesimiec, “Ge kifaga dafiguc?”

⁹ Kpesimiu Yacakowngo yofi dema meremmiec, “Ni naso wegenanec bangecfu kecba kifana 130 ande nga dzoic kpendzenga ine homac. Mangesafocna yeneac kifangina neac ferahede amma yeni naso herea kecgec ni yeni isoc mi anduae.”

¹⁰ Yacakow ye ifi dema Pareco kenehema wama kenec.

¹¹ Anu Yosefngo mangdacfora Aigita bangec tosea mong yeni yenang yombong anudeac yemmeu ihai kecgec. Bangec imoc bangec gombunga yombong nga Parecongo deec imocac siricfu Racemeses bangecfu bangec noboha yemmeec.

¹² Amma ye mangdacfora nga mamaac wiacfora yeni sasawa naroangmedacfocngina yeneac kpetecnginaac sirihau yaka meficyunukefec.

Yosefngo aigitangicngac semeng meficgeyemmeec

¹³ Anu bodi imoc bangec noboc noboc ebira yombong fingeru yaka sasawa kpac andarec. Ifi anu Aigita nga Kenacan bangecfu wiac sasawa homema kpac andarec.

¹⁴ Anu Yosefngo yaka sueu bummegec Aigita nga Kenacan bangecfu dzo sasawa feec imoc mekpedzuc anec. Amma dzo imoc Parecoac amau fau tarec.

¹⁵ Kecma Aigita bangecfu nga Kenacan bangecfu dzo sasawa kpac andaru aigitangic sasawa yeni Yosefaru kemma yofi degec, “Neni dzonina bic kpac andacdac nga ge sifu yaka nemmena. Neni geac kicfu homeni naric mi anude.”

¹⁶ Ifi degec Yosefngo yofi dema edeyunuec, “Dzongina kpac andacdacfu ramaburumakafocngina mehama nembisia. Nenggec imocac turunga yaka ngemmebade.”

¹⁷ Ifi deu yeni wiac yofi meyunuma kenggec, becosi nga donggiburumaka amma ramahabungina. Ifi meyunuma kenggec yaka yemmeec. Amma kifa imohai wiacngina imocngo yaka bummenec amma kucnginagoc monggoc anggec.

¹⁸ Amma kifa imoc wisickeu kifa mong imohai hama yofi dema edegec, “Kunennina neni geac kicfu hanianina naric mi hesonggenide. Dzonina sasawa kpac andaru ramaburumakafocnina bic genni geac andacdac, mong mi nande. Imocac neni nenang nga bangecnina imocsac fede.

¹⁹ Nga neni nenang geac kicfu homeni heikpenec bangecnina eng feu naric mi anude. Neni nenang nga bangecnina yakaac turunga bummenununa neni nenang nga bangecnina Parecoac wanac ambisina. Heikpenec bangec imoc eng mi febeso. Amma neni homeni bangecnina imoc kisi ambacac semeng komoha nemmena kecnide.”

²⁰ Anu boditoa yombong fingecyemmeecac aigitangic yeni sasawango heikpenecbangecngina suedacgec Yosefngo imoc bummeu Parecoac andarec.

²¹ Ifi amma Yosef ye Aigita bangec noboc nga noboc, wi nga emu ngicngac kecdacgec yeni sasawa meyunuma taongtoa fekenggec imohai kecgecdeac faiyunudarec.

²² Anu sesememe yeni Parecoarunac ua bungngina mekecgecac yeneac bangec ine mi bummeec. Yeni Parecongo uanginaac bungyemmeu imocngo yaka bummegec. Ifiac amma bangecngina mi suegec.

²³ Anu Yosefngo ngicngac yofi dema edeyunuec, “Negendae, ni yaguc ngeni nga heikpenecbangecngina bummengunudacba Parecoac ngicngac andacdae. Imocac yaka komoha yomoc mema ua heihomec ambisia.

²⁴ Amma homecgec fora anude naso imohai guru 5 imohacnac guru mocgu imoc Pareco mibisia. Nga guru 4 imoc ngenang ambeso. Imoc komoha anude nga imoc ifingoc ngeni nga wiacfocngina nga nambaracfocngina ngeneac yaka anude.”

²⁵ Ifi deu yeni yofi degec, “Ge kekecnina onggonggenec imocac kunennina, ge neneac negenna ngereeudeu Parecoac wanacareng amma kecbisina.”

²⁶ Ifi degec Yosef ye Aigita heikpenecbangecac singyoac yofi fau feec, “Wiac fora sasawa 5, imohacnac guru mocgu imoc Parecoac faibisia.” Singyoac imoc yaguc fedengoc. Nga sesememe yeneac bangec imocsac ine Parecoac mi anec.

Yacakow homecnasoya wegeneec Ge Aigita bangecfu mi tonggonubesena

²⁷ Anu Isracel ye Aigita bangecfu Gosen provinsiu kecma yeac wiacfora yeni dzofinac nganoc meficgegec nga fingecsahe amma seregurutoa yombong anggec.

²⁸ Anu Yacakow ye Aigita bangecfu kifa 17 kefec, ifi kefu kifaya 147 anec.

²⁹ Kifaya ifi ammanu homecnasoya wegeneu medaha Yosef heitaima yofi dema edeec, “Ge neac negenna ngereeudeu ge naric yofi ambesena mariga tabunau faima yofi deserinemma eweheiheigoc yoac yomoc modacbesena. Ge Aigita bangecfu mi tonggonubesena.

³⁰ Ni homema mangesafocna yenearu torokpema feba Aigita bangecfunac menuma kemma mangesafocna yeneac kicsereu tonggonubesena.” Deu yeng yofi meremmiec, “Naric, denec isoc ambade.”

³¹ Ifi deu mamango yofi deec, “Deseriyombonggena!” Deu Yosefngo deserima deu Isracel ye oruha heima feande imohaibigeng ngonducneec.