Esta 9 - Deduamiti

Yehuda firang anggec

¹ Afo wisicwisickea Adar imocac uameme 13 nu, ngictaungo dedeseri deec, naso imocngo hasikeu imoc modacma ngaba yeneng Yehuda memayunuma kpedzomangyunugecdeac negensigec, imocngo heimerennu Yehuda yeneng ngabafocngina memanganeyunugec.

² Ifi anu Ngictau Dzeksiac prowins sasawa fekendeu Yehuda yeni taongnginasoc kpedzucnema ngabafocngina tidzicyunugecdeac efaigec. Ifi anggec ngicngac noboc nobocnacngo ihai hama kecgec, yeni imoc hemma damuyunuecac amma dzikac turunga merenggecdeac kuc hofocgec.

³ Anu prowins sasawaac ngickiwa, gawana, demengere ngic nga bangecgareng yeni Modekaiac kengecyunuecac amma Yehuda meficyunugec.

⁴ Ifi anggec Modekaiac kpackunengngo ngictauac amagerecfu sokoma prowins sasawau yeac kpacsiducngo kendaru imocngo kuc monggoc torokpemiec.

⁵ Imocac amma Yehuda yeneng ngabafocngina damocngo ngadeyunukecgec, yeni songonginaac areng wasaibeangngo hebucyunuma kpedzomangyunudacgec.

⁶ Ifi amma Susa amaherec seriau Yehuda yeneng ngic 500 memanganeyunuma kpebucyunudacgec.

⁷ Anu imohai Pasandata, Darafon, Asapata,

⁸ Porata, Adaria, Aridata,

⁹ Pamasita, Arisai, Aridai nga Waidzata, yeni ifingoc kpebucyunugec.

¹⁰ Ngic 10 imoc yeni Yehuda yeneac ngabangina Hamang, Hamedataac medac yeac medacfora, ifiac amma maringinango ine yeneac iwai mong mi kpeseregec, kpac.

¹¹ Anu Susa amaherec seriau ngic kpebucyunugec yeneac kpete ngictaungo naso imohaingoc negenec.

¹² Negemma ngictaungo ngactau Estaac deec, “Yehuda yeneng Susa amaherec seriaunacsac ngic 500 nga Hamanggac medacfora 10 ifingoc memanganeyunuma kpebucyunugec. Anu ngictauac prowins noboha goau dafi fingecde, imoc mi negenduae. Imocac yaguc geac sibiaga damoc nga nocwiacac songoga anu kpesinennade, imoc wagendacbade!”

¹³ Deu Estango yofi merenec, “Ngictau geng negena ngereeudeu, wenac yomocac dedeseri modacma wereckenu ifingoc negengyemmeu Yehuda Susa kecdae yeneng ngabafocngina memanganeyunuma Hamanggac medacfora 10 yeneac farengngina wotunnu gbedicyunubisia.”

¹⁴ Deu ngictaungo ifi fingerudeac wadziyemmeu dedeseri imocngo Susa taonnu kenec. Anu dederecge imoc modacma Hamanggac medacfora 10 yeneac fareng imoc gbedicyunugec yenenggec nga ngabafocngina memanganeyunugedeac dedekperagi imocngo ifingoc Susa taonnu kendarec.

¹⁵ Anu afo Adarac uameme 14 imohai Yehuda Susa kecgec, yeni kpedzucnema Susa ngic 300 monggoc homecfu faiyunugec nga maringinango ine iwaingina kpesecmesere mong mi anggec.

¹⁶ Anu Yehuda ngic tosea ngictauac prowins nobohau kecgec, yeni yenang ifingoc ngabafocngina yenearunac kasokpeemegecdeac kpedzucemegec. Amma ngabafocngina ngadeyunukecgec yeni 75,000 kpebucyunugec nga maringinango ine iwaingina mong mi kpeseregec, kpahac yombong.

¹⁷ Wiac imoc sasawa afo Adar imocac Uameme 13 nu fingecdarec nga uameme 14 nu ine tacnegemma nenesemeng kpegec enu nesogaiac naso anec.

¹⁸ Anu Yehuda Susa taonnu kecgec, yeni ine kpeturanggema uameme 13 nga 14 imohai dzikacfungoc kecgec nga uameme 15 nu yeneac tacnegeng nga nesogai naso anec.

¹⁹ Nga Yehuda guruama bisicbisic taong ngadeau kecgec yeneng ine afo Adarac uameme 14 imoc ifingoc kpabanggema ubangerecgoc nenesemeng nema yenaocngoc iwai emekpesi anggec.

Purim nasotoa meserigec

²⁰ Anu Modekaingo wiac fingerec, imocac siduckibiu ohoec nga kibi mong yofi ohoma Yehuda ngicngac ngictau Dzeksiac prowinsu netuc nga agac kecgec, yenearu faidarec.

²¹ “Kibi imohai yoac yofi ohogec, Yehudango kifasoc afo Adarac uameme 14 nga 15 imohai nesogai angkecbisia.

²² Imoc yofiac, Yehuda yeni ngabafocngina yeneac mariunac mesiemegec dzoromorongo meremma sogacsogai meficgeec nga kiacubahodung nasongo heimeremma nesogai nasotoa anec. Afo imoc hau naso imohai yeni imoc kpabanggema sogacsogaigoc nenesemengngina emekpesi amma ubangerecac wiac makpekpea yemmegecde,” kibi imocnoc ohoyemmeec.

²³ Anu Yehuda yeni Modekaingo kibi faiyemmeec, imocac negenggec naric anu nesogai hanahegec, imoc kifasoc modacma kpabanggekecgec.

²⁴ Imoc yofiac, Yehuda sasawa yeneac ngaba Hamang Hamedataac medac Agagi arennunac yeng warac Yehuda memanganeyunuu kpac anggecdeac ariac kpara Pur imoc anggec.

²⁵ Anu ebic siduc imocngo ngictauaru kenu negemma yeng yoac sibia yofi derecgeu ohogec. “Hamang ye Yehuda ngic faka mangacmangacnea ayemmeudeac negensima arenggeec, imoc heimerenu yengena nga medacfora yeni wotung herea imohai gbedicyunugec ubasac negec.”

²⁶ Ifi anu wiac sasawa fingecyemmeec nga nocwiac hennegeng anggecac siduc, imoc siduckibiu oho ohoya feec, imocac amma uameme kpara Purim kpacgec, kpac imoc Pur imohacnac memea.

²⁷ Anu Yehuda yeneng yenang nga esamedacfocngina amma ngic damocngo yenearu torokpegec, yeni kifasoc uameme yohockang imoc tatahoc modackecgec. Ifiac amma nasongina meseriseria, imoc kpabanggekecgec.

²⁸ Amma Yehuda yeneng Purim uameme imoc nigecyunubacac nga fingecsahenginau naso imocngo nigera ambacac wagec eng mi fekecbeso. Anu prowins sasawa nga taongtoatoa sasawa amamanasoc fingecsahe feengkefude, yeneng naso yomoc negensima kpabanggekecbisia.

²⁹ Dema ngactau Esta Abihareac naroang nga Yehudangic Modekai yeraocngocsac Purim uamemeac kibi atac yohockang, imoc kucgoc ohoma meserioc.

³⁰ Meserima Yehuda ngicngac Dzeksiac eucererenggac bageu prowins 127 nu kecgec, yenearu faiu kendarec. Nga kibi imohai yofi oho ohoya feec, ruae nga yoacforango ngenearu feengkecbeso.

³¹ Nga Purim naso imocngo feengkefudeac negensima ngactau Esta nga Yehudangic Modekai yereng kibi imoc bic meseriyemmeoc. Nga warac faka fingeru yakasege amma ubahodung yegec heikecgec, ifi isocngoc fingecsahe ngade feengkefudesoc imoc ifingoc kifasoc modackecbisia.

³² Nga Estango Purimgac dedeseri deec, imoc siduckibiu ohogec. Imoc deserima osogecdeac siduckibiu faigec, imoc yaguc fedengoc.