Fingec fingec 30 - Deduamiti

Wanacngac Bilha yearunac Dan nga Naftali fingeroc

¹ Anu Rahel ye ine Yacakowac nambarac mong mi mema eng kefec. Imocac dara Leaac keracmangang amma Yacakow yofi dema edeec, “Ge kogoc mong meficgenembesena, ifi mi annadeu ni homebade.”

² Ifi deu Yacakow ye Rahelac herebu negemma yofi meremmiec, “Anutungo segeregemmanu ni dafi yeac tatac mema kogoc mong meficgegembade?”

³ Ifi deu Rahelngo yofi deec, “Negennec, ge wanacnaroanna Bilha yearu kenna. Anu yeng nambarac goa meyunuma tabunau faiyunuu yeni neac ambisia.”

⁴ Ifi dema wanacnaroanga Bilha Yacakow enema anudeac miec.

⁵ Miu yegoc kefu Bilha ye Yacakowarunac medac mong kpenanggema meec.

⁶ Meu Rahel ye yofi deec, “Anutungo yoacna negemma firang ambadeac nanggenuma medac mong nendac.” Ifi dema Dan kparec.

⁷ Anu Rahel wanacnaroanga ye imocac ngadeau Yacakowac medac monggoc kpenanggema meu yeri yohockang anoc.

⁸ Anu Rahel ye yofi deec, “Dacnagoc Anutuac dzikac mekecma heiseriai.” Ifi dema medacac kpara Naftali kparec.

Dzilepa yearunac Gad nga Aser fingeroc

⁹ Anu Lea ye medac kpac kecdua ifi negemma enac tofoc tofohonaroanga Dzilepa mema Yacakowac enema anudeac miec.

¹⁰ Miu yeng Yacakowac medac mong meec.

¹¹ Meu Lea ye yofi deec, “Ye ubangerecgoc hadac.” Ifi dema kpara Gad kparec.

¹² Anu ye Yacakowac medac mong monggoc meu yeri yohockang anoc.

¹³ Anec Lea ye yofi deec, “Ni yaguc sogaiduae nga ngac yeni neac ifingoc yofi degecde, ‘Ye sogac sogaiac areng ande.’ ” Ifi dema kpara Aser kparec.

Leaarunac Issashar nga Dzewulun amma Dina fingecgec

¹⁴ Anu semeng kpememe nasou Recuwen ye tumiatoau kemma mandrago gbomea goa meficgeec. Meficgema mehama nonggea Lea miec. Miu Rahelngo hemma Lea yofi dema edeec, “Medacgango mandrago gbomea mehadac imoc goa ni naric nembang me?”

¹⁵ Ifi deu ine Leango yofi deec, “Ge ewena wangecnunec imoc negenna wiac kapia anu yaguc medacnaac mandrago gbomea ifingoc mebeso denec me?” Ifi deu Rahel ye yofi deec, “Naric, medacgaac mandrago gbomeaac turunga yaguc tofocnac ewenira ye gegoc naric feude.” Ifi deec.

¹⁶ Anu Yacakow ye marai uaunac hasikeu Lea ye kemma meficgema yofi dema edeec, “Ni medacnaac mandrago gbomeango ge bummeguduaac ge yaguc tofocnac nigoc febesena.” Ifi deu tofocnac imohai yegoc feec.

¹⁷ Anu Anutungo Lea negemmiu Yacakowac medac mong kpenanggema meu yeni 5 anggec.

¹⁸ Anggec Lea ye yofi deec, “Ni wanacnaroanna ewena miaiac Anutungo medac mong nende.” Ifi dema kpara Issashar kparec.

¹⁹ Anu imocac ngadeau Lea ye Yacakowac medac monggoc kpenanggema meu yeni 6 anggec.

²⁰ Anggec Lea ye yofi deec, “Anutungo sese gombunga nenu ewenaac medacfora 6 meyunuai imocac yaguc eweheiheigoc anennude.” Ifi dema kpara Dzewulun kparec.

²¹ Imoc yeneac ngadeau naroang mong mema kpara Dina kparec.

Rahelngo Yosef meec

²² Anu Anutungo Rahelac negensima nunumuya negemma medac fingecgecdeac sing memiec.

²³ Memiu ye medac kpenanggema mema yofi deec, “Anutungo gamena wangecnude.”

²⁴ Ifi dema kpara Yosef kparec, “Kebungo medac mong torokpema nembeso dema naric nenude.”

Yacakow ye Lawanggoc uabunggac yoac mengereec

²⁵ Anu Rahel ye Yosef meu Yacakowngo Lawan yofi dema edeec, “Ni amabangecnau fainuna kembesare.

²⁶ Ni geac enac tofoc tofoho ua naso herea mekefai imoc ge geanggaoc negennecac enenghocna nga naroangmedacfocna desinendacna wangecyunu kembesare.”

²⁷ Ifi deu Lawangngo edema yofi deec, “Ge neac negenna ngereeudeu yoac mong deba negenna. ‘Kebungo geac amma ni kenecnuu finactoanagoc anduae.’ ”

²⁸ Ifi dema yofi deec, “Uagaac bung dena imocacsoc gembade.”

²⁹ Ifi deu Yacakowngo yofi deec, “Ni geac enac tofoc tofoho ua dafi mekefai nga ramaburumakafocga garengyunubareng dafi anggec imoc ge geanggaoc negennec.

³⁰ Ni mi hayai naso imohai ramanoningfocga efeanecsac kecgec. Yaguc ine fingecsahe amma habutoa anggec kecdae. Nga ni noboc noboc kengha amba Kebungo uana geac amma kenehedarec. Yaguc ine ni enengmedacfocna yeneac amma ua mema meficyunubadeac negenduae.”

Ramanoning kibi kibi yeni Yacakowac anggecdeac deoc

³¹ Ifi deu Lawangngo kpesimiec, “Anu ni noc wiac gembadeac negennec?” Kpesimiu meremmiec, “Ge wiac mong bic mi nembesena. Ni yoac negenduae imoc deba negenna naric annadeu ine ramanoninghabufocga monggoc garengyunuma kecbade.

³² Imoc yofi, ni yaguc ramanoningfocga habuya habuya kemma hennegeng ambade. Ifi amma rama gboria yenearunac tiko piriko nga faikperecge sasawa meisingyunuma meicyunubade. Meicyunuma ramamedaha dzadzu dzadzu sasawa meicyunubade. Nga noning siricngina ifiangoc meicyunuba ramanoning imoc yeneng neac ua bunna ambisia.

³³ Nga wiac mebade imoc soha me kpac, imocac hania ngadeguc fingectegerude. Ni faka dindingac modacdua imoc hennade. Ge kecma bunna hembeso hama noning yeneac botucfu tiko pirikosac kpac me ramamedaha yeneac botucfu dzadzu dzadzusac kpac, goa momoc kecgecde ifi meficyunuma yofi debesena. Ge yeni hamangec meyunudang.”

³⁴ Ifi deu Lawangngo yofi deec, “Naric, denec isoc fingecbeso.”

Yacakow ye ramanoning garengyunuu homac anggec

³⁵ Lawan ye ifi dema kemma uameme imohaingoc noningngiwa kibi kibi nga tiko piriko amma noning ngagera rama faikperecge nga tiko piriko sebingina kapianec kongac kongac anec imoc sasawa meicyunuma ramamedaha dzadzu dzadzu ifingoc meyunudacma imoc sasawa medacfora yeneac mariu faiyunudarec.

³⁶ Anu ye yengena nga medacfora Yacakow wama uameme harebecacsoc bangec goa ferahema sing kengkecma bangec monnu sikegec. Anu Yacakow ye Lawanggac ramanoning tosea garengyunuma kefec.

³⁷ Anu Yacakow ye ic kpacngina popela nga almond manau amma mapel, imoc yenearunac yasu gboria heima sebera botuhau kpetiu mana kongac kongac fingeru kibi kibi anec.

³⁸ Ifi amma yasu kpeti kpetia imoc rama yeneac dokusingnginau nga ototoanginau fau kemeec. Fau kemeu rama yeni doku imohai negecdeac kengha angkecgec naso imohai kicnginau yasu imoc fau fekefec. Imoc yofiac, yeni doku negecdeac hama ngiwa yeni ngagera feracyunuandae.

³⁹ Ifi anu ramahabu yeni hama ngiwa yeneng yasu wegenahau ngagera feracyunugec kecma medacfocngina tiko piriko nga faikperecge ifi meyunugec.

⁴⁰ Anu Yacakow ye ramamedaha meicyunuma habu tosea ayemmeu Lawanggac rama habuya habuya tiko piriko nga dzadzu dzadzu yenearubigeng kic fima nanggec. Ye ifi amma yengena habu mong tembuc faiyunuma Lawanggacgoc mi kpeturangyunuec.

⁴¹ Anu rama seria yeni feracemebeso anggecsoc Yacakowngo kicnginau yasu imoc otonginau fau kemeande. Imoc yeni yasu hemma feracemegecdeac ifi anec.

⁴² Anu ramanoning kucngina kpac yeneac kicfu yasu mi faiec. Ifi anu ramanoning kucngina kpac, imoc yeni Lawanggac anggec nga kucnginagoc imoc yeni Yacakowac.

⁴³ Ye ifi yombong amma finac monggoc nga monggoc meficgeec. Anu ye rama amma wanacngicngacfora nga kamelefora amma donggifora imoc sasawa homac anggec.