Fingec fingec 26 - Deduamiti

Anutungo Itsakgoc yoac dzegeec

¹ Anu kecma bangec imohai boditoa monggoc fingerec. Warac Awraham kecmanu mong fingecma feec. Imocac amma Itsak ye pelistingic yeneac ngictaungina Awimelec yearu Gerar taonnu kenec.

² Kemmanu Kebungo Itsak fingecmima yofi dema edeec, “Ge Aigita bangecfu mi kembesena. Neng bangec edegubade imohai ine kemma kecbesena.

³ Bangec yomoc sasawa ge nga bangecfocga ngemmebesanduaeac ge bangec yomohai kecna ni gegoc kecma kenecgubade. Imoc mangga Awraham deserimiai imocac fora fingerudeac ambade.

⁴ Nga bangecfocga yeni negengyemmeba fingecsahe homac amma sawau asomeng tackendae ifi isoc ambesandae. Nga ni bangec yomoc sasawa bangecfocga yeni yemmebade. Anu bangecgaac arennu ngicngac bangeha bangeha kenecyunudacbesandua.

⁵ Imoc yofiac, Awraham ye dederecgeyoacna negemma modackefec nga nonoyoacna nga singyoacna amma dedeseriyoacna sasawa negemma tofohodarecac ifi ambade.”

Itsak nga Awimelec

⁶ Ifi deu Itsak ye Gerar taunnungoc kefec.

⁷ Nga bangec imocac ngic yeni enemaac dekpesi homac ammigec yofi dema edeyunuec, “Imoc nainna.” Ye enenna, ifi deudeac kengec kpeu negen negengango yofi negemma ifi deec. Riweka ye kicsiriha gombunga yombong. Imocac amma deficgebade isoc bangec mingina yeni yeac amma kecma kpebucnubauac.

⁸ Anu imohai kecma naso monnu enema Riweka tofohoma titikokoc ammiec. Ammiu ngictau Awimelec ye firangnaguusing yerenec.

⁹ Yeremma Itsak deu hau yofi deec, “Negennec, ye fora enengga. Nga ge hania nocac ye nainna denec?” Ifi deu Itsakngo deec, “Imoc yofiac, ni yeac amma homebaiac ifi deai.”

¹⁰ Ifi deu Awimelecngo deec, “Ge wiac kuneng yombong anemmedang. Arengfocna yenearunac mongngo enenggagoc fefea efea fingecbacacsoc anu neni geac amma kopocsicninagoc ambing.”

¹¹ Ifi dema ngicngacfora yofi dema edeyunuec, “Mong ye ngic yomoc enemagoc faka me wiac mong ayecmeudeu ye homecac areng anude.”

Bangec usuma doku meficgegec

¹² Anu Itsak ye bangec imohai kecma ua heihomec anu Kebungo keneheu kifa imohai semengtoagoc yombong anu witgbomea mocguarunac handred fingerec.

¹³ Ye ngic kpac kunenggoc yombong anec. Anu dzofinaha monggoc monggoc amma ngic dzofinactoayagoc yombong anec.

¹⁴ Anu ye ramaburumaka habuya habuya mekefecac amma enac tofoc tofohofora homacngoc meyunuma kefec. Imocac amma pelistingic yeni hemma keracmangang ammima

¹⁵ dokuteng sasawa mamaac enac tofoc tofohongic yeneng mama Awrahamgoc kecma usugec imoc pelistingic yeni bangec figec kemeu semedacgec.

¹⁶ Ifi anggec Awimelecngo Itsak yofi dema edeec, “Ge kucgagoc amma neni feracnununecac bangec monnu kemma kecna.”

Itsak ye bangec usuma doku meficgeec

¹⁷ Ifi deu Itsak ye amabangec imoc wama kemma Gerar tumiau kporucamangina kpedziu imohai tacyac angkefec.

¹⁸ Amma dokuteng mama Awraham kecmanu uangicfora yeneng usugec nga pelistingic yeneng mama homeu monggoc semedacgec imoc Itsakngo monggoc medzuacma usugecdeac uangicfora edeyunuec. Amma dokuteng imocac kpara mamango kparec imocngoc kpacdarec.

¹⁹ Anu Itsak enac tofoc tofohongicfora yeneng tumiau teng mong tarec imohai usuma dokukiwa mong meficgegec.

²⁰ Meficgegec Gerar ramaburumakagareng yeni ine Itsakac ramaburumakagareng yenigoc enacenac amma yofi degec, “Doku imoc neneac.” Ifi degec imocac amma doku kpara Esek kparec.

²¹ Amma imocac ngadeau dokuteng mong monggoc usugec imocac ifingoc yoac deemegec. Ifi anggec doku imocac kpara Sitena kparec.

²² Ifi anggec ye bangec imoc wama monnu kemma dokuteng mong usuec nga doku imohai ine yoac mong mi degec yofi deec, “Kebungo yaguc bangectitinga meficgenemmeu ihai seregurutoa annide.” Ifi dema kpara Rehobot kparec.

²³ Anu ye imohacnac Becer Sewa kenec.

²⁴ Kenu tofocnac imohaingoc Kebungo Itsak fingecmima yofi deec, “Ni gegoc kecduaeac ge kengec mi guu. Ni mangga Awrahamgac Anutu nga ni ge kenecguma bangecfocga yeni enac tofoc tofohongicna Awrahamgac amma mesaheyunubesandua.”

²⁵ Ifi edeu Itsak ye imohai arata mong mema Kebuac kpara kpacma dengerema eweheihei ammiec. Amma kporucamaya imohai kpedzima tacyac anec. Ammanu enac tofoc tofohongicfora yeni imohai dokuteng mong usugec.

Awimelec ye Itsakgoc dzadzahac anoc

²⁶ Anu naso monnu Awimelec nga ogea Ahudzat nga yeac wasaingic yeneac kapten yerigoc Gerar bangecfunac kengsikegec.

²⁷ Hasikegec Itsakngo yofi dema kpesiyemmeec, “Ngeni ngaba anemma kisannugec hayai anu ngeni yaguc nocac nearu hadae?”

²⁸ Ifi deu yeni yoac turunga yofi meremmigec, “Kebungo gegoc kecde imoc neni hentegecma yofi negending. Nenang botucninau demeseriyoac deni feu gegoc dzadzahac yofi ambisina.

²⁹ Neni ge faka mangana mong mi anggening i. Faka gombunga anggemma ruaeu faiguni hanec ifi isocngoc ge faka mangana mong mi anemmebesena. Ge Kebungo yofinenggac kenecguyombonggeu kecnec.”

³⁰ Ifi degec Itsakngo yakatoa ohoma nenedoku yemmeu negec.

³¹ Anu ama wereckenu asoac yacma ogo ogoac fakau demeseriyoac dema dzadzahac anggec. Ifi amma Itsakngo ruaegoc faiyunuu kenggec.

³² Kemmagec uameme imohaingoc Itsak enac tofoc tofohongicfora yeni hama dokuteng mong usugec imocac yoacsiduc amma yofi dema edegec, “Neni doku meficgeding.”

³³ Ifi degec doku imocac kpara Siwca kparec. Imocac yaguc bangec imocac kpara Becer Sewa kpacandaengoc.

Esaw ye hitingac meyuruec

³⁴ Nga Esaw ye kifaya 40 ammanu hitingic Becer yeac naroanga kpara Yehudit meu enema anec amma hitingicngoc mong kpara Elon yeac naroanga Basemat ye momoc meec.

³⁵ Anu erangihocngira imoc yeri Itsak nga Riweka ubamangang homac meficgeyemeroc.