Fingec fingec 22 - Deduamiti

Anutungo Awraham faitobannu faiec

¹ Wiac imoc wisickedaru Anutungo Awraham tobanggema yofi deec, “Awraham.” Ifi deu yeng yofi meremmiec, “Ni yomoc.”

² Ifi deu Anutungo yofi deec, “Ge medacga Itsak mocgusac yeac songo kuneng negengannec yenoc geanggaoc Moria bangecfu wangecma kemma tiki mong edzacgubade imohai ye ni sesegerec anembesena.”

³ Ifi deu Awraham ye asoacngoc yacma donggiya mengerema enac tofoc tofohohora yohockang nga medaha Itsak hesicyunuec. Amma hosuc oho ohoac gerec hendzicma mema yacma Anutungo bangec deecmoc imohai kenggec.

⁴ Kengkecmagec uameme harebec ammanu Awrahamngo kic fiu enu bangec deecmoc edi feu henec.

⁵ Feu hemma enac tofoc tofohohora yofi dema edeyuruec, “Ngeri donggigoc yei tarec ni medacgocsac edimoc emma Anutuac kicfu ngonducnemaguc ngerearu monggoc dzigenema madede.”

Awraham nga Itsak tikiu enoc

⁶ Ifi dema Awraham ye sesegerec oho ohoac gerec mema medaha Itsakac witiau faiec. Nga ye yengena ine gerec dzedzea nga soe meec. Meu yerahafocngoc kenoc.

⁷ Sinnu kemma Itsakngo mama Awraham yofi dema kpesimiec, “Manggac.” Deu deec, “Oc, medacna dena.” Deu medahango yofi deec, “Negennec, gerec mosora nga feranga imoc mekecdipe nga sesegerec ohodede imocac rama damoc?”

⁸ Ifi deu Awrahamngo yofi deec, “Medacna, Anutu yengenaoc sesegerecac rama meficgeude.” Ifi deu yerahafoc kenoc.

⁹ Kengkecma Anutungo bangec deecfu kensikeoc. Sikema Awrahamngo imohai arata mong mema imocac witiau gerec arenggeec. Faima medaha Itsak hanimaria dzegema arata nga gerec witiau faiec.

¹⁰ Faima maria sinema medaha kpeudeac soe meec.

¹¹ Meu Kebuac angerongo kurumennunac kpacma yofi deec, “Awraham, Awraham.” Ifi deu ye deec, “Ni yomoc.”

¹² Ifi deu yofi meremmiec, “Ge medacgaaru mariga mi sinena nga wiac mong mi ammina. Ge medacga mocgu ye mi segerenendanggac amma ge Anutuac yoac modacma eweheihei ammiannec imoc yaguc negengguduae.”

Sese mong meficgemiec

¹³ Ifi deu Awraham ye dzigenema ngadeau fima henu ramangiwa mong baihango ic gigidangau fau keme gidanggeu nanec. Nanu Awraham ye kemma imoc mema medahaac turunga rama imocngo sesegerec ohoec.

¹⁴ Ifi amma Awraham ye bangec imocac kpara yofi kparec, “Kebungo wiac meficgenende,” imoc yofinenggac bangec mingina yeneng yofi deandaengoc, “Kebungo yengena tikiau wiac meficgenemmeude.”

Dzadzahac meseriec

¹⁵ Anu angero ye kurumennunac Awraham monggoc kpacma yofi deec,

¹⁶ “Kebungo yofi dede, ‘Ge medacyombongga mocgu mi segerema desima faka imoc andang. Imocac amma ni neanna kpacfu deseriduae

¹⁷ ni kenecguyombonggema bangecfocga homac yombong mesaheyunuba sawau asomeng tackendae nga kondunnu sangi fekende ifi isoc ambesande. Nga bangecfocga yeni ngabafocngina feracyunuma yeneac amabangec mema mingina ambesande.

¹⁸ Nga geng yoacna tofohodang imocac amma geac bangecgaac arennu bangecfu ngicngacareng sasawa kenecnginagoc ambesandae.’ ”

¹⁹ Ifi deu Awraham medahagoc yeri enac tofoc tofohohora yerearu dzigeneoc. Dzigeneec yeni yacma yenahafoc Becer Sewa bangecfu kenggec nga ye wiacforagoc imohai tacyac anggec.

Nahor nambaracfora yeneac kpacareng

²⁰ Anu wiac imoc wisickedacmanu Awraham siduc yofi dema edegec, “Negennec, Mileka nga munaga Nahor yereac nambaracfocngira fingecgec.

²¹ Yeneac kpacngina ine yofi waracmedaha imoc Uts nga yeac bageau Budzi amma Kemucel ye ine Aram mama.

²² Amma Kesed, Hadzo, Piledas nga Yidelaf amma Betucel.”

²³ Betucel imoc Riweka mama. Awraham munia Nahor yeac enema Mileka ye medac 8 imoc meyunuec.

²⁴ Nga wanacenema kpara Recuma yeng ifingoc yeac medac meyunuec imoc yofi, Tewa, Gaham nga Tahas amma Macaha.