Fingec fingec 29 - Deduamiti

Yacakow ye Lawanggaru kensikeec

¹ Anu Yacakow ye wenac ere ereaubigeng ngicngac kecgec yeneac bangecfubigeng kengkefec.

² Kengkecma kic fiu kenu uau dokuteng mong henec. Henu imohai ramahabu harebec fegec. Amabangec imocac mingina yeni dokuteng imohacnac ramaburumakafocngina doku gumecyunuandae. Nga dokuteng enarau ine hoctoango hedzickema tarec.

³ Anu doku imohai rama habuya habuya kpedzucnedacgec ine ramagareng yeni dokuteng enarau hoc imoc kpedidinggema doku gumecyunuma hoc imoc monggoc enarau hedzickegec tacande.

⁴ Anu Yacakow ye ramagareng yenemma kpesiyemmeec, “Tosofocna, ngeni dahacnac hadae?” Ifi deu yeni yofi meremmigec, “Neni Harannac.”

⁵ Ifi degec yofi dema kpesiyemmeec, “Ngeni Nahor esea Lawan ye negemmidae me?” Ifi deu yeni yofi meremmigec, “O, negemmidimbe.”

⁶ Ifi degec kpesiyemmema yofi deec, “Ye naric kecde me?” Ifi deu yeni yofi meremmigec, “Ye naric kecde nga naroanga Rahel ye edimoc ramahabu wangecyunu hade.”

⁷ Anu Yacakow ye yofi deec, “Negendae, wenac nandengoc rama meyunu kenggecdeac naso mi ande. Imocac amma doku gumecyunuma faiyunugec kemma kpindzing monggoc negec.”

⁸ Ifi deu yeneng ine yofi degec, “Rama habuya habuya mi hadacmagec imoc naric mi annide. Hadacgec ine teng enarau hoc tacde imoc kpedidinggema doku gumecyunuandimbe.”

Yacakow ye Rahelac memeficua meec

⁹ Anu Yacakow ye yenigoc yoac denegeng amma nammagecngoc Rahel ye mamaac rama meyunuma hasikeec. Ye yeneac gareng kefec imocac amma wangecyunuma haec.

¹⁰ Nga Yacakow ye aniha Lawanggac naroanga Rahel nga anihaac ramahabu yenemma kemma dokutennunac hoc kpedidinggema anihaac rama doku gumecyunuec.

¹¹ Amma ye Rahel kokockema kiarec.

¹² Kiacma Rahel yofi dema edeec, “Ni sactosoga, manggaac naina Riweka yeac medac.” Ifi deu Rahel ye nedzima kemma mama edeec.

¹³ Edeu Lawan ye deuya Yacakowac siduc negemma ye henudeac nedzima kemma tofohoma kokockema ameau wangecma enec. Enu ye siduha sasawa Lawan ammidarec.

¹⁴ Ammidaru Lawangngo yofi dema edeec, “Fora, ge sactosona yombong annec.” Anu Yacakow ye afo mocgu yegoc kefec.

Yacakow ye Rahelac yoac deec

¹⁵ Anu Lawangngo Yacakow yofi dema edeec, “Ge deuyombonnango enacna tofohoma eng kecnade imoc mi ngereude. Noc wiac menadeac negennec imoc edenuna.”

¹⁶ Anu Lawan ye naroanghora yohockang kefoc waracnaroanga kpara Lea nga yeac bageau kpara Rahel.

¹⁷ Lea ye kiwa gombunga nga Rahel ye ine kic nga siriha hafoangoc gombunga yombong.

¹⁸ Nga Yacakow ye songea Rahelaru feecac amma yofi deec, “Ni naroangga Rahel mebadeac kifa seweng enactofoc tofohoga kecbade.”

¹⁹ Ifi deu Lawangngo yofi meremmiec, “Ngicareng mong mi yemmebade. Ge gemba naric anude. Imocac amma ge nigoc kecbesena.”

Lawan ye amabangec imocac faka modarec

²⁰ Anu Yacakow ye Rahelac amma kifa seweng yeac enac tofoc tofohongic kefec. Ye Rahelac songo kuneng negenecac amma kifaac negenu uameme efeanec isoc anec.

²¹ Anu kecma kifa imoc wisickeu Yacakowngo Lawan yofi dema edeec, “Naso bic wisickedacac ni enennagoc febadeac negenduae imocac amma yaguc nenna.”

²² Ifi deu Lawan ye imocac yaka ohoma ngicngac heitaiyunuu hama yaka imoc negec.

²³ Ama toforeu ye ine naroanga Lea wangecma emma Yacakowaru faiec. Fau yegoc feoc.

²⁴ Anu Lawan ye wanacnaroanga Dzilepa naroanga Leaac enac tofoc tofoho kefudeac miec.

²⁵ Anu ama wereckenuguc ine Yacakow ye henec imoc Lea. Ifi hemma ye kemma Lawan yofi dema edeec, “Ge noc faka anendang? Ni Rahelac amma geac enac tofoc tofohoua mekefai. Ge nocac tobannudang?”

²⁶ Ifi deu Lawangngo yofi meremmiec, “Amabangec yomocac faka yofi fede waracnaroang yeni eng kecmagec munafocngina ngicfu faifaiyunu imoc sing mong mi fede.

²⁷ Imocac sonda mocgu tomai kecna wisickeu Rahel ifingoc gennide anu yeac amma torokpema kifa seweng monggoc neac enac tofoc tofoho kecbesena.”

²⁸ Anu Yacakow ifi amma Leagoc kefu sonda mocgu wisickeec. Wisickeu Lawan ye naroanga Rahel miu meec.

²⁹ Anu Lawan ye Rahel enac tofoc tofohongac kefudeac wanacnaroanga Bilha miec.

³⁰ Anu Yacakow ye Rahelgoc feec. Nga ye songea yearu kuneng feec nga Leaac kapianec femiec. Amma ye kifa seweng torokpema Lawanggac enac tofo tofoho kefec.

Yacakow nambaracfora yeneac kpacareng

³¹ Anu ye Leaac songo mi negenec Kebungo imoc hemmahereagoc anudeac sing meficgeec. Anu Rahel ye ine kufing anec.

³² Nga Lea ye medac kpenanggema mema yofi deec, “Kebungo ubaebicna hennegeng amma meficnudac. Ewena ye yaguc neacsongo negenude.” Ifi dema kpara Recuwen kparec.

³³ Amma imocac ngadeau medac mong kpenanggema meec. Mema yofi deec, “Ubango mi hoannunuya imocac amma Kebungo negennemma yomoc torokpema nende.” Ifi dema kpara Simecon w kparec.

³⁴ Anu yeac ngadeau medac monggoc kpenanggema meec. Mema yofideec, “Ni ewenaac medac harebec meyunudua imocac yeng nearukpeketahaude.” Ifi dema kpara Lewi kparec.

³⁵ Amma imocacngadeau medac monggoc kpenanggema meec. Mema yofi deec, “Yaguc ine ni Kebu dengerebade.” Ifi dema kpara Yehuda y kparec. Imocac ngadeau torokpema medac monggoc mi meec.