Fingec fingec 17 - Deduamiti

Ngicngacareng homac yeneac mangngina

¹ Anu Awram ye kifaya 99 ammanu Kebungo fingecmima yofi dema edeec, “Ni Anutu Kuctoa Mingina, ge neac kicfu kecengkecma hafoangoc ngic dindingac kecbesena.

² Ifi anna ni gegoc dzadzahac mema bangecfocga mesaheyunuba homac yombong ambesandae.”

³ Ifi deu Awram ye kicmesuya bangecfu hetutuckema feec. Feu Anutungo yofi dema edeec,

⁴ “Negennec, ni gegoc dzadzahac mebade imoc yofi, ge ngicngacareng homac yeneac kisicngina ambesannec.

⁵ Nga ni faiguai, imoc ge ngicngacareng homac yeneac kisicngina ambesannecac amma kpacga Awram imoc monggoc mi kpacgugecde. Yaguc ine kpacga Awraham ifi kpacgubesandae.”

Dzadzahac feengkecbesande

⁶ “Ni ge mesaheguba seregurutoa yombong ambesannec. Nga geac sacarennac ngicngacareng homac fingecbesandae amma yenearunac goa ngictau ambesandae.

⁷ Ni ge nga bangecfocga ngenigoc dzadzahac yofi ambade ni Anutungina amma kecengkecbesandua. Imoc ge nga bangecfocgaac fingecsahe nga yeneac fingecsahe yenigoc dadzahac imoc feengkecbesande.

⁸ Anu Kenacan bangectoau yaguc kuric kecnec imoc hafoangoc ge nga bangecfocga ngemmeba mema mingina anggec ngeneac feengkecbesande nga ni Anutungina amma kecbesandua.”

Sebinginaac tosea herec herecgeac kpete

⁹ Ifi dema yofi edeec, “Ge dzadzahac imoc mekecbesena, ge nga bangecfocga fingecenggecde ngeni dzadzahac imoc mekecbisia.

¹⁰ Anu ni nga ge bangecfocgagoc ngeni botucninau dzadzahac fede imoc mekecbisia. Imoc yofi, ngic nga medacfocngina sasawa sebinginaac tosea herecgedacbisia.

¹¹ Sebinginaac tosea herecgegec imocngo ni nga ngeni botucninau dzadzahac fingerec fede imocac kpetea ambeso.

¹² Gearunac esamedacfocga nga bangecfocga erebesandaesoc yeni fingecgec uameme 8 imohai sebinginaac tosea herecgekecbisia. Nga wanacngic geac amau fingecgecde amma kuricngic yenearunac wanacngic silwadzongo bummeyununade nga geac esangabofocga me bangecfocga mi andae yeni ifingoc momoc sasawa kpete imoc medacbisia.

¹³ Foracngoc, wanacngic geac amau fingecma kecgecde amma ngic silwadzonginango bummeyunugecde yeni sasawa sebinginaac tosea herecgebisia. Ifi anggec neac dzadzahacac kpete ngeneac sebiu fefeseri feengkecbeso.

¹⁴ Anu ngic mong sebia tosea mi herecgema eng kefudeu ye habufora yenearunac meickebesonga. Imoc yofiac, ye neac dzadzahacna kpede.”

Saraingo medac mong meude

¹⁵ Ifi dema torokpema Awraham yofi edeec, “Ge enengga kpara Sarai monggoc mi kpacbesena. Ni yaguc hanahema yeac kpara Sara deduae.

¹⁶ Ni ye keneheba ye geac medacga mong meude imoc neng genduae. Ni ye keneheba yeac sacarennunac ngicngacareng homac fingecbesandae. Nga yenearunac goa yeni ngicngac yeneac ngictau ambesandae.”

¹⁷ Ifi deu Awraham ye kicmesuya bangecfu hetutuckema dzomoreec. Dzomorema ye yofi negengemeec, “Ngic mong ye kifaya 100 anu ye sabac mong naric mi kpeficgeude. Nga Sara ye kifaya 90 anu ye kogoc naric mi meude.”

¹⁸ Awraham ye ifi negemma Anutu yofi dema edeec, “Ismacel ye geac kicfu kefude imocngo soha ande.”

¹⁹ Ifi deu Anutungo yofi dema meremmiec, “Foracngoc, enengga Sara ye ine medacga mong meude ge yeac kpara Itsak kpacbesena. Nga neng yegoc dzadzahac meba imocngo bangecfora yenigoc fefeseri fekecbesande.

Ismacel yeac arennunac ngictaumedacfora 12

²⁰ Anu Ismacelac negemma kpesi kpesiga bic negenggendua. Negennec, ni ye kenehema gboricfora mesaheyunuba seregurutoa yombong ambesandae. Ye ngictaumedac 12 yeneac mangngina anude nga yeac arennunac ngicngacareng kuneng fingecbesandae.

²¹ Anu dzadzahacna imoc ine Itsakaru meseribade. Sara ye kifa fanihau naso yofinenggac meude.”

²² Anutungo Awrahamgoc yoara ifi desima ye wama enec.

²³ Anu Awraham ye medaha Ismacel nga wanacngicfora ameau fingecdacma kecgec nga ngic silwadzongo bummeyunudarec amma ameau ngic kecdacgec ngic imoc sasawa meyunudacma Anutungo edeec imocac sirihau uameme imohaingoc sebingina tosea herecgedarec.

²⁴ Awraham ye kifaya 99 ammanu yengena sebia tosea herecgegec.

²⁵ Anu medaha Ismacel ye ine kifaya 13 ammanu sebia tosea herecgegec.

²⁶ Awraham nga medaha Ismacel yeri uameme mocgungoc sebingira tosea herec herecgea.

²⁷ Amma Awrahamgac amau ngic kecdacgec imoc wanacngicfora yeac amau fingecma kecgec amma kuricngic yenearunac ngic silwadzongo bummeyunuec yeni momoc uameme imohaingoc sebingina tosea herecgedacgec.