Fingec fingec 11 - Deduamiti

Taongtoa kpara Babel amaherecyagoc

¹ Bangectoa bangecfu ngicngac sasawa yeni yoacsingngina mocgu nga yoaac ubangina mocgu feec.

² Yeni wenac ere ereaubigeng kengkecma Sinecar bangecfu tumiatoa mong meficgema imohai kemma kecgec.

³ Imohai kecma yofi denegeng anggec, “Hagec, nenang brik menideac gbaki mema gerecfu ohoni seribeso.” Anu yeni gbaki seria megec brik isoc anec nga bangecac sopo megec imocngo simeng isoc anec.

⁴ Anu yofi degec, “Nenang taongtoa mong mema tauatoa mong meni engkecma bubuyango kurumeng kpeserebeso. Ifi anu kpac kunenninagoc annide. Nenang singsararang kpema bangectoa bangecfu kembinggac ifi ambisina.”

Yoacngina mendzirec

⁵ Ifi dema bangecngicngac yeni taongtoa nga tauatoa megec nga Kebu ye imoc henudeac maec.

⁶ Mama yofi deec, “Negenggec, yeni ngicngacareng mocgu nga yoacngina mocgu nga ua imoc bic hanahema megec tacde. Amma yaguc kemma naso wisickeude yeni ua mong megecdeac deareng anggecde imoc sasawa anggecde. Nga yeni ua imoc mebesonga mi obohogecde nga obohobesandae.

⁷ Imocac nenang kemema yoacngina mendzicma mesufuni ngic me ngac mongngo ogea wegenac kecde yeac yoac mi negentegecbeso.”

⁸ Kebu ye ifi dema mendzicyunuu yeni bangectoa bangecfu singsararang kpema kendacma taongtoa mebeso degec imoc wagec.

⁹ Anu ye amabangec imohai bangecngic yoacngina medzicma mesufuu yeni singsararang kpema bangectoa bangecfu kendacgecac bangec imocac kpara Babel kpacgec.

Semgac siduc tosea 11:10-26 Sem esamedacfora yeneac kpacareng

¹⁰ Yomoc Semgac esamedacfora yeneac kpacareng. Sem ye kifaya 100 ammanu yearunac Arepacesad fingerec. Imoc doku tunggbaungtoa kpac anec imocac ngadeau kifa yohockang kecma fingerec.

¹¹ Nga ye Arepacesad fingeru imohacnac kifaya 500 torokpema kecmanu yearunac naroangmedacfora monggoc fingecgec.

¹² Anu Arepacesad ye kifaya 35 ammanu yearunac Selac fingerec.

¹³ Fingeru ye imohacnac kifaya 403 torokpema kecmanu yearunac naroangmedacfora monggoc fingecgec.

¹⁴ Anu Selac ye kifaya 30 ammanu yearunac Ewer fingerec.

¹⁵ Fingeru imohacnac kifaya 403 torokpema kecmanu yearunac naroangmedacfora monggoc fingecgec.

¹⁶ Anu Ewer ye kifaya 34 ammanu yearunac Peleg fingerec.

¹⁷ Fingeru imohacnac kifaya 430 torokpema kecmanu yearunac naroangmedacfora monggoc fingecgec.

¹⁸ Anu Peleg ye kifaya 30 ammanu yearunac Recu fingerec.

¹⁹ Fingeru imohacnac kifaya 209 torokpema kecmanu yearunac naroangmedacfora monggoc fingecgec.

²⁰ Anu Recu ye kifaya 32 ammanu yearunac Serug fingerec.

²¹ Fingeru imohacnac kifaya 207 torokpema kecmanu yearunac naroangmedacfora monggoc fingecgec.

²² Anu Serug ye kifaya 30 ammanu yearunac Nahor fingerec.

²³ Fingeru imohacnac kifaya 200 torokpema kecmanu yearunac naroangmedacfora monggoc fingecgec.

²⁴ Anu Nahor ye kifaya 29 ammanu yearunac Tera fingerec.

²⁵ Fingeru imohacnac kifaya 119 torokpema kecmanu yearunac naroangmedacfora monggoc fingecgec.

Teraac siduc tosea 11:27–25:1

²⁶ Tera ye kifaya 70 ammanu yearunac medacfora yofi fingecgec, Awram nga Nahor amma Haran.

²⁷ Nga yomoc ine Tera esamedacfora yeneac kpacareng. Tera yearunac Awram nga Nahor amma Haran fingecgec. Nga Haranggarunac Lot fingerec.

²⁸ Nga Haran ye ine mama Tera kecmanungoc kasedingic yeneac bangecfu Ur amau homeec.

²⁹ Anu Awram nga Nahor yeri ngac meoc. Awram ye enema kpara Sarai nga Nahor ye Haran naroanga kpara Mileka meec. Haran ye naroanghora yohockang kefoc, Mileka nga Yiseka.

³⁰ Nga Sarai ye ine ngac kufing nambaracfora kpac kefec.

Haran bangecfu

³¹ Anu Tera ye medaha Awram enemagoc nga esea Lot hesicyunuu Kenacan bangecfu kenggecdeac Kased bangecfu Ur ama tarec imoc wama kenggec. Kengkecma sing botuhau Haran taonnu kemma imohai kecgec.

³² Teraac kifaya 205 ammanu Haran taonnu yai homeec.