Fingec fingec 31 - Deduamiti

Yacakow ye woraudeac sing mengereec

¹ Anu Lawan medacfora yeneng yoac yofi degec imoc Yacakowac kedzacfu kemeec. “Yacakow ye manninaac iwai sasawa medarec. Manniaac wiactoa feec imohacnac hanahema iwai sasawa mekpedzuc amma medarec.”

² Ifi degec Lawanggac kicmesuya merenu siriha mong anu Yacakow ye imoc bic hentegecma yofi negenec ye warac gombunga anengkefec ifi isoc monggoc mi anenude.

³ Anu Kebungo Yacakow yofi dema edeec, “Mangfocga nga arengfocga yeneac bangecfu monggoc dzigenena. Ni gegoc kecbade.”

⁴ Deu Yacakow ye yoac fau Rahel nga Lea yerearu kenu yeri rama uau haoc.

⁵ Haec edeyuruec, “Ni mangngiraac kicmesuya hemma yofi negenduae ye warac faka anengkefec ifi isoc monggoc mi anende. Nga mannaac Anutungo ine nigoc kecande.

⁶ Nga ni mangngiraac ua kucgoc mekecanduae imoc negendape.

⁷ Anu mangngirango ine tobannuma ua bunna meeng mema anu atac 10 anec anu Anutungo kpae heimiu mong mi memanganenuec.

⁸ ‘Nga ramanoning faikperecge yeni geac bung ambisia.’ Ifi deec isoc rama nga noning yeni medacfocngina faikperecge sasawa fingecdacgec me ‘Kibi kibi yeni geac uabung ambisia.’ Ifi deec isoc medacfocngina kibi kibi sasawa fingecdacgec.

⁹ Ifi fingecgec Anutungo mangngiraac ramanoning wangecma ni nenec.

¹⁰ Anu ramanoningngiwa yeneng ngagera feracyunugec naso imohai gau fema gaukpefinnu yofi henai. Yeni ngagera feracyunugec yeneac sebingina imoc kibi kibi nga faikperecge andacgec.”

Yacakow ge dzigenena

¹¹ Amma gaukpefinnungoc Anutuac angerongo kpacnuma yofi dema edenuec, “Yacakow.” Deu ni yofi meremmiai, “Ni yoc.”

¹² Ifi deba yofi dema edenuec, “Lawangngo faka hania hania anggendarec imoc ni hendarai. Imocac ge kicga fina kenu henna. Ramaga nga noningga ngiwango ngagera feracyunuandae ngiwa imoc yeni sebingina faikperecge nga kibi kibi sasawa.

¹³ Amma ni Bet El bangec imocac Anutu. Ge imohai hoc mong kerecdokungo nadzicmima yoac mong deserinennec. Ge yaguc yacma bangec yomoc wama arengfocgaac bangecfu dzigenema kembesena.”

Yacakow ye Lawan wama woraec

¹⁴ Ifi deu Rahel nga Lea yeri Yacakow yoac turunga yofi meremmioc, “Manniraac maridzoming nganoc nereac onga mong mi fede.

¹⁵ Neri yeac kicfu kuric isoc yombong kecandipe. Ye bunnira mema dzonira ukudarec.

¹⁶ Imocac amma Anutungo manniraac wiac wangecdarec imoc sasawa nenang nga nambaracfocnina nenanggac ande. Imocac Anutungo derecgegendac imoc sasawa ambesena.”

¹⁷ Ifi deec Yacakow ye yacma enenghora nga nambaracfora sasawa yeni kamele witiau faiyunuec.

¹⁸ Faiyunuma ramaburumaka nga noning nga finac goa Paddan Aram bangecfu kecma meec imoc mekpedzunedacma Kenacan bangecfu mama Itsak yearu dzigeneudeac kenec.

¹⁹ Naso imohai Lawan ye ine ramafora yeneac dzongina merecgeudeac kemma kefec. Ihai kecmanu Rahel ye mamaac nemuonga imoc hamangec meec.

²⁰ Yacakow ye woraudeac negemma faka sufu sufuu amma aramngic Lawan yoac mong mi edeec.

²¹ Ye engsac yacma wiara sasawa medacma woraec. Worama kemma doku ferecgema Gilecad sifecbangecfugeng kenec.

Lawan ye Yacakow kisamma kenu Anutungo fingecmiec

²² Anu uameme harebec wisickemanu Lawan yofi dema edegec, “Yacakow ye bic woradac.”

²³ Ifi edegec negemma ye sactosofora meyunuu uameme seweng kisangyunuma kengkecma Gilecad sifecbangecfubigeng meficyunugec.

²⁴ Anu Anutungo ine aramngic Lawan tofocnac gaukpefinnu fingecmima yofi dema edeec, “Ge fakaga garenggema Yacakow yoac kucgoc mi debesena me mangana mong mi ammibesena.”

²⁵ Anu Yacackow ye sifecfu kporucamangina kpedziu Lawan yeng kengkecma meficyunuec. Meficyunuma sactosoforagoc Gilecad sifecbangecfu momoc kporucamangina kpedzima yai fegec.

²⁶ Anu Lawangngo Yacakowac yofi dema edeec, “Ge noc faka yombong anendang? Ge hesonnuma naroanghocna dzikacfu meyunuma witicamau kengandae ifi isoc meyuruma hadang.

²⁷ Anu ge nocac hesonnuma waic waic woradang? Edenubang debac ni wiacfocna edeyunuba yegec heima tambaring nganoc kpema sogac sogaigoc namma faingunuba habau.

²⁸ Anu ge ine naroanghocna kokocyurubadeac mi negensinendang amma esafocna maringina mebadeac mi negendang. Ge faka imoc mi angana anendang.

²⁹ Imocac ni faka mong anggembeso kuc fenende. Nga manggaac Anutungo ine tofocnac kpetarinemma yofi dedac. ‘Ge fakaga garenggema Yacakow yoac kucgoc mi debesena me mangana mong mi ammibesena.’

³⁰ Anu ge manggaac amau kennadeac songoga kuneng anu woradang imoc naric. Amma ge nocac nemuongana hamangec medang?”

³¹ Ifi deu Yacakowngo Lawanggac yoac turunga yofi meremmiec, “Ge naroanghocga goriangoc wangecnubanggac ni kengec amma mi edeguma woradua.

³² Anu ge monggaru me monggaru nemuonga meficgenadeu imoc ye homebeso. Wiac sasawa mekecdimbe imoc sactosofocnira yeneac kicfu hendacbesena. Amma nemuonga mong meficgenadeu mebesena.” Yacakow ye Rahelngo wiac imoc hamangec meec imoc mi negenec.

Kporucamanginau emma nemuonga hoforec

³³ Anu Lawan ye Yacakow nga Lea amma wanacngac yohockang yeneac kporucamau emma nemuongaya mong mi henec. Anu ye Leaac kporucamaunac mama Rahelac kporucamau enec.

³⁴ Enu Rahelngo nemuonga mema kamele yeneac finac meme hie imohai barima witiau heima tarec. Taru Lawan ye bedzou hofoc hofoc ua mekefu kpac andarec.

³⁵ Ifi anu Rahel ye mama yofi dema edeec, “Kunenna ngachafi ayemmeande imoc anendacac ni geac kicfu naric mi yacbade.” Ge herebu mi ambesena. Ye ine wiac sasawa imoc hendarec nga nemuongaya ine mong mi henec.

Yacakowngo herebu negemma Lawan yoac demiec

³⁶ Ifi anu Yacakow ye herebu negemma Lawan yoac demima yofi dema kpesimiec, “Ni noc wiac mangana me kopocsic meficgeaiac kucgoc kporacnuma hadang?

³⁷ Nga ge yaguc wiacna sasawa hendacdang imohai ge wiac mong meficgedannu sactosofocnira yeneac kicfu faina yeneng hemma neranggac yoac negemma mengerebisia.

³⁸ Amma ni gegoc kecba kifa 20 wisickeec naso imohai rama nga noningfocga yeni medac meyunugec imoc mong mi manganeec. Nga geac ramahabuunac ngiwa mong kpenec mi anai.

³⁹ Me wasaiyang yeneng ramafocga yinigec mehama mi edzacguanduae. Ni neannaoc turunga faianduae. Ge wenacfu me tofocnac hamangec meyunugec turunga gembadeac deannec.

⁴⁰ Anu ni wenacfu wenactoango nohokefec nga tofocnac nomanggoc yombong gauna kpac kefai.

⁴¹ Nga kifa 20 yombong amagau enac tofoc tofohoga kefai. Kifa 14 imoc naroanghocga yereac amma kefai nga kifa 6 imoc ramanoninghabuga yeneac amma kefai. Amma geng ine uabunna mekemmeha angkecna atac teng anec.

⁴² Anu mannaac Anutu, Awrahamgac Anutu ye Itsakngo eweheimikefec ye mi kecbac debac ge eng yombong fainuna habai. Anutungo ine ubaebicna nga kpendzeng uana imoc hemma tofocnac yoac imoc isinggema edegudac.”

Lawan nga Yacakow yeri dzadzahac anoc

⁴³ Ifi deu Lawangngo Yacakow yofi dema edeec, “Naroanghocna yeri neac nambarachocna nga ramanoning nga wiac sasawa hendacnec imoc yeni neac sasawa. Naroanghocna yomoc nga nambarac meyunugec yeni ine wiac mangana ayemmeba naric mi anude.

⁴⁴ Imocac amma nerang dzadzahac mong amma wiac mong faide imocngo dzadzahacniraac kpete ambeso.”

Demeseriyoacac hocguru

⁴⁵ Ifi deu Yacakow ye hoc mong miacma gununggema kpete faiec.

⁴⁶ Faima sactosofora yofi dema edeyunuec, “Ngeni hoc homac kpedzucnegec.” Ifi deu yeni hoc kpedzucnegec enu hocguru imocac witiau yakangina faima enacurec negec.

⁴⁷ Anu Lawangngo hocguru imocac kpara Yegar Sahaduta kparu Yacakowngo ine kpara Galeced kparec.

⁴⁸ Ifi kparu Lawangngo yofi deec, “Hocguru yomocngo yaguc neranggac kpetenira ande.” Imocac amma kpara Galeced kpacgec.

⁴⁹ Amma ye torokpema yofi deec “Kebungo faiemema kecde garennira kecbeso. Imocac amma hockpete imocac kpara mong Mitsepa kpacgec.

⁵⁰ Nga ge naroanghocna sisic ayecmenade me mi negembare ngac goa monggoc meyununadeu ine yofi negembesena. Ngic mongngo mi genude gedang anu Anutungo hepucnira amma genudenoc.”

⁵¹ Anu Lawangngo torokpema Yacakow yofi dema edeec, “Negennec, hocguru nga hockpete botucnirau gununggema faidua

⁵² imocngo kpetenira nammanu ni ngaba amma gearu mi habade. Nga ge ifingoc ngaba anemma kpete imoc ferahama nearu mi habesena.

⁵³ Anu Awraham nga Nahor yereac Anutungo desi desinira ambeso. Ifi deu Yacakow ye mama Itsakngo Anutu eweheimima kefec yeac kpacfu deseriec.”

⁵⁴ Deserima tikiu Anutuac sesegerec ohoma sactosofora yakaac heitaiyunu hama yaka imoc enacurec nema tiki imohaingoc fegec.

⁵⁵ Fegec ama wereckenu Lawan ye asoacguc yacma esamedacfora kokocyunuma kenecyunuec. Ifi amma faiyunuma dzigenema amabangehau kenec.