Fingec fingec 13 - Deduamiti

Awram ye Kenacan bangecfu dzigeneec

¹ Anu Awram ye enema nga finaha sasawa mema Lot momoc hesickeu Aigitanac dzigenema Kenacanggac Negew bangecfu kenggec.

² Awram ye ramaburumaka amma gol nga silwa homac yombong femiec.

³ Ye Negew bangecfunac Bet El amaubigeng feyac kengkecma Bet El nga Ai ama botucngirau warac kporucamaya kpedziu fekefec imohai monggoc kenec.

⁴ Kemma warac arata meec imohaingoc Kebuac kpara kpacma dengerema eweheihei ammiec.

Lot ye Awram wama kenec

⁵ Anu Lot ye Awranggoc kecma ramaburumakafora ifingoc meyunuma kefec nga kporucamaya sasawa tackenecngoc.

⁶ Amma ramaburumakafocngira homac yombong bic mekefocac amma momocngoc kefecdeac bangec socngina mi feecac yeri yerahafoc kekecac siriha mi anoc.

⁷ Ifi anecac Awram nga Lot yereac ramaburumaka garengfocngira yeni ngaba ngaba angemegec. Amma naso imohai kenacangngic nga peridzingic yeni ifingoc bangec imohai kecgec.

⁸ Anu Awram ye Lot yofi dema edeec, “Nerang mammedac andipeac nerang botucfu me rama garengfocnira yeneac botucfu ngaba fingeru naric mi anude.

⁹ Imocac faiemede. Ge kicga fima bangec fekende imoc henna. Ge kanaubigeng kennadeu ine neng foiubigeng kembesare me geng foiubigeng kennadeu neng ine kanaubigeng kembesare.”

¹⁰ Ifi deu Lot ye kiwa fiu kenu henec. Henu Yarden tumia imoc dokungo meu gunurema fedarec. Imoc henu Kebuac paradisi ua isoc amma Aigita bangec isoc kengkecma Tsocar amabangecfu wisickeec. Kebungo Sedom nga Amora taong mi memanganeyurumanungoc Yarden bangecngo ifi yombong feec.

¹¹ Lot ye Yarden tumiatoa hemma imoc hafoangoc yeac anudeac isinggema wenac ere ereaubigeng kenec. Sactoso yeri ifi amma waemeoc.

¹² Awram ye Kenacan bangecfu kefu Lot ye ine bangec tumiau taong tackenggec yeneac botucfu feyac kengkecma Sedom taun wegenahau kporucamaya kpedziu feec.

¹³ Anu Sedom ama mingina yeni ine ngic mangana yombong nga yeni Kebuac kicfu kopocsic homac wiac engena yombong angkecgec.

Anutugoc dzadzahac

¹⁴ Anu Lot ye Awram wama kenu Kebungo Awram yofi dema edeec, “Ge namma kicga fina bangec nortbigeng nga sautbigeng amma wenac ere ereaubigeng nga keme kemeaubigeng kenu.

¹⁵ Imoc yofiac, bangectoa hendacnec imoc ge nga bangecga ngereac bangectoa fefeseri feudeac ngemecbade.

¹⁶ Ni geac bangecfocga mesaheyunuba bangecac sangi isoc homac yombong anggecde. Ngic mong ye sangi osoyunudarudeu ye geac bangecfocga ifingoc naric osoyunudarude.

¹⁷ Ni bangec imoc ge gembadeac ge yacma wihanac made nga emuhacnac erede amma noboc noboc fekende imohai yerecgema kemma imoc sasawa hendacna.”

¹⁸ Ifi deu Awram ye kporucamangina kpedzucnema mema kengkecma Heweron amau Mamereac terebint ic nanggec imohai kporucamangina monggoc kpedziu feec. Anu ye imohai tacyac amma Kebuac arata mong meec.