Esta 8 - Deduamiti

Ngictaungo Modekai tatac miec

¹ Naso imohaingoc ngictau Dzeksingo Yehuda yeneac ngaba Hamanggac amagerec sasawa imoc ngactau Esta desimiec. Anu Estango Modekai dafiu yeac sactosea ande imoc ngictau bic edeecac amma ngictaungo Modekai heitaiu yearu kenec.

² Kemmanu ngictaungo gbonggac bineng kibiagoc Hamanggac mariunac meec, imoc Modekai heimiec. Heimiu Estango Hamanggac amagerec sasawa imoc Modekaingo garenggeudeac mariu faieec.

³ Anu Estango monggoc kemma ngictauac haniau makpema kiacgoc desambic ammima, Agagi arennunac Hamangngo Yehuda memanganeyunuudeac areng mangana meec, imoc meickedarudeac edeec.

⁴ Ammiu ngictaungo gol kapongango Esta gbongkpeu yacma hoangau namma yofi deec.

⁵ “Ngictau geng neac songo negemma neac negenna ngereeudeu songona modacma faka imocac negenna naric angana anudeu, yofi ambesena. Agagiarennunac Hamang Hamedataac medac yeng Yehuda memangac-mangacneac kibi ngictau geac prowins sasawa imohai faiu kenec, imocac kpekpetari kibi mong ohoma faina kembeso.

⁶ Ngicngacfocna yeneng ebic imohai enggecdeu ni yenemma dafi ambade? Nga sactosofocna memanganeyunugecdeu ni dafi kecbade?”

⁷ Ifi deu ngictau Dzeksingo ngactau Esta nga Yehudangic Modekai turunga yofi merengyemerec, “Hamangngo Yehudangic memanganeyunubesonga anecac amma ni yengena wotung herecfu faiba ubasacneu, yeac amagerec sasawa imoc Esta bic midarai.

⁸ Imocac ngeri yaguc Yehuda yeneac tatac mema neac kpacfu kibi mong ohoma bineng kibiagocac kpetea faima imocgoc faiec kenu. Anu dedeseri kibi imocngo seria febeso.”

⁹ Ifi deu naso imohaingoc afo Siwan imocac uameme 23 imohai Modekaingo ngictauac kibi oho ohofora uayoac deyemmeec. Anu yeni Yehuda yeneac amma Modekaingo dederecge anec, imocac siricfu prowins 127 imoc Indianac kengkecma Etiopia yeneac demengere ngic nga gawana amma ngickiwa yeneac kibi amayoacnginausoc ohodacgec. Amma Yehuda yeneac amayoacnginausing ifingoc ohoma faiyemmegec.

¹⁰ Anu Modekaingo ngictau Dzeksiac kpacfu kibi ohoma ngictauac bineng kibiagocac kpetea imocngo kibi witiau heima kibi mekemmehangic yemmema sueyunuec. Anu yeneng ngictauac becosi imohacnac gombunga kucnginagoc meyunuma ihai kibi seria imoc mema gereagoc mekemmeha andacgec.

¹¹ Ngictauac dedeserikibi imohai yofi ohogec, “Yehudangic sasawa yeni kpedzucemema yenang agengngina tibisia. Amma bangec me prowins monggac dzikacac kiwafocngina yenang nga enemmedacfocngina memanganeyunuma, kpedzomangyunugecde amma ngabafocngina yeneac iwai megec yeneac andarudeac ifingoc deec.”

¹² Anu afo wisic wisickea Adarac uameme 13 imohai Yehuda yeneng ngictau Dzeksiac prowins sasawau faka imoc anggecdeac meserigec.

¹³ Meserima ngicngac noboc nobocnac ihai kecgec yeni imoc negemmagec, Yehuda yeneng efaima ngabafocngina yeneac turung kpougecdeac kibi seria meserigec dedeseri anec, imoc mesahema faigec prowins sasawau kendarec.

¹⁴ Anu dedeseri kibi seria imoc ngictauac dederecgeac siricfu yengena becosifu gereagoc mekengmeha anggec. Amma kibi imoc Susa amaherec seriau ifingoc faigec kenec.

Yehuda yeneac yungecyungec naso

¹⁵ Anu Modekaingo ngictauac amaunac ngictauac kporuc herea asongasong nga kongackongac heima kporuc herea borangborang sufafac linengngo memea, imocngo kperacemeec. Amma ira golngo memea imoc oruhau heima Susa taonnu kemeu ngicngac yeneng hemma herenginau ungerereng fingeru desogai kuneng anggec.

¹⁶ Anu Yehuda yeneng kpacngina fingeru eweheihei ayemmegecdeac ubangerec nga sogacsogaiac nasongina anec.

¹⁷ Anu ngictauac dedeseri imocngo prowins sasawa nga taong sasawau kenec, kenu Yehuda yeneac botucfu ubangerec nga sogacsogai fingeru nenesemeng me-mengere amma nesogaitoa anggec. Nga bangec noboc nobocnac ngicngac yeneng Yehuda yeneac kengecngo semeyunuecac amma yeneng neni Yehudanacngoc ifi dema homacngo yenearu torokpegec.