Fingec fingec 25 - Deduamiti

Awraham nga Ketura ngaboesamedacfocngira

¹ Awraham ye monggoc ngac mong meec yeac kpara Ketura.

² Yeng yeac medacfora yofi meyunuec, Dzimeran, Yokesan, Medan, Midyan nga Yisebak amma Sua.

³ Nga Yokesanggarunac ine Sewa nga Dedan yeri fingeroc nga Dedanggac medacfora yofiguc fingecgec, assuringic nga letusingic amma lecummingic.

⁴ Nga Midyan medacfora yofiguc fingecgec, Efa, Efer, Hanoc nga Awida amma Eldaca, ngic imoc yeni sasawa Keturaac esamedacfora.

⁵ Anu Awraham ye dzofinaha nga wiaha sasawa imoc Itsak midarec.

⁶ Nga wanacenengfora yeneac medacfocngina yeni ine sese goa yemmema Itsakgoc mi kecgecdeac dema wenac ere ereaubigeng bangec fede imohai sueyunuu kendacgec.

Awraham homeu tonggogec

⁷ Anu Awraham ye kecmanu kifaya 175 ammanu

⁸ ngickpengeng yombong amma kekecnasoya soha anu asuya wisic wisickea heima homema kemma arengfora homegec yenearu torokpeec.

⁹ Anu medachora Itsak nga Ismacel yereng Mahpela hocsingau tonggooc. Hocsinga imoc hitingic Tsohar medaha Efronggac uau feec. Ua imoc Mamereu wenac ere ereaubigeng feec.

¹⁰ Awrahamngo ua imoc Het ngicngac yenearunac warac bummeec. Imohai enema Sara tonggogec nga ngadeguc Awraham imohai ifingoc tonggogec.

¹¹ Awraham homeec imocac ngadeau Anutungo medaha Itsak keneheec. Nga Itsak ye Becer Lahai Roi imohai tacyac angkefec.

Ismacelac siduc tosea 25:12-18 Ismacel esamedacfora

¹² Awraham ye medaha Ismacel Saraiac wanacngac aigitangac Hagar yearunac meec. Amma yomoc Ismacel yearunac ngic fingecgec yeneac siduc.

¹³ Ismacel medacfora yeneac kpacngina fingeceregecsoc yofi, waracmedaha Newayot yeac ngadeau Kedar nga Adebecel, Miwesam,

¹⁴ amma Misema, Duma nga Massa,

¹⁵ Hadad, Tema, Yetur nga Nafis amma Kedema.

¹⁶ Ngic imoc yeni Ismacelac medacfora. Kpacngina imoc bangecngina nga kporucamangina tackenecsoc kpacyunugec. Yeni habunginasoc ngictau medacfora 12 kecgec.

¹⁷ Nga Ismacel ye kecma kifaya 137 ammanu asu wisic wisickea heima homema arengfora yenearu torokpeec.

¹⁸ Anu Ismacel bangecfora yeni Hawila kemma Sur imohai kecgec. Bangec imoc Aigita bangecfu wenac ere ereaubigeng Assur sinnu feec. Anu ye dacmunafora sasawa yenigoc ngaba amma kefec.

Itsakac siduc tosea 25:19–35:29 Esaw nga Yacakow fingeroc

¹⁹ Yomoc Awraham medaha Itsak yeac fingecsaheac siduc. Awraham ye Itsakac manggac

²⁰ nga Itsak ye kifaya 40 ammanu enema Riweka meec. Riweka ye ine Paddan Aram bangecfunac aramngic Betucel naroanga nga aramingic Lawanggac naina.

²¹ Anu Itsak ye enema kufing kefecac amma Kebu numumiec. Numumiu Kebu ye Itsakac nunumu negemma turunga meremmiu enema Riweka ye medac kpenanggeec.

²² Nga kogoc yohockang yeri nonggo heremanau engereemeec yofi negenec, “Ifi fingeru dafi kecbade?” Ifi negemma kemma Kebu kpesimiec.

²³ Kpesimiu yofi dema edeec, “Heregau areng yohockang tacdape. Nga ngichabu yohockang gearunac fingecma faiemeecde. Mongngo seseri amma mong ferahaude nga darango ine muneaac kingang kpebesande.”

²⁴ Anu medacmeme nasoya hau yofi anec foratombosonga hereau taroc. Kebungo edeec, faka ifi fingerec.

²⁵ Anu warac warac fingerec yeac sebia imoc sacsac nga sebidzotoaya ngakpitoa dzoeyagoc isoc anec. Imocac amma kpara Esaw kpacgec.

²⁶ Nga imocac ngadeau munia fingerec. Nga ye mariango Esawac gofocfu mema fingerecac kpara Yacakow kpacgec. Itsak ye kifaya 60 ammanu medachora fingeroc.

Esaw ye waracmedacac kuc yakaac amma sueec

²⁷ Medac yeri kecma yadima Esawngo kpenecac ua mema imocac hania gombunga yombong negemma bangec tumiatoa imohai yerecgema kefec. Nga Yacakow ye ine ngic yumia amma ye kpeboronga kpac kporucbedzou tacyac amma uaya henggareng amma kefec.

²⁸ Anu Itsak ye kateyang neudeac songea angkefecac Esawac songo negengkefec nga Riweka ye ine Yacakowac songo negengkefec.

²⁹ Kecma naso monnu Yacakow ye yaka kurungagoc ohoma tacmanu Esaw ye bangec tumiatoau kefecfunac hama hereaac homema kuha kpac yombong anec.

³⁰ Ifi amma yofi dema munia edeec, “Ni kucna kpac yombong andeac wiac sacsac imoc mong nenna neba.” Ifi deec imocac yeac kpara mong Edom kpacgec.

³¹ Ifi deu Yacakowngo yofi deec, “Ge yaguc waracmedacac kuc ni desinennadeu kurung gemba nenade.”

³² Ifi deu meremmiec, “Negennec, ni homebeso anende imocac warac fingec fingecac wiac neac dedea imocngo naric mi meficnuude.”

³³ Ifi deu yofi deec, “Yaguc fora yombong deserina.” Ifi deu deserimima warac fingec fingecac kuc Yacakow desimiec.

³⁴ Deseriu Yacakow ye icsogong nga lentilbesec sacsac oho ohoya imoc miec. Miu ye nenedoku imoc nema yacma kenec. Nga Esaw ye ifi amma warac fingec fingecac wiac yeac dedea imocac negenu wiac mamea isoc anu wama muniaac desimiec.