Fingec fingec 21 - Deduamiti

Itsak fingerec

¹ Anu Kebungo deec isocngoc Sara garenggema gombunga ammiec nga deseriec imocac sirihau Sara meficgeec.

² Nga Awraham ye ngickpengeng ammanu Anutungo naso miec imoc hau Sara ye Awrahamgac medac mong kpenanggema meec.

³ Nga Awraham ye Sarango medaha meec yeac kpara Itsak kparec.

⁴ Anu Awraham ye medaha Itsak fingeru uameme 8 wisickeu Anutungo edeec imocac sirihau sebiaac tosea herecgeec.

⁵ Awraham ye kifaya 100 ammanu medaha Itsak fingerec.

⁶ Anu Sarango yofi deec, “Anutungo dzomoc meficgenendacac sogaiduae nga siduc yomoc negenggecde yeni neac negensima ifingoc dzomorema sogaigecde.”

⁷ Ifi dema torokpema yofi deec, “Warac merang Awraham yofi edebac, ‘Sarango kogoc mong mema namu gumeude.’ Anu ni sifu Awraham ye ngickpengeng ammanu yearunac medac mong medua.”

Hagar nga Ismacel meicyuruec

⁸ Anu kogoc ye yadima namu waec naso imohai Awrahamngo yaka kuneng ohou negec.

⁹ Anu Sara ye henu aigitangac Hagar yeac medaha Awrahamgarunac meec ye Itsakgoc ariac amma defagoc ammima dzomoreec.

¹⁰ Ifi hemma Awraham yofi dema edeec, “Wanacngac yeac medacngo neac medacna Itsak yegoc nerang maridzoming momoc mi mebesandape imocac ge wanacngac medahagoc kporacyuruna kenec.”

¹¹ Ifi deu Awraham ye medaha Ismacelac ubia homac manganeec.

¹² Manganeu ine Anutungo Awraham yofi dema edeec, “Itsakacarusing geac bangecfocga yombong debesandaeac ge wanacngac nga medacga yereac ubamangang mi anna. Sarango yoac sasawa edeguude imoc modacbesena.

¹³ Nga wanacngacac medac ye geac medac andeac ye ifingoc mesaheba bangecfocga ngicngacarengtoa ambesandae.”

¹⁴ Anu Awraham ye asoacguc yacma yaka nga sebibokong mong dokuyagoc mema Hagar mima fuayau gbedickema medahagoc sueyuruu kenoc. Kemma sing segema yerecgema Becer Sewa kisibangecfu kengkefoc.

¹⁵ Nga sebibokonnu doku kpac anu Hagarngo medac icbarama mong nanec imocac haniau wau feec.

¹⁶ Feu ye yengena tebemedaha kpesaigec hereau kengande ifi isoc kemma tarec. Ye yofi dema ifi anec, “Ni dafi medac hemma tacbare homeude.” Ifi dema medac feec imoc wama edi kemma tacma kiac udumeng kuneng kiarec.

¹⁷ Anu Anutungo medacac kiac ubaudumeng negenu Anutuac angerongo kurumennunac kpacma Hagar yofi dema edeec, “Hagar, ge dafi annec? Anutungo medac edi fede yeac kiac ubaudumeng negendacac ge kengec mi guu.

¹⁸ Neng ye mesaheba bangecareng kuneng ambesandeac ge yacma kemma medacga miacma mariau seria mena.”

¹⁹ Ifi dema kiwa merecgeu kic fima henu dokuteng mong taru kemma sebibokonnu doku fima hama medac gumeec.

²⁰ Anu Anutungo medac henggareng ammimanu yadiec. Yadima bangeckisiu kecma tebe kperec kperecgeac negen negengngic anec.

²¹ Ye Paran bangeckisiu kefec anu nonggeango Aigita bangecfunac ngac mong wangecma hama miec.

Awraham ye Awimelecgoc dzadzahac anoc

²² Anu yofi fingerec, Awimelec amma wasaingicfora yeneac kapten kpara Fihol yeri Awraham yofi dema edeoc, “Anutungo gegoc kefu wiac sasawa andacannec.

²³ Imocac amma ge ni nga bangecfocna ikoc mi anemmenadeac Anutuac kpacfu yofi deseribesena. Neng ge ogo anggemma hayai ifi isocngoc geng ni nga bangec yomoc kuric kecnec imocac ngicngac neni ogo anemmebesena.”

²⁴ Ifi deu Awrahamngo yofi deec, “Ni ifi ambadeac deseriduae.”

²⁵ Awimelecac enac tofoc tofohongicfora yeneng Awrahamgac dokuteng warac wangecgec imocac Awrahamngo ebicyoac deec.

²⁶ Ifi deu Awimelecngo yofi deec, “Ngic damoc yeneng ifi anggenggec imoc ni mi negenduae. Geng imocac siduc mong mi anennec nga ni ifingoc imocac siduc mong mi negenai yagucsac negenduae.”

²⁷ Anu Awrahamngo ramaburumaka goa mema Awimelec miu dzadzahac anoc.

²⁸ Nga Awraham ye ramahabutoaunac ramamedaha ngagera seweng mendzicyunuma tembuc faiyunuec.

²⁹ Ifi anu Awimelecngo hemma yofi dema kpesimiec, “Ge ramamedaha ngagera seweng imoc mendzicyunuma tembuc faiyunudang, imocac siriha dafi?”

³⁰ Ifi dema kpesimiu Awrahamngo yofi meremmiec, “Neng dokuteng yomoc usuyai nga geng imoc ngicngac yeneac kicfu deficgema deserinennadeac ramamedaha ngagera seweng yomoc neac mariunac menade.”

³¹ Anu yeri imohai yoac demeserima deocac bangec imocac kpara Becer Sewa kpacgec.

³² Yeri Becer Sewa bangecfu dzadzahac anoc. Anec wisickeu Awimelec nga yeac wasaingicfora yeneac kapten Fihol yeri pelistingic yeneac bangecfu dzigeneoc.

³³ Anu Awraham ye ine Becer Sewa bangecfu tamarisk ic mong homecma Kebu Anutu kecde nga kecengkecbesande yeac kpara kpacma dengerema eweheihei ammiec.

³⁴ Anu Awraham ye pelistingic yeneac bangecfu naso herea kuric kefec.