Fingec fingec 40 - Deduamiti

Witicngic yeri gaukpefing henoc

¹ Anu faka imoc fingerec imocac ngadeau Aigita ngictau Pareco yeac wainggareng nga icsogong oho ohogareng yeri kopocsic meficgema ngickunengngira Aigita ngictauac ngaba meficgemioc.

² Meficgemiec Pareco ye uangichora wainggareng yeneac enaratoa nga icsogong oho ohongic yeneac enaratoa yereac herea buu

³ witicamau faiyuruec. Witicama imoc wasaingic Pareco garenggekecgec yeneac kaptenggac amau feec. Anu Yosef ye witicama imohaingoc witicngic kefec.

⁴ Anu wasaingic yeni Pareco garenggekecgec yeneac kaptengngina ye Yosefngo ngic yohockang imoc garengyuruudeac deu ye yereac enac tofoc tofoho kefec. Anu yeri witicamau naso herea isoc kefoc.

⁵ Ammanu naso monnu tofocnac mocgungoc Aigita ngictauac wainggareng nga icsogong oho oho gareng witicamau faiyurugec taroc yeri gaukpefing henoc. Mong ye gaukpefing siriha mong henec nga mong ye siriha mong henec nga gaukpefingngira imocac hania mong mong anec.

⁶ Hemmaec ama wereckenu Yosef ye yereac ama manau emma yerenu ubaebic siric taroc.

⁷ Ifi yeremma ye Parecoac uangic yegoc kunengnginaac amau witicngic kefoc yeri kpesiyemecma yofi deec, “Ngeri yaguc nocac ubamangang siric tacdape?”

⁸ Ifi deu meremmioc, “Neri gaukpefing hendic nga imocac hania edenuruudeac ngic mong mi kecde.” Ifi deec Yosefngo yofi deec, “Gaukpefinggac hania dede imoc Anutuac wiac. Ngeri siduc naric anenec negembade.”

Yosefngo gaukpefingngiraac hania edeyuruec

⁹ Ifi deu wainggareng yeneac enaratoango gaukpefing henec imocac siduc Yosef ammiu negenec, “Ni gaukpefing yofi hendua waing witic mong neac kicfu nandac

¹⁰ imohai fawa harebecfu sera bic erema dzuria kpema fora imoc bic gbariagoc amma kpauedac.

¹¹ Anu ni Parecoac kpakenec marinau mema namma waing kpauedac imoc mesima medzohoba Parecoac kpakenecfu kemeu mariau faiba medac.”

¹² Ifi deu Yosef ye yofi dema edeec, “Imocac hania yofi, fawa harebec imoc uameme harebec.

¹³ Uameme harebec wisickeu Parecongo orucga miacma uagau monggoc faiguude nga ge warac wainggareng enara kecma Parecoac kpakenec mariau faikecnec ifingoc monggoc amma kecnade.

¹⁴ Ifi amma ubangerecgoc kecma ine neacnec negensima ubangerec anemma neac siduc Pareco edebesena ifi amma meficnuna witicama yomoc wama mabesare.

¹⁵ Foracngoc, ni hebiraiongic yeneac bangecfunac. Anu ngic yeneng sing ferahema fainugec goa yeneng menuma yei hagec. Nga yei ifingoc faka mangana mong mi ambareng witicamau bangec usu usuya manau emu yombong fainugec.”

¹⁶ Anu icsogong oho ohongic yeneac enaratoa ye Yosefngo gaukpefinggac hania gombunga dekperagiec ifi hemma yofi dema edeec, “Ni gaukpefing henduangoc imoc yofi, ni sakac harebec orucnau witiu witiu faima medua. Imoc yeneac manau icsogong witflawango memea tarec.

¹⁷ Sakac hanac hanahea tarec imohai Parecoac yaka flawa nga icsogong songea hania hania mengerema oho ohoya tacmanu neng yeneng hama nedau.”

¹⁸ Ifi deu Yosef ye turunga yofi meremmiec, “Imocac hania yofi, sakac harebec imoc uameme harebecngoc.

¹⁹ Uameme harebec wisickeu Parecongo deu yeni orucga ubagausing herecgema sebiga icfu gbedicgugec nanna neng yeneng hama fusiga negecde.”

Parecoac fingec fingecnaso

²⁰ Anu uameme harebec wisickeu Parecoac fingec fingecnaso anu enac tofoc tofohofora sasawa yeneac yakatoa ohoma deu enacurec negec. Ye enac tofoc tofohofora yeneac botucfunac wainggareng yeneac enaratoa nga icsogong oho ohongic yeneac enaratoa yereac orucngira miacma yofi anec.

²¹ Ye wainggareng yeneac enara kpakeneha monggoc miudeac uaya mengereu ye hanahema kpakenec monggoc Parecoac mariu faiec.

²² Amma icsogong oho ohongic yeneac enaratoa ye ine Yosefngo gaukpefingngiraac hania edeyuruec, ifi isoc ngictaungo uangicfora edyunuu gbedickegec nanec.

²³ Anu wainggareng yeneac enaratoa ye ine Yosef mi negensima nigeckpeu kefec.