Fingec fingec 18 - Deduamiti

Kebungo Awraham fingecmiec

¹ Ama gerec yombong anu Awraham ye Mamereac terebint ic nanggec imohai kporucamayaac naguyau tacmanu Kebungo imohai fingecmiec.

² Ye tarecfunac fimiacma ngic harebec yeac wegenac nanggec yenenec. Yenemma kporucama wama meficyunuudeac nedzima yenearu kemma bangecfu ngonducnema

³ yofi deec, “Kebu, ge neac negenna ngereeudeu enac tofoc tofohoga feracnuma mi kembesena.

⁴ Ngeni kemma ic nokumuhau tacnegemmagec deba dokunec mong mehama ngemmegec haningina dzuacmagec

⁵ ni icsogong kapianec mehama ngemmeba meseringunuude. Ngeni enac tofoc tofohongina nearu hadaeac amma icsogong ngemmeba nemaguc ine singngina torokpema kembisia.” Ifi deu yeni yofi meremmigec, “Denec isoc naric anna.”

⁶ Ifi degec Awraham ye kporucamau bic yombong kemma emma Sara yofi dema edeec, “Ge farawa seuha kpac yombong pake harebec mema yerecgema icsogong bicbic ohona.”

⁷ Ifi dema nedzima burumakafora yenearu kemma burumaka medaha mong gombunga nga pereckea meisinggema mehaec. Mehama uangiha mong miu ye bicbic yombong houdacma ohoec.

⁸ Dzeu Awraham ye namu gbori nga namu kpara yoghurt amma burumaka oho ohoya imoc momoc mema hama yemmeec. Yemmeu yeni nema tacgec yengena yeneac wegenacnginau ic nokumuhau nanec.

Sara ye medac mong meude

⁹ Anu yeni yofi dema kpesimigec, “Enengga Sara ye dahai?” Kpesimigec yeng yofi merengyemmeec, “Ye edi kporucama manau tacde.”

¹⁰ Ifi deu yenearunac mongngo yofi deec, “Foracngoc, ni kifa wimocac wenacnaso yomoc isoc anude imohai gearu monggoc habade. Anu negennec, naso imohai enengga Sara ye medac mong mema tarude.” Sara ye ine ngadeau kporucbedzonaguu kedzac kpema tarec.

¹¹ Awraham nga Sara yeri bic ngicngac kpengeng anoc nga Sara ye ngac kogoc meandae ifi isoc monggoc mi anec.

¹² Imocac amma Sara ye negen negengango yofi negemma dzomoreec, “Ni ngac kpengeng nga ewena ye bic ngic kpengeng anu wiac imocac songo dafi monggoc meficgebade?”

¹³ Ifi negenu Kebungo Awraham yofi dema kpesimiec, “Sara ye nocac ifi negemma dzomorede, ‘Ni ngac kpengeng anduaengo naric kogoc kpenanggema mebade me?’ ”

¹⁴ Ifi dema yofi deec, “Kebungo wiac sasawa naric mema wiac monggac naric mi obohoude. Ni kifa fanic naso deduamoc imohai dzigenema gearu habade. Anu naso imohai Sara ye medac mong mema kefude.”

¹⁵ Ifi deu Sara ye kengec amma, “Kpac, ni mong mi dzomoredua i.” Ifi deu yofi meremmiec, “Kpac, ge dzomoredang.”

Kebungo Sedom ama kpetotieudeac deec

¹⁶ Anu ngic harebec yeni yacma imohacnac Sedom amaubigeng kenggec. Kembesonga anggec Awraham ye momocngoc yeni sinnu faiyunubeso yenahafoc kenggec.

¹⁷ Kemmagec Kebungo yofi deec,

¹⁸ “Foracngoc, Awraham ye ngicngacareng kuneng nga kuhagoc anude amma yeac amma bangeha bangeha ngicngac yeni kenecnginagoc anggecde. Imocac ni faka me wiac mong ambeso negenduae imoc Awraham naric mi hesonggemibade.

¹⁹ Anu yeac esamedacfora nga yeneac esamedacfocngina yeni neac sing modacgecdeac ye imoc edeyunuudeac meisinggeai. Yeni faka dindingac modacma yoacfu faka fora angkecgecdeu ni Awraham yeac wiac deserimiai imocac fora sasawa meficgeyemmebade.”

²⁰ Anu Kebungo yofi deec, “Sedom nga Amora amau ngicngac yeneac kopocsic imoc kuneng yombong nga ebicac ubahodung meficgedapeac kpakpactoa fingecma kecde.

²¹ Ni kemema ngicngac imoc yeneac fakangina hembade. Kpakpac nearu hau bic negenai nga yeni yoac imocacsoc angkecgec me kpac, imoc kemma hemma negembade.”

Awraham ye Kebugoc ngicngac 50 yeneac yoac deec

²² Anu ngic yohockang yeri imohacnac ferecgema Sedom amaubigeng kemeoc nga Awraham ye ine Kebugoc nanecngoc.

²³ Namma Kebuac wegenahau kemma yofi dema kpesimiec, “Ge ngic dindingac nga ngic Anutu ngadehema mangana megecdeac ayemmeande yeni momocngoc meicyunudacnade, ge Kebu ifia kpac.

²⁴ Taong imocac botuhau ngicngac dindingac 50 kecdae gedang. Ifi anu ge imoc kpetotienade me ge ngicngac dindingac 50 yeneac amma taong imoc kopocsiha wanade?

²⁵ Ge wiac yomoc negemma ngicngac dindingac nga ngicngac Anutu ngadehema mangana megecdeac ayemmeande yeni momoc yunubeso annade imoc geac faka mi ande. Bangec sasawaac desi desingic ge sifu desidesifaka fora modacma isingyunubesena.”

²⁶ Ifi deu Kebungo yofi deec, “Ni Sedom taong botuhau ngicngac dindingac 50 meficyunubadeu ine yeneac amma amatoa imoc onggonggebade.”

Ngicngac 45 nga 40 nga 30 yeneac yoac deec

²⁷ Ifi deu Awraham ye meremmima yofi deec, “Kebu negennec, ni sendung nga hama isoc amma yoac debadeac kpae sifu mi heinenna.

²⁸ Ngicngac dindingac 50 debare yenearunac 45 meficyununade gedang. Meficyunuma ge ngicngac 5 yeneac amma taongtoa hafoangoc kpetotienade me?” Deu yofi meremmiec, “Ni imohacnac ngicngac 45 meficyunubadeu taong mi kpetotiebade.”

²⁹ Ifi deu Awraham ye torokpema yofi deec, “Ge ngicngac 40sac meficyununade gedang.” Deu yofi meremmiec, “Ni ngicngac 40 yeneac amma mi ambade.”

³⁰ Deu Awraham ye yofi deec, “Ni yoac torokpema debadeac Kebu ge sifu neac herega mi bubeso. Ge ngicngac 30 meficyununade gedang imoc dafi annade.” Deu yofi meremmiec, “Ni ngicngac 30 meficyunubadeu yeneac amma mi ambade.”

Ngicngac 20 nga 10 yeneac yoac deec

³¹ Deu Awraham ye yofi deec, “Negennec, ni Kebu gegoc yoac monggoc deba kopocsicna wana. Ge ngicngac 20sac meficyununade gedang.” Ifi deu Kebungo yofi meremmiec, “Ni ngicngac 20 yeneac amma taong imoc mi kpetotiebade.”

³² Ifi deu Awraham ye yofi deec, “O Kebu, ni naso mocgusac yoacna monggoc torokpema deba herega mi bubeso. Ge ngicngac 10sac meficgema faka imoc annade me?” Ifi deu Kebungo yofi meremmiec, “Ni ngicngac 10 yeneac amma taong imoc mi kpetotiebade.”

³³ Ye Awrahamgoc yoac imoc desiu wisickeu kenec. Kenu Awraham ye dzigenema monggoc ameau kenec.