Fingec fingec 23 - Deduamiti

Sara homeec

¹ Anu Sara ye kecma kifaya 127 ammanu homeec. Ye kifaya ifiguc ammanu

² Kenacan bangecfu Kiriat Areba imohai bangecsebi waec. Nga bangec imocac kpara mong Heweron. Homeu Awraham ye ubamanganggac songgong yearu kenec.

Mahpela uau hocsinga feec imoc meudeac negenec

³ Ye kiac ubamangang angkecma enemaac fareng feecfunac yacma Het ngicngac yenearu kemma yofi dema edeyunuec,

⁴ “Ni ngeneac botucfu naso wegenanecsac kuric kecduae imocac ngeni bangec mong kicsereac desinenggec enennaac farenga tonggoba imoc hoannau mi febeso.”

⁵ Ifi deu Het ngicngac yeni Awraham yofi dema edegec,

⁶ “Kunennina, yoac edeguni negenna. Ge ngictauac medac Anutungo faiguu botucninau kecnec imocac kicserenina mong gombunga meisinggema enenggaac fareng ihai tonggobesena. Nenearunac mongngo imoc tonggonadeac kicsere naric mi segeregenude me kpae mi faigenude.”

⁷ Ifi degec Awraham ye yacma bangec mingina Het ngicngac yeni eweheihei fakau ngonducneyemmema yofi dema edeyunuec,

⁸ “Ni enennaac farenga hoannaunac mekemma tonggobadeac negenggec naric andeu deba negenggec. Tsohar medaha Efron

⁹ yeac bangec tosea wisic wisickeau Mahpela hocsinga fede imocac mingina kecde. Anu ngeni neac enac mema ye edegec yeng hocsinga imoc neac anudeac desibeso. Imoc kicnginau silwadzongo meba hocsing imocngo neac kicsere ua anudeac bung deude imocacsoc mibade.”

Mahpela ua bummeudac Efronggoc denegeng anoc

¹⁰ Ifi deu Efron ye Het ngicngac sasawa kpedzucyunuma taong naguu tacgec yeneac botucfu tacma ngic yeni negemma tacmagec Awraham yofi dema edeec,

¹¹ “Kunenna, ifi kpac, deba negenna. Bangectosea imoc desigenduae amma uau hocsinga fede imoc momoc desigenduae. Ogofocna momoc negemma tacmagec desigenduae imocac enenggaac fareng imohai tonggobesena.”

¹² Ifi deu Awraham ye bangec mingina ngonducneyemmema bangec mingina tacmagec Efron yofi dema edeu negendacgec,

¹³ “Imoc naric, amma sifu negennenna ni bangecac bung gemba mebesena anu ni enennaac farenga imohai tonggobade.”

¹⁴ Ifi deu Efrongngo Awraham yofi dema edeec,

¹⁵ “Kunenna, ge deba negenna. Bangec imocac buma silwadzo 400 ande nga nerang imocac botucnirau yoac mong mi dede. Ge sifu enenggaac farenga ihai tonggobesena.”

Mahpela ua silwadzo 400ngo bummeu yeac anec

¹⁶ Ifi deu Awraham ye Efronggac yoac negemma Het ngicngac negemma tacmagec silwadzo kpetea deec imocac sirihau ebiha mema miec. Ngic wiac bummegecdeac faiandae yeneng silwa kpetea negengandae imocac siricfu silwadzo 400 miec.

¹⁷ Awraham ye ifi amma Efronggac ua Mamereu wenac ere ereaubigeng Mahpelau feec amma hocsinga nga ic sasawa ua imohai nangkenggec imoc hafoangoc bummeu desimigec.

¹⁸ Imoc Het medacfora yeni bangec mingina nga ngic negenniac Efronggac taong naguusing hadacma henggec yeneac kicfu bangec imoc yeac anec.

¹⁹ Anu imocac ngadeau Awraham ye enema Sara Mahpela uau hocsinga feec imohai tonggoec. Mahpela imoc Mamereac edibigeng imoc Heweron ama nga imoc Kenacan bangecfu feec.

²⁰ Imocac amma Het medacfora yeni ua nga hocsinga imoc momoc sasawa Awrahamgac kicsere ua anudeac desimigec yeac anec.