Fingec fingec 12 - Deduamiti

Awramgoc yoac dedzege anec

¹ Anu Kebungo Awram yofi dema edeec, “Ge bangecga nga arengfocga amma manggaac amabangec wadacma neng bangectoa mong edzacgubade imohai kembesena.

² Ihai kemma bangecareng kuneng ambesannec nga ni kenecguba kpackunenggagoc amma kecnade. Ifi anna ngicngac geac wegenac kecgecde yeni kenecnginagoc anggecde.

³ Nga ngicngac kenecgugecde imoc neng ifingoc kenecyunubade. Nga ngicngac sowecgugecde imoc sowecyunubade. Anu ngicngacareng bangeha bangeha kecgecde yeni geac amma kenecyunudacbesandua.”

Awram ye kenec

⁴ Anu Awram ye Kebuac enac tofohoma kenu muniaac medac Lot ye yegoc momoc kenoc. Awram ye kifaya 75 ammanu Haran taong waec.

⁵ Ye enema Sarai nga Lot nga enac tofoc tofohofora nga finaha sasawa Haran taonnunac meficgeec imoc meyunudacma Kenacan bangecfubigeng kengkecma bangec imohai kensikegec.

⁶ Kensikema ferecge kengkecma Sehem taong nga Moreu terebint ic meficgegec. Naso imohai Kenacan ngicngac yeni bangec imohai kecgec.

⁷ Imohai Kebungo Awram fingecmima yofi dema edeec, “Ni bangec yomoc geac bangecga mibeso anduae.” Amma Awram ye imohai Kebu fingecmiecfu yeac arata mong meec.

⁸ Anu imohacnac monggoc sifecbangecfu Bet Elamau wenac ere ereaubigeng kemma imohai kporucamaya kpedziec. Imohai Bet El amau wenac keme kemeaubigeng tarec nga Ai ama ine wenac ere ereaubigeng tarec. Ye imohai Kebuac arata mong mema yeac kpara kpacma dengerema eweheihei ammiec.

⁹ Imohacnac monggoc feyac kengkecma Negew bangecfubigeng kenec.

Awram ye Aigita bangecfu kenec

¹⁰ Anu bangec imohai bodi fingecma boditoa yombong anu Awramngo kuric kefudeac Aigita bangecfu kemeec.

¹¹ Aigita bangecfu wegenac kemma enema Sarai yofi dema edeec, “Negennec, ge ngac kicsiricga gombunga yombong ni imoc negenduae.

¹² Anu aigitangic yeni gemma yofi degecde, ‘O imoc yeac enema.’ Ifi dema ni kpebucnugecde nga ge ine wagugec kecnade.

¹³ Nga geac amma naric kecbade nga kekecna ongonggegecdeac ge yofi edeyunubesena, ‘Ni yeac naina.’ ”

¹⁴ Anu Awram ye Aigita bangecfu kensikeu aigitangic yeni ngac imoc kicsiriha gombunga yombong kefu henggec.

¹⁵ Nga Parecoac bageu ngickuneng kecgec yeni ye hemma songo negemma kemma Parecoac kicfu ngac imocac dekerec amma siduc anggec. Amma ngac imoc wangecma Parecoac amau kenggec.

¹⁶ Kenggec Pareco ye Saraiac amma Awram gombunga ammiec. Ammiu Awram ye ramaburumaka, donggingiwa, wanacngic nga wanacngac nga donggi ngagera amma kamele homac mekefec.

¹⁷ Anu Kebungo ine Pareco nga wiacfora yeni Awram enema Saraiac amma kpendzeng kuneng hania hania meficgeyemmeec.

¹⁸ Ifi fingeru Parecongo Awram heitaima yofi dema kpesimiec, “Ge noc faka yombong anennec? Ge nocac ye enengga imoc miedenudang?

¹⁹ Ge ye nainna, ifi dema edenudang. Ge nocac ifiedenudang? Ikoc amma naingga dena neac enenna amma kefudeacmeai? Negennec, geac enengga hesickena monggoc kenec.”

²⁰ Ifidema wasaifora edeyunuu yeni Awram nga enema amma finahasasawa kpedzucnedacma sueyunuma faiyunugec kenggec.