Fingec fingec 1 - Deduamiti

Anutungo wiac sasawa meficgedarec

¹ Hanac hanaheaungoc Anutungo bangec nga kurumenga kurumenga meficyunuec.

² Anu bangec kisic anu wiac mong imohai mi feec. Nga kundungngo doku keme kemea hedzickema feec. Anu Anutuac Asungo doku witiau sawau yerecgema nangkefec.

Uameme 1, Kperagi nga kundung mendzicyuruec

³ Anu Anutungo yofi deec, “Kperagi fingeru.” Ifi deu kperagi fingerec.

⁴ Fingeru kperagi henu ngereu kperagi nga kundung mendzicyuruec.

⁵ Mendzicyuruma kperagiac kpara hadzing kparec nga kundunggac kpara tofocnac kparec. Anu ama toforema wereckenu uameme mocgu anec.

Uameme 2, Hoeng wi doku emu

⁶ Anu Anutungo yofi deec, “Doku botuhau oda mong fingeru imocngo doku hendzicyuruu tembuc tembuc febesera.”

⁷ Ye ifi dema odatoa mong meu imocngo doku hendzicyuruu oda bageau yengena feec nga oda witiau yengena feec. Ye deu ifi fingerec.

⁸ Fingeru oda imocac kpara sawa deec. Anu ama toforema wereckenu uameme yohockang anec.

Uameme 3, Bangec, kondung nga ichasa

⁹ Anu Anutungo yofi deec, “Sawa bageau doku mocgungoc kpedzucnebisia anu bangec gbanggebeso.” Deu ifi fingerec.

¹⁰ Ifi fingeru ye gbangge gbanggea imocac kpara bangec kparec anu doku kpedzucnegec tembuha feu kpara kondung kparec. Ifi meficgema henu naric anec.

¹¹ Anu yofi deec, “Bangecfunac wiac kekehagoc hania hania erebeso. Bangecfu dzaring nga kpindzing komohanginagoc siricngina arenga arenga fingecdacbeso nga ic forakomohanginagoc siricngina arenga arenga, ifi fingeru.” Ifi deu wiac imoc fingecdarec.

¹² Bangecfunac wiac kekehagoc hania hania ereec. Dzaring nga kpidzing siricngina arenga arenga komohanginagoc fingecgec nga ic siricngina arenga arenga forakomohanginagoc fingecgec. Ifi fingecdaru henu ngereec.

¹³ Anu ama toforema wereckenu uameme harebec anec.

Uameme 4, Wenac, afo nga asomeng

¹⁴ Anu Anutungo yofi deec, “Sawau kperagi fingeru. Fingecma yeneng hadzing toforec mendzicyuruma kpete yabung nga uameme amma kifanaso deficgema febisia.

¹⁵ Anu kperagi imocngo sawau fingecma bangec kperagia mibisia.” Deu ifi fingecgec.

¹⁶ Ifi negemma kperagitoa yohockang meficyuruec, kperagi kuneng imoc hadzing garenggeudeac faiec nga kapia imoc tofocnac garenggeudeac faiec. Amma asomeng momoc meficyunuec.

¹⁷ Yeni bangec kperagi migecdeac sawau faiyunuu

¹⁸ yeneng ama wereckenude nga toforeude imoc garenggegecdeac faiyunuec amma kperagi nga kundung mendzicyurugecdeac faiyunuec. Ye ifi fingeru henu ngereec.

¹⁹ Anu ama toforema wereckenu uameme 4 anec.

Uameme 5, Yang nga neng

²⁰ Imocac ngadeau Anutungo yofi deec, “Wiac kekehagoc hania hania yeni kondunnu fingecma gurugoctoa kengha ambisia. Anu neng yeni fingecma sawau kpututuckema kengha ambisia.”

²¹ Ye ifi dema kondunggac yangtoa toa meficyunuec. Amma kondunggac wiac hania hania gurugoc kengha amma kecandae yeni siricngina arenga arenga ifi meficyunudarec. Amma ye neng kpegangnginagoc hania hania sasawa siricngina arenga arenga ifingoc meficyunuec. Ifi meficyunudacma henu ngereedarec.

²² Henu ngereu yofi dema kenecyunuec, “Ngeni fingecsahe amma seregurutoa amma doku nga kondung wakedacbisia amma neng yeni bangec witiau seregurutoa ambisia.”

²³ Anu ama toforema wereckenu uameme 5 anec.

Uameme 6, Kekec hania hania

²⁴ Imocac ngadeau Anutungo yofi deec, “Bangecfunac wiac kekehagoc hania hania siricngina arenga arenga fingeru, imoc amaac yang nga bangecac kateyang amma wiac kekecnginagoc bangecgoc wegenac kengha amma kecgecde hania hania sasawa siricngina arenga arenga fingeru.” Ye deu ifi fingecdacgec.

²⁵ Ye bangecac kateyang hania hania siricngina arenga arenga amma ramaburumaka siricngina arenga arenga amma wiac sasawa kekecnginagoc bangecgoc wegenac kengha amma kecandae imoc ifingoc siricngina arenga arenga meficyunudacma henu ngereedarec.

Uameme 6, ngicngac yengena siric isoc

²⁶ Anu Anutungo yofi deec, “Nerang siric isocngoc ngicngac mede nerang siric isoc ambisia. Amma yeneng kondunggac yang nga sawaac neng amma bangectoa bangecfu amaac yang nga bangecfu kateyang sasawa amma wiac sasawa kekecnginagoc bangecgoc wegenac kengha amma kecandae yeneac garengngina amma kecbisia.”

²⁷ Ifi dema ye ngicngac yengena siric isoc meficyuruec. Ye ngic nga ngac meficyuruu yengena siric anoc.

Dederecgeyoac

²⁸ Meficyuruma kenecyuruma yofi dema edeyuruec, “Ngeri fingecsahe amma seregurutoa amma kemma bangec sokoma kecma bangec mema henggareng amma kecbisia amma kondunggac yang nga sawaac neng amma yang amma wiac sasawa kekecnginagoc bangecfu kengha amma kecandae yeni garengyunubisia.”

²⁹ Ifi dema torokpema yofi edeyuruec, “Ni bangecfu ic nga kpindzing hania hania sasawa forakomohanginagoc faingemmeduae imocngo yakangina ambeso.

³⁰ Anu bangecfu yang sasawa kecdacdae nga sawaac neng sasawa amma yang nga wiac sasawa kekecnginagoc bangecgoc wegenac kengha amma kecdae yeneac yaka imoc dzaring nga kpindzing sasawa faiduae.” Anu ye deec, ifi isoc fingecdarec.

³¹ Fingecdaru ye wiac sasawa meficgeec imoc henu gombunga yombong andarec. Anu ama monggoc toforema wereckenu uameme siks anec.