Esta 7 - Deduamiti

Hamang gbedickegec

¹ Anu ngictau nga Hamang yeri ngactau Estaac nesogaiu monggoc kenoc.

² Nga nesogaiac kenoc imohai waingdoku netacma ngictaungo monggoc yofi kpesimiec, “Ngactau Esta ge noc wiacac anggende? Nga ge yoacga sibia damoc? Ge eucererenna noboha gembadeac denadeu imoc desigembade.”

³ Demanu ngactau Estango eweheiheigoc yofi merenec, “Ngictau, ge neac negengngereenemma songoga fedeu kekecna mi meickena amma ngicngacfocna ongongyununa, imocngo neac yoacna sibia nga kpesikpesina ande.

⁴ Amma ngicngac sasawa wanac menunubau dede, ni imocac yoac mi debai nga kpendzeng ifiaac amma ngictau enacteteng mi ammibai. Imoc neanna nga ngicngacfocna neni memanganenunuma kpedzomangnunugecdeac bic bummenunugec.”

⁵ Ifi deu ngictau Dzeksingo ngactau Esta kpesimiec, “Imoc merac! Merang negengyohoha kpacngo wiac imoc ambesonga dede?”

⁶ Deu Estango deec, “Ngic mangacmangacnea Hamanngonoc ngaba anemmede!” Ifi deu Hamangngo ngictau nga ngactau yereac kicfu ngadea netackeu dzonoma fedeec.

⁷ Anu ngictaungo hereabuu gereagoc yacma waing dokuya wau taru, amea ngadeau dzaring uau kemeu Hamang ye ngictaungo kpebucgeudeac anec imoc bic negenec. Ifi negemma ngactau Estango kekeha onggonggeudeac ngombonggeec.

⁸ Anu ngictaungo dzaring uaunac dzigenema emma henu nesogacsogaiac sobennu Hamangngo Esta tarecfugeng haniau merandzima ngonducnemiec. Anu ngictaungo ifi hemma arohomumunggema deec, “Ngactaungo nigoc ama manau tacmanu ngic yomoc ye yegoc serofaka anudeac ande, i!” Demanu imohaingoc uangicfora yeneng Hamang kpebucgebeso negemma kicmesuya sangohogec.

⁹ Sangohomagec ngictauac uangicfora ngickuneng yenearunac mong Harbona yeng yofi deec, “Ngic merang ge onggongguec, imoc Modekai ye gbedickegecdeac wotung mong hereayaac kpetea 25 mitaacsoc, imoc Hamanggac ama sobennu gunuc gununggea nande.” Deu ngictaungo deec, “Ngeni ye ihai gbedickegec!”

¹⁰ Ifi deu wotung herea Modekaiac mengereec, imohai Hamang yengena mekemma gbedickegec ubasacneec. Neu ngictauac herebuya kuha mau negenu ngereec.