Fingec fingec 27 - Deduamiti

Itsakngo Esaw kenehebeso anec

¹ Anu Itsak ye kecma ngickpengeng ammanu kiwa nomaneu wiac mong naric mi henec. Ifi amma waracmedaha Esaw kparu hau yofi dema edeec, “Medacna!” Ifi deu yeng yofi meremmiec, “Ni yomoc.”

² Ifi deu yofi dema edeec, “Negennec, ni bic ngickpengeng anduae nga homecnasona mi negenduae.

³ Imocac amma ge kpenecac wiacga imoc tebenonggea nga medaha mema bangec tumiatoau kemma yang mong kpenembesena.

⁴ Kpema songona fede imocacsoc ohoma mehama nembesena. Mi homebarengoc yang imoc nenna nema kenecgubade.”

Riwekango Yacakow sing meficgemiec

⁵ Anu Itsak ye medaha Esawgoc yoac deu Riweka ye ine kedzac kpema negenec. Nga Esaw ye yang kpema mehaudeac bangec tumiatoau kenu

⁶ Riwekango medaha Yacakow yofi dema edeec, “Negennec, manggango dacga Esaw yofi dema edeu negendua.

⁷ ‘Ge yang mong mehama songona fede imocacsoc ohonenna nema mi homemangoc Kebuac kicfu kenecgubade.’

⁸ Imocac amma medacna, ni yoac edegubade imoc modacbesena.

⁹ Ge noning habunginau kemma noningmedaha yohockang gombunga meisingyuruma mehama nenna neng manggaac songea fede imocacsoc yaka gombunga ohobesare.

¹⁰ Ohoma gemba geng manggaaru meenna nema gbori tacdeungoc kenec imoc ge gembeso.”

¹¹ Ifi deu Yacakowngo nonggea Riweka yofi dema edeec, “Negennec, dacna Esaw ye ngic sebidzotoayagoc nga ni ine sebina pososoc.

¹² Anu manggacngo kpeserenuma negenudeu ni yeac kicfu faitobangngic amba kenecac turunga sowec mebade.”

¹³ Ifi deu nonggeango yofi dema edeec, “Medacna, geac sowec imoc neac witiu embeso. Ge ine sifu enacna tofohoma kemma noning mehama nenna.”

¹⁴ Ifi deu ye kemma noningmedaha mehama nonggea miu nonggeango mamaac songou yombong yaka gombunga ohoec.

¹⁵ Ohoma waracmedaha Esawac wamba gombunga yeac amau tarec imoc mema munia Yacakow heimiu kemeec.

¹⁶ Kemeu noningmedaha yereac sebingo maria nga fuaya amma ubia biranggeec.

¹⁷ Biranggedacma noning songea nga icsogong ohoec imoc medaha Yacakowac mariu faiec.

Yacakowngo mamaaru kenec

¹⁸ Fau ye mamaaru mekemma yofi deec, “Manggac.” Ifi deu mamango yofi deec, “Medacna ni yomoc.” “Ge merac?”

¹⁹ Ifi deu Yacakow ye mama yofi dema edeec, “Ni waracmedacga Esaw, yoac edenudang imoc andacdua. Imocac ge yacma tacma yangga nema kenecnuna.”

²⁰ Ifi deu Itsakngo medaha yofi dema kpesimiec, “Medacna, ge dafi amma yang hofocma bic yombong meficgedang?” Ifi deu yeng yoac turunga yofi meremmiec, “Kebu, geac Anutungo fau fingeru bic meficgegendua.”

²¹ Ifi deu Itsakngo yofi dema edeec, “Medacna, hana kpesereguma negemma ine ge medacna Esaw me kpac, imocac hania fingectegeru negemba.”

²² Negemma Yacakow ye mamaaru wegenac kenu mema negemma yofi deec, “Ubaudumengga negemba Yacakowac yoac ande nga mariga ine mema negemba Esawac mari ande.”

²³ Maria mema negenu Esawac mari isoc dzoyagoc anu mi negemma keneheec.

²⁴ Nga monggoc yofi dema kpesimiec, “Ge fora medacna Esaw me?” Ifi deu Yacakow ye meremmiec, “O, ninoc.”

Itsak ye yaka nema Yacakow keneheec

²⁵ Ifi deu yofi deec, “Medacna kateyang kpedang imoc mehama nenna. Nema kenecgubade.” Ifi deu mema miu neu waingdoku momoc mehama miu neec.

Kenecyoac

²⁶ Nema mama Itsakngo yofi dema edeec, “Medacna, wegenac hama kokocnuna.”

²⁷ Ifi deu ye wegenac kemma kokockeec. Kokockeu ngakpia homuna negemma yoac yofi dema keneheec, “Medacnaac ngakpi homuna imoc Kebungo bangec tumiatoa keneheec ifi isoc.

²⁸ Anutungo sawaac dzimbong nga bangec kerec miu wit nga yagong nga waing gboria amma uagau wiac sasawa keneheu fora homac fingeru.

²⁹ Ngiha ngiha yeni geac enac tofoc tofohongic kecbisia amma ngicngac habuya habuya yeni ge ngonducnegembisia. Ge ine dacmunafocga yeneac ngic kunengngina ambesannec. Nga nonggogaac medacfora yeni ge ngonducnegembisia. Nga ge sowecgugecde yeni sowecnginagoc nga ge kenecgugecde yeni kenecnginagoc anggecde.”

Esaw kenec meudeac Itsakaru haec

³⁰ Anu Itsak ye Yacakow keneheu wisickeu Yacakow ye mama wama maec imohaingoc dara Esaw ye kateyang kpema dzigenema haec.

³¹ Hama ye ifingoc yaka gombunga ohoma mamaaru meemma yofi deec, “Manna, ge yacma medacga neac kateyang nema kenecnuna.”

³² Ifi deu manggaha Itsakngo yofi dema kpesimiec, “Hei, ge merac?” Ifi deu yeng yofi meremmiec, “Ni waracmedacga Esaw.”

³³ Ifi deu Itsakngo kpidohoma dzonoma homac yombong fedeu yofi kpesimiec, “Ge mi hamana merang kateyang kpema ohoma mehama nenu nema kenehedua? Kenec imoc yearu fefeseri fekefude.”

Esawngo kiarec

³⁴ Ifi deu Esaw ye mamaac yoac imoc negemma kiac hodung hodung homac yombong kiacma mama yofi dema edeec, “Manggac, ni ifingoc sifu kenecnuna.”

³⁵ Ifi deu Itsak ye ine yofi deec, “Munagango hama faitobang anemma kenecga bic mema kendac.”

³⁶ Ifi deu Esaw ye yofi deec, “Ye ikoc anu naso yohockang ande imocac naric kpara Yacakow kpacgec. Ye warac fingec fingecac kucna bic wangecnuec amma negennec, yaguc kenecna wangecnudengoc.” Ifi dema torokpema yofi deec, “Neac onga kenec mong mi wana fedac me?”

³⁷ Ifi deu yofi meremmiec, “Negennec, ye geac kunengga amma kefudeac faidua nga namanebecfora sasawa yeni yeac enac tofoc tofoho kecgecdeac dedua. Nga wit nga yagong amma waing gboria uayau fingerudeac dedua. Imocac medacna dafi anggembade?”

Itsak ye Esawac kpefingyoac deec

³⁸ Ifi deu Esaw ye manggaha monggoc kpesimiec, “Manggac, kenecga mocgu imocsac fedac me? Manggac, ni sifu kenecnubesenangoc.” Ifi dema ye ubaudumeng kunengngoc amma monggoc kiarec.

³⁹ Ifi anu mamango yoac turunga yofi merenec, “Negennec, ge bangec kereha mi fede nga kurumennunac dzimbong mi maande imohai amagerecga menade.

⁴⁰ Nga ge dzikacbeangngo ewema kecma yaka meficgenade nga munaga kingang kpeminade. Nga ge modzoga tiu munagaac tofo hembarackema fuagaunac meickema ukunade.”

Riweka ye Yacakow arengfora yenearu kenudeac edeec

⁴¹ Anu Esaw ye mamango Yacakow keneheec imocac amma Yacakow ubango waec. Amma negen negengau yofi negenec, “Mannaac kiac songgong naso wegenede imocac ngadeau munana Yacakow kpebucgebade.”

⁴² Anu Riweka ye waracmedahaac yoac imoc edegec negemma medaha Yacakow deu hau yofi dema edeec, “Negennec, dacga Esaw ye faitobang amminecac turunga kpouma kpebucguudeac dedac.

⁴³ Imocac amma medacna, ni yoac deba negemma modabesena. Ge bic yombong yacma Haran taonnu worama neac nainna Lawanggaru kemma kecbesena.

^44-45 Ngeri uameme mocgungoc ni wanubaocac ge kemma yegoc ihai naso dafiguc kecmana dacga herebuya kuha mabeso. Nga ge dacgaac faka ammidang imoc nigeckpeu herebuya kuha mau ni gearu yoac faiba hau negemma dzigenema habesena.”

⁴⁶ Anu Riweka ye Itsak yofi dema edeec, “Ni hitingac yereac modzona tiande. Amma Yacakow ye ifingoc hitingic yeneac naroangfocngina, bangec yomocac mingina yenearunac mong meudeu ni kecbadeac modzona tiude.”